فلحظة صدق مع ذاتك أكتب سلوكك الواقعي اللي تمارسه فجذب علاقاتك
حتكتشف نوعية الناس والعلاقات اللي تجذبها!
إذا تطارد وتعطي بسبب فراغ عاطفي حتجذب الشخص المستغل
إذا سلوكك متناقض ما تعبر عن شعورك الحقيقي حتجذب المنافق الكذاب
إذا ما تحب نفسك وتعتني فيها حتجذب اللي ما يعتني فيك ويخونك!

اجلس مع نفسك بصدق وتذكر كل سلوك اتبعته ووصّلك لهذي العلاقة وهذا الشخص
اكتب وحتفهم كيف صنعت هذي المواقف والأحداث بينكم
حتعرف مين المخطئ من البداية
ومين عليه اللوم
ومين المفروض يتغير
إذا كانت علاقة مسيئة تأكد إن داخلك ما فيه حب حقيقي للآخر
كل اللي جوتك احتياج نتيجة صدمات الطفولة

اكتب وواجه نفسك، حتكتشف إنك تلاعبت وكذبت وانكرت مشاعرك في موقف كان مهم تظهر فيه حقيقة شعورك لكنك ناقضت نفسك بسبب خوف من خسارته !
حتكتشف إنك تلاعبت في الآخر عشان يحبك ويملئ فراغك واستخدمت اساليب وحيل لجذب اهتمامه فيك
حتفهم ليه الآخر يبادلك نفس النفاق والتلاعب والخداع !

بعد مواجهة نفسك وكتابة كل السلوك اللي اتبعته فعلاقتك حينطفي داخلك لومك تجاه الآخر وحتوقف اسقاط انعكاسك عليه ويظهر نور جديد تشوف من خلاله حقيقتك اللي تحررك من هذي المشاعر غير الصادقة اللي ما لها أساس ولا حتبني رابط حقيقي !
يمكن تنهي بسهولة علاقة امتدت سنين من الخداع والألم !

إذا استمريت في خداع نفسك أكيد الكارما حتستمر في سحق كل رابط بينكم لين تفوق وتصّدق إنك السبب في كل اللي يحصل معاك
وعشان تصحح المسار ضروري تعترف بخطأك لنفسك وتستغفر عن كل سلوك تبنيته وعن الأذى اللي تسببت فيه تجاه الآخر بإغراءه او خداعه أو شراءه بعطاياك !
وأوعدك حتبدأ بداية صحيحة🫧