رتبها

#ثريد | هل الكيك فعلا حرام؟ وايش مشكلة منصات البثوث؟
جيب لك شاهي لان الثريد دسم وطويل 😁
بسم الله نبدا ❤...

1-في البداية نبدا حبة حبة، بـ"سبب ظهور هالمنصات الي تحاول تنافس تويتش"، والشي الي نرجع له هو تاسيس منصة justin tv بسنة 2006، وكانت فكرتها مقتطفة من البرامج التلفزيونية الامريكية وقتها، يبث فيها justin حياته بشكل عفوي، وحصلت على اقبال كبير بس ما دام، والناس ب2010 بدت تطفش...

2-وبعدها قرر يفتح المجال للناس عشان يبثون، وبنفس الوقت يحاول احياء المنصة.. بس لاحظوا التفاعل الواسع الي جابه محتوى القيمنق، واستغلوا هذي الفرصة، ليتم تقسيم هالتصنيف لحاله وتأسيس منصة Twitch...

3-وذكر "جستن" بمقابلة ان احد أكبر اسباب نجاح هالمنصة كان اعطاء أهمية قصوى واهتمام واستماع للمتابع والستريمر، يوفرونله الجو المناسب للبث، واي شي ما عجبه أو ضايقه يشيلونه، وأي نصيحة او إقتراح يضيفونه.. مما عزز العلاقة بين الشركة والعملاء،

4- وبـ2016، إشترت شركة أمازون تويتش بمبلغ 970 مليون دولار، ومن هذي السنة الى 2019، كانت افضل فترة في تاريخها، انفجرت بشكل كبير خصوصا مع ظهور العاب نفس فورتنايت، ببجي، اوفرواتش...، كانت ببساطة محبوبة الجماهير والستريمرز..

5-وهنا تبدا أول منافسة، حيث ظهرت منصة mixer، الي سوتها مايكروسوفت، ولكن ماكان عليها أي إقبال او زيارات نفس تويتش، وعشان كذا قرروا يتعاقدون مع أكبر ستريمر وقتها "نينجا" بعقد يقارب 30مليون دولار..
وغيره من الستريمرز الثانيين زي "شراود" بعقد قيمته 10 مليون دولار..

6- ولكن نظرا لعدة اسباب، زي الواجهة الصعبة للتطبيق، والتسجيل الصعب بالموقع، الناس ما بلعتها، حتى نينجا طلع بمقابلة وتكلم عن ذا الموضوع.. وانسحب عليها، وب2020 مايكروسوفت اعلنت اغلاق ميكسر، وبكذا تويتش تفوز في اول منافسة لها بكل سهولة...

بعد كل ذا، صار في هبة جديدة للمنصات، "العقود".. صاروا الستريمرز زي لاعبين الكورة والرياضيين، لازم توقع معاه عقد او بتجي منصة ثانية تسرقه منك.. وهذا أدى الى مشاكل بتويتش، حيث أصبحت لا تهتم للستريمرز الصغار، أما الكبار بيظلون كبار لأنهم من زمان موجودين، وضاقت الفرص على الثانيين..

8- وهنا صارت فترة لخبطة بكل شي حرفيا، سووا طاقم عمل للستريمرز عبارة عن جسر بينهم، بس هالجسر كان لحاله طامّة!! باختصار بندوا ناس لاسباب مختلفة وغبية، وهنا يدخل ثاني منافس لهالسباق، ومن السوق الصيني ...

"نونو لايف" ، كانت بالبداية تحاول تستهدف مناطق تويتش ناسيتها او غافلة عنها، زي اندونيسيا والصين وغيرها، وتوجهت للشرق الاوسط، ووقعت عقد مع احد اكبر الستريمرز، خلودي 25 بعقد يقارب 2.4 مليون ريال.. وبعدها وقعت مع ستريمرز ثانيين زي "أبو فلة، فيرفول، شونق، دربحه، ابوعابد..."...

10 - ولكن الهوس خلالهم يوصلون لدرجة انهم يتحكمون بالبث، وذكر فيرفول هالشي ببودكاست باور، وحتى شونق وغيرهم ذكروا كيف كان هالشي عبارة عن تجربة للنسيان... وفسخت جميع العقود، انسحب عليها ورجعوا الناس لتويتش، وللمرة الثانية تويتش تفوز بهالمنافسة ...

خلاص تويتش أثبثت انها غير قابلة للإستغناء وغير مستبدلة، وهنا راح تتمادى بوضع قوانين لا داعي لها وبتجيب العيد.. اغلب القوانين معقدة ولكن بحاول ابسط بعضها، مثلا الاشتراك الي تنقسم نسبته 50/50 بين تويتش والستريمر، بس اذا كان بارتنر (يحقق شروط ويقدم) بتصير 70/30 له...

تويتش غيروا وخلوها 50/50 وحتى لو انك بارتنر، بسبب ان "السيرفرات الي تنعرض فيها غالية"، واضافوا اعلانات تظهر 3 دقايق كل ساعة، وهذا من اغبى القرارات الي سوتها حرفيا.. لانه يطلعلك بوقت غير مناسب ويشقك شق، وما تقدر ترجع تشوف وش فاتك..، وغيرها من القوانين الي تخص الفئة هذيك..،

13- وبدال ما يصلحون مشكلة الاعلانات، حطوا قانون يزيد مدة الاعلان ل8 دقايق بالساعة !! وما اقتصروا بكذا بس، لانهم رفضوا موضوع ان ستريمر يعلن لشركة ببثه، وحطوا قوانين تضر دخل الستريمر الي يعتمد عليه بما ان تويتش تاكل اغلب الارباح...

قوانين غير منطقية ولا ضرورة لها غير الطمع، زي انه ممنوع تحط مقطع او اعلان صوتي، ولكن بعدها تراجعوا عن بعض عالقوانين، وحذفوها بسبب انهم حسوا بالخطر وبالتهديد، تهديد من منصة جاية وهي عارفة وش تسوي، وتصلح اخطاء المنصات الثانية...

"الكيك" الي ماكرروا الاخطاء الي طاحوا فيها الباقي .. واجهة صعبة ما تقدر تتعود عليها؟ نجيب لك نفس واجهة تويتش، تقسيم ارباح الاشتراك بشكل غير منطقي؟ نعطيك 95 وناخذ 5% ولا تزعل.. تسجيل صعب بالموقع؟ سجل باي ايميل ولا يهمك ..

وتعاقدوا مع اكبر الستريمرز،
اول شي توجهوا للاجانب، نفس xqc، adin ross، بعقد يمتد ل100 مليون دولار ،وبعدها باواخر 2023 الشرق الاوسط والعرب، تعاقدوا مع دربحه، ثم خلودي، ثم شونق، ويلـ11ي، ابو عبير، اودن، ابونوح، ايقل، عزيز، صهيب، زياد، شباب لفل ون والقوت بنفسه سعود العجمي ...

17- قد ياتي في بالك "من وين لهم كل هالفلوس؟"
بكل بساطة وللأسف "القمار"..
حكمه واضح جدا ولا نفتي فيه، بس كيف؟
اولا تويتش اصدرت قرار منع بثوث القمار من منصتها باواخر 2022، ومن المواقع المحظورة بالمنصة هي stake، الي خلا الكيك يسوون منصة بثوث ويحطون فيها هالتصنيف ويروجون له..

هالاسم (stake) غالبا انه مر عليك، لانه راعي نادي watford الانجليزي، وقد دفعوا للمغني "دريك" عشان يلعب بموقعهم، وهالموقع برضو دفع لxqc عشان يبث بموقعهم، وهو نفسه الي يمول موقع kick. وزيادة على ذلك، واحد من اكبر التصنيفات متابعة بكيك هو القمار..

يمكن تقول، انا شدخلني اذا قمار او لا؟ اني شكو؟ ابقولك حاجة ..
الموقع الي لجأت له بعدما لقيت اعلانات غثيثة، وقلة اهتمام وعدم تقدير من تويتش، والي على كلام الستريمرز انه يقدر الواحد، يمكن بأي لحظة يوقف العقود بسبب ايقاف التمويل من فلوس موقع القمار...

حتى احمد(شونق) وقف بثوث لفترة ، بسبب انتهاء العقد، وبعدها جدد .. وقال بنفسه ان إذا الكيك وقف بيضطرون يرجعون لتويتش كلهم. وللآن مستقبل البثوث مجهول، ماندري هل تويتش بيفوز زي دايم ولا بيخضع.
والجواب عالسؤال اول: اسلوبهم للتمويل(القمار)حكمه واضح اما المتابعة فبينك وبين الله

وبالاخير، الثريد مبتغاه ماهو الا الفايدة والمعلومات الي عندي حبيت انشرها، ومافي داعي للشخصنة وترى يمديك تتابع باي منصة تبي ولا فرضت عليك شي
وغالبا هذا آخر ثريد لي بهالفترة، ومع اني داري ان الواحد لو يسحب ما بيرجع نفس قبل بس وش نسوي عاد..
وقضيت ١٠ ساعات عالجوال اجهز هالثريد🙏🏼

في الختام كفارة المجلس، سبحانك اللهم وبحمدك أشهد أن لا إله إلا انت استغفرك واتوب اليك.
دمتم سالمين، في أمان الله🤍

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد