رتبها

مراجيح اثيوبيا🎡
لو مشغلوش المراجيح السياسية على اقصى سرعة ممكن الgps نفسه يهنج و تلاقي بدرية طلبة طالعة منه تقولك "كلهم لمؤاخذة بيضربوا في بعض، انت ايه اللي جابك هنا"
في زحاليق وبيوت رعب وتعليق على الشناكل حاصل بسبب الحرب المسكوت هنا في اقليم امهرا
-١تابع
#شيرين_هلال

هنحكي حدوتة الحرب في الاقليم في أخر السرد عشان اللي مش متابع الحرب، لكن نركز الأول على الجديد ومش هتلاقيه على محركات البحث
في تطور كالعادة بإتجاه التصعيد السياسي والعسكري ضد آبي أحمد ونظامه لكن المرة دي العداء جاي من نيران كانت بالأمس القريب صديقة🙄
عملتي ايه يا اثيوبيا🤦🏻‍♀️
-٢تابع

غدوا أندرقاتشو وزير خارجية إثيوبيا السابق و مستشار رئيس وزراء البلاد للشؤون الأمنية أعلن إنضمامه لجبهة النضال من أجل حقوق شعب أمهرا. يا عزيزي تلاقيك مش واخد بالك مين المذكور ، دا المأسوف على كرافتته صاحب التعليق الأكثر إستفزازا للمصريين "النيل بحيرة إثيوبية"
-٣تابع

شوف سبحان الله جوز مصاصي الدماء دول لما قلبوا على بعض حصل إيه. الخلاف مش مفاجئ بالنسبة للاثيوبين، لأن بسبب خلافه الشخصي مع آبي أحمد على عدة شؤون داخلية منها استئثاره بالسلطة وعدم إفصاحه عن كتير من خططه مع مستشاريه اللي غدوا كان واحد منهم تمت إقالته والتضحية بيه.
-٤تابع

الجديد بقى إن الرجل اللي كان سافح دم التيجراي عامناول و بيشربه على الريق هو و آبي أحمد معترض دلوقتي وعامل حمامة سلام في حرب رئيس الوزراء ضد إقليم الأمهرا. مش إنت يا عم كنت متفاخر إنك أول دبلوماسي تلبس الزي العسكري وتقول أنا جاهز أنضم للجيش لو الجنود خلصوا؟؟
-٥تابع

فجأة يا حضرات راح منزل بيان بالأمهرية بيعلن فيه لكل المنصات انضمامه رسميا للنضال وبيطالب جبهات مليشيات فانو الأمهرية المسيطرةعلى الإقليم اللي كان كله حليف الأمس لآبي أحمد في حرب التيجراي وإنقلبوا على بعض،بإنهم ينظموا الصفوف واعتبر نفسه الراعي والمتحدث بإسمهم في الخارج.
-٦تابع

طبعا جيدو مكانش في أثيوبيا و هو بيعمل كدة!
السيد وزير الخارجية بعد إقالته الغادرة تمت تحديد إقامته ومنعه من السفر بالرغم من إنه عضو مجلس الأمناء لأحد البنوك الأثيوبية إلا إنه مُنع من السفر،فإضطر للسفر ببسابور عادي مش باسبور دبلوماسي خلسة ف2023.
مش عارفين يحبسوا وزير في قمقم!
-٧👇

وليه العداء دا كله بعد الصحوبية اللي كانت واصلة للعضم؟
شوف سيدي
جاء معاد النزول من مرجيحة وركوب زوحليقة،أيوة سيادتك
غدوا قبل ما يكون وزير خارجية نوفمبر 2020 (تاريخ حرب التيجراي)كهدية له على تطويعه لأقليم الأمهرا لخدمة أهداف آبي أحمد من ورا حرب بصفته رئيس الأمهرا من 2013
-٨تابع

ولما خلصت الحرب و جات إتفاقية السلام مع التيجراي على عكس رغبة الأمهرا و أهدافها من مساعدة آبي أحمد في الحرب إنقلبوا على بعض. إتعرض غدوا لحملة تشويه شرسة بداية من أعضاء في البرلمان لحد بوستات السوشيال ميديا، ليه بقى؟
لأن الرجل وقف في البرلمان يشرح لهم
-٩تابع

كيفية التعامل مع الغضب الآمهري بحكم إنتماءه للإقليم ورئاسته له لفترة طويلة،بعد ما آبي أحمد إستصدر قرار من البرلمان بفرض حالة طوارئ على الإقليم بسبب التمرد اللي حصل فيه. غدوا قال إن لا إعلان الطوارئ هيحل ولا القوة العسكرية هتقدر تسحب السلاح من فانو وبالفعل اللي قاله حصل!
-١٠تابع

آبي أحمد بقاله سنة و أكتر بيحاول يدخل الإقليم عسكريا مش عارف، والبرلمان مرجيحته المفضلة، لسة بيمدد له حالة الطوارئ جوا الإقليم دون جدوى.
مسكتش غدوا عند هنا، دا تقريبا هزأ أعضاء البرلمان اللي أغلبهم من الحزب التفصيل بتاع آبي أحمد(حزب الإزدهار) قالهم🗣️
-١١تابع

إنتوا فقدتوا شرعيتكم عند إقليم الأمهرا مع شوية اتهامات كدة يعف لساني عن ذكرها.
جدوا مسكتش برضو لحد هنا ، كانت له تحركات دبلوماسية خطيرة أزعجت الحكومة الفيدرالية بعد هروبه منيهم، زي إنه لف على السفارات الأجنبية يحكي حدوتة فانو ويبرر العنف ضد الحكومة!
-١٢تابع

إتسربت له صورة من لقاءه مع سفير الولايات المتحدة لأثيوبيا في (واشنطن) أول ما هرب من أديس أبابا على بليجيكا و منها على الولايات المتحدة. على إثر هذا التسريب وجهت أثيوبيا لوم وعتاب شديد اللهجة للسيد السفير الأمريكي🥷🦹🏻‍♀️
-١٣تابع

دا على أساس إن أثيوبيا لم تغض الطرف عن هروبه وعلى أساس إنها مكانتش عارفة بإتصالاته مع الجانب الأمريكي و هو في أديس أبابا!! كان في فاصل ردح غير دبلوماسي بالمرة بين السفير والحكومة الأثيوبية لأنها قبلت تسمع "دوافع اللي بيسموا نفسهم فانو"
أنا مليش دعوة هما اللي بيردحوا لبعض🤷🏻‍♀️
-١٤👇

طيب إيه بقى اللي يحرك غدوا من مهربه في بلجيكا ويخليه يصدر بيان زي كدة؟
فانوا حاولت الإقتراب من منطقة رايا بعد دخول كوبوالقريبة من جنوب التيجراي ودا معناه اشتباكات قريبة بين الاتنين أو السيناريو البديل بعدالانهيارات في الأفق التفاوضي بين آبي أحمد وحكومته مع جبهة تحرير تيجراي
-١٥👇

و الأحزاب المعارضة كمان، يحصل إتفاق مصالح بين الآمهرا و التيجراي متبصليش كدة آه ممكن يحصل عادي إحنا في السياسة مفيش ولاء إلا للمصلحة وآبي أحمد من ال ح. م.ا.ق.ة الكافية إنه يجمع أعداءه على مصلحة واحدة ضده عادي جدا.
-١٦تابع

موقفش الخطر العسكري لحد هنا، فانو بقالها مدة طويلة بتحارب منفردة بتكسب معارك على أصعدة كتير تمددت في الشمال بإتجاه مناطق التيجراي وبقالها 3 ايام ولحد النهاردة قافلة طريق حيوي موصل ما بين ديسي وأديس أبابا العاصمة بعد قتال عنيف مع القوات الفيدرالية، بحسب اعلان الامهرا
-١٧تابع

للضغط على الحكومة اللي منعت الموادالغذائية والأدوية عن الإقليم
الهجوم الشرس بقاله 4ايام بقيادة قائدكوماندوز الأمهرا صموئيل بادال،ولك أن تتخيل يا عزيزي حالة المدن اللي مقفول منفذها على طريق مسافته8ساعات ما بين العاصمة وديسي، من إختناق وعمليات سلب وجرايم محدش يقدر يحصرها!
-١٨👇

انا خلصت الاحداث الجديدة بس الأمور كدة كلعت معاكوا شوية بالنسبة للناس اللي بعرف عن الحرب لاول مرة🤦🏻‍♀️
أعلم سيدي القارئ إنك محتاج أصل القصة، طول بالك وخد نفس عميق ويالا بينا نعرف
-١٩تابع

من أغسطس 2023 وكان إقليم الأمهرا على موعد مع أعمال عنيفة أدت لاعلان حالة طوارئ ممتدة. والامهرة اقليم اثيوبي متاخم للحدود السودانية. حصلت فيه اشتباكات امنية عنيفة بين "ناشطين" "فانو" والجيش الأثيوبي و قوات الامن من ناحية تانية. هما الحقيقية مش ناشطين اوي يعني 😇😅
-٢٠تابع

هما مليشيات بس بتتحدد مسمياتهم بحسب جدول المصالح مع الادارات الاثيوبية. يعني لو الحكومة لها مصلحة في الاستيلاء على الاراضي الخصبة في الفشقة السودانية:
هوب بتسيبهم يتدخلوا لحماية المزارعين الاثيوبين اللي واضعين ايديهم على الارض، وبيكونوا نشطاء مش اكتر
-٢١تابع

لكن حاليا عشان الحكومة خلصت حربها في اقليم التجراي ومعادش في مصالح يحصلوها ، ومطلوب منهم البقاء في اقليم امهرا هاديين ومربعين ايديهم وكمان يسلموا سلاحهم بعد إنتهاء الحرب (المصلحة)
-٢٢تابع

فطبعا المليشيات حاسة انها لا طالت عنب التجراي و لا بلح الفشقة ، فبدأت تقلب اقليم امهرا عاليه واطيه ، وهى حاليا على وضع "المليشيات" بالنسبة للحكومة!
والوضع في الداخل اثيوبيا ميعرفش الا المرجحة في بين المعارك زي ما احنا عارفين🥷🦹🏻‍♀️
-٢٣تابع

الجيش بيضرب في الاوروميين واوروميا بين الجيش والمجموعات المسلحة
ناهيك عن القتال اللي طوال الوقت داير ومسكوت عنه في اقاليم اوجادين او"الصومال الاثيوبي"واقليم العفر
واتجددت مع أوائل2024 حالة العنف اللي استدعت البرلمان في2فبراير يعلن تمديد حالة الطوارئ على الإقليم4شهور جديدة
-٢٤تابع

بعد ما خصلت مدة حالة الطوارئ في يناير. جاية حالة الطوارئ في الوقت اللي فيه المنطقة في صراع عسكري إقليمي يشمل قوات الدولة الفيدرالية والإقليمية، من ناحية، وميليشيا فانو، من ناحية تانية.
وعشان كدة الوضع على الأرض كالتالي:
-٢٥تابع

* نزاع مسلح جديد في أمهرة
*أزمة إنسانية كبيرة في تيجراي
*وضع أمني سيئ في أوروميا
*السيولة الأمنية في البلاد وصلت لفوضي من الاغتيالات السياسية والسطو المسلح والأعمال المليشاوية
إيه الاحداث اللي جددت الاشتباك ووصلت لالاحتجاجات الجماهيرية خرجت في عدة مدن كبيرة في أمهرة؟
-٢٦تابع

*قرار الحكومة الفيدرالية إعادة تنظيم القوات الخاصة الإقليمية إلى الشرطة النظامية والجيش الوطني. (يعني شطبنا فيدرالية كدة ومفيش حكم ذاتي للإقليم و أنا بحول الأقاليم كلها لحكم مركزي تحت رئاستي و أنا الحكومة و الحكومة أنا – دا أبي أحمد اللي بيقول)
-٢٧

*اتحولت الاحتجاجات إلى اشتباكات واسعة النطاق وانعدام استقرار
* اغتيال رئيس حزب الازدهار جيرما يشيتيلا في إبريل.
* سقوط مطار لاليبيلا في امهرا في قبضة ميليشيات فانو في تصعيد خطير!
-٢٨تابع

*أصبحت الولاية الإقليمية مركز للصراع العسكري الأخير اللي شاركت فيه القوات الحكومية والجماعات المسلحة واجتاحت معظم أنحاء أمهرة.
*حملة اعتقالات واسعة طالت سياسيين وصحفيين وأعضاء معارضة في البرلمان من أعضاء مجلس أمهرة الإقليمي.
-٢٩تابع

*الطرق مغلقة ولا توجد وسائل نقل مع تشويش مستمر على الاتصالات من قبل الحكومة الفيدرالية
*وقوع أكثر من 200 قتيل منذأغسطس الماضي.
*قصف عشوائي بالمسيرات على مختلف المدن الامهرية
*مداهمات عنيفة و كثيفة على المنازل لملاحقة عناصر المليشيا.
-٣٠تابع

*تجدد المواجهات العنيفة بين قوات فانو و قوات إقليم التجراي بما يمهد لتجدد الحرب الاهلية
*هجوم من مليشيا فانو على معسكر للجيش بعد تطويقه ومحاصرته و استولوا على المعدات والامدادات.
-٣١تابع

كان نص اتفاق السلام الشامل الموقع بين الحكومة الإثيوبية وجبهة التيجراي على توحيد القوة العسكرية تحت لواء وزارة الدفاع الإثيوبية، ونزع سلاح الميليشيات المسلحة كلها، وإعادة دمج عناصرها داخل الجيش النظامي، هو السيب في اشعال الاحداث ورفضته القوات الأمهرية،
-٣٢تابع

بحجة انها مكانتش طرف في الاتفاق، وشايفة إن تكوينها كجهة مسؤولة عن الأمن والسلام في الإقليم، جاء وفقًا للدستور الفيدرالي الإثيوبي، الذي يمنح كل إقليم مسؤولية حماية أراضيه بتكوين قوات تتبع إدارته!
-٣٤تابع

طبعا كان مؤشر على خطورة الوضع خصوصا وأن فانو عندها خبرة قتالية،حتى نساء فانو معروفين بإمكانياتهم الخطيرةفي الاستطلاع ومن أمهر القناصات بالمناسبة.
فانو ردود أفعالها تجاه محاولات اخضاعها هيكون ضحيتها الشعب الاثيوبي، بالإضافة إلى أن الاضطرابات الداخلية بين القوميات الإثيوبية
-٣٥

هتكون عقبة كبيرة في طريق التفاوض بين الحكومة المركزية وبين باقي إثنيات الدولة المضطربة و دي الصورة المكررة للحاصل مع الاوروميين، كمان التوترات الحدودية بين إثيوبيا والسودان، بسبب منطقة الفشقة والتوترات مع ارتريا حليفة الامهرة حاليا والتوترات المحتملة مع الصومال
-٣٦تابع

مين بقى فانو-شفتة وليه عندها مشكلة مع الحكومة الأثيوبية؟
في الأزمنة القديمة كان اسمها "الشفتة"بمعنى المتمرد أو الثائر اتوجدت في الاصل بميثاق للدفاع عن الاهالي ضد ظلم الأنظمة ومع مرور الوقت اتعلم المسؤوليين يستغلوها ويجندوها لصالحهم،فانحرفت عن ميثاقها وبقو قطاع الطرق😇
-٣٧تابع

وناخد بالنا من النسخة المليشاوية الأثيوبية في رؤيتها لذاتها:
-مش بيشوفوا نفسهم مجرمين بالعكس بالنسبة لهم أعمال السلب والنهب تعد أعمال بطولية و نوع من الفروسية خاصة لو كانت ضد الحكومة
-عمليات شراء السلاح ممكن تبقى فردية كشرط قبول داخل الجماعة
-٣٨تابع

-اثيوبيا بتسمح لأصحاب البأس و الشجاعة منهم بالانضمام للجيش وفي منهم اللي وصل لرتب عليا
بتتكون مليشيا فانو من 4 فصائل تحمل اسم فانو وهي منتشرة في مناطق متفرقة من إقليم الامهرة وهي :
قوات فانو غوندر
وقوات فانو وللوا
وقوات فانو شوا
وفانو غوجام
كل الفصائل بتقاتل تحت اسم الفانو
-٣٩👇

لكن موصلتش لتشكيل قيادة مشتركة لها وكل المحاولات الحالية هي مجرد تنسيق ساهمت في انجاح بعض العمليات العسكرية. و عشان كدة وزير الخارجية الاسبق بعمل حكومة وتوحيد الصفوف و هو يتولى قيادة شأنهم من الخارج
(الخوميني style)
-٤٠تابع

واتهم الحكومة الإثيوبية بعرقلة كل المحاولات اللي تمت لتوحيد فصائل الفانو لأن الحكومة خايفة من تمركزهم وقوتهم بعد الوحدة. ومع اعلان الحكومة الاثيوبية قرارها بنزع سلاح الفانو، تبرأت حكومة الاقليم من دعوة الحكومة واعلنت كمان رفض تنفيذ القرار وقالت خلونا على الحياد
-٤١تابع

طيب شكل المعارك في الاقليم إيه؟
مليشيا فانو حققت انتصارات ساحقة على الجيش الفيدرالي، و"حررت" مدينة بحر دار التابعة لإقليم الأمهرة على حد تعبيرها. تكبد الجيش الفيدرالي خسائر فادحة، وسقط أعداد كبيرة من القتلى وأُسروا في المعارك ضد مليشيات الأمهرة في منطقة قوجام.
-٤٢تابع

وأرسلوا تحذير لهيئة الطيران المدني الاثيوبية لو فكرت تنشر قوات داخل البلاد. وأعلنوا عن إستيلائهم على صواريخ مضادة للطائرات القادرة على إيقاف الطايرات التجارية على ارتفاع 40 ألف قدم.
ظهرت مع الاحداث دي حالة من الهروب بين الجنود فى الجيش الاثيوبي في قلب المعارك بالآلاف😅
-٤٣تابع

في ظل كمان الاوضاع الانسانية المتدهورة في السودان، إثيوبيا طالها نصيب من اللجوء في أمهرا بعدد كبير من السودانيين عالقين في قوندر والمتمة بسبب الأوضاع الأمنية في امهرا مع توقف حركة المواصلات والرحلات الجوية
دا غير ال6000اللي حبسوهم الامهرا في الغابات وابي احمد مقدرش يدخل
-٤٤👇

نقول كلمتين:

معروف ان اي مليشيا تتكون في اي دولة هى خطر مؤجل حتى لو كانت تحت اشراف و علم الدولة، لكن المليشيا في اثيوبيا تحديدا بتحمل فوق الاهداف العسكرية ، اهداف و عداوات اثنية (عرقية) بغيضة جدا و خطرها غير محدود.
-٤٥تابع

ونضيف على المليشيات المذكورةتشكيلة منوعة من اشرس واكبر التشكيلات المسلحة واللي خبرتهافي حروب الابادةوالتطهير العرقي وحروب المدن
اللطيف فانو كانت قوات لاتشكل خطر
•مين قام بتسليحها؟
•الحكومة في أثيوبيا
•مين قام بالتدريب؟
الحكومة
•هل هتحاسب الحكومة على أخطائها؟
بالتأكيد لا
-٤٦👇

•اعلان حالة الطوارئ مفهومة لكن ارهاب شعب امهرا وتدمير الإقليم بحرب عشوائية مصيبة زي ما حصل في شعوب قبلها الأخطاء بتتكرر!
الاخطاء دي نبعت من حكومات بتقوم على اساس عرقي "العرق اللي بيحكم هو اللي بيستولى على كل مقدرات البلاد،ويحرم باقي الاعراق من الترقي والسلطة والثروة"
-٤٧تابع

وعشان كله يمشي قانوني كانت الحكومات وقيادة الجيش بتقوم بدعم وتسليح المليشيات من الباطن وتعتذر في العلن بحجة حاجاتها لمزيد من التمويل الخارجي لكبح جماح المليشيات، وتعلق على شماعتهم كل الجرايم اللي ارتكبوها ، اللي هى في الاصل بتخدم اهداف اثيوبيا و حلفاءها !!
-٤٨تابع

وهو دا حال اثيوبيا من يوم ما اجمعوا امم متنافرة واقاليم لا تجمعهم هوية وانتماء وطني واحد قسريا،من عهد الامبراطوريات القديمة، وبعدها اعلنوا نفسهم دولة بالمعنى المعروف لينا وحتى لما تبنت الدولة "الفيدرالية"مسابتهاش فيدرالية كما خلقها ربنا،لا أبت الا ان تضفي عليها لمسة اثيوبية
-٤٩👇

بلون خاص بيها واصبحت التجربة تسمى "الفيدرالية الاثنية الاثيوبية"
يعني كل اقليم فيه مجموعة من الناس بتجمعهم لغة و ديانة و عرقية واحدة يحكموا نفسهم تحت قيادة واحدة، برضو لم يسلم الامر من عنف وحروب، وفشلت فشل من النوع الرفيع ، وحاليا في محاولتها للعودة لمركزية الدولة
-٥٠تابع

لازم يحصل اللي شايفينه:عنف وحروب شعوب لبعضها ومع حكوماتها.
اثيوبيا كانت اشتراكية مركزية من وقت منجستو ف1977-1987
وبعدين مسكها ميليس زيناوي واتحولت فيدرالية اثنية1991-2018
وآبي أحمد بيحولها دولة مركزية تاني وفي وسط حلة البريستو دي والحروب شغالةوالاقاليم والعة والناس في عراك
-٥١👇

وبسبب التركيبة غير المتجانسة والمصالح المتضاربة والارادات المسحوبة من ابناء الاقاليم المتنافرة،هتفضل متوالية العنف والثأر دايرة مهما تم تصدير صورة معاكسة للمجتمع الدولي.
يا ريت منربطش عوامل ليس لها علاقة بالمصفوفة الافريقية ببعضها و نفهم ان السياق الافريقي معقد بقدر كبير
-٥٢👇

جدا و مش منتظر تدخل من اي دولة او طرف خارجي عشان يشتعل! هما مولعين في بعض منهم فيهم، مش منتظرين هبد و تنظير وربط بين مفاوضات سد النهضة و الحاصل جوا البلد اللي هى اصلا عدد من الشعوب و الامم "بالمناسبة هما اللي بيقولوا على نفسهم كدة"!!
دي شخصيتهم وثقافتهم وبيئتهم السياسية
-٥٣👇

يرجع مرجوعنا للحاصل النهاردة على أرض أثيوبيا من تصعيد عسكري: خروج فانو وتمددهم خارج الإقليم هيدي لآبي أحمد شرعية كبيرة في إستخدام العنف ضدهم بحجة إخضاع المتمردين زي كل مرة. وعشان دا يحصل هو عمره ما بيقدم على حرب بدون حليف (عسكري) من خارج الحدود زي ما حصل في حربه على التجراي
-٥٤👇

معنديش مؤشرات أقدر أستدل بيها على مين الدولة أو الكيان اللي هيدعمه عسكريا (بس مفيش حاجة بتستخبى). 😎😉
فشله في إخضاع الإقليم لمدة عام كامل مع إنهيار اتفاقه مع التيجراي، مش بعيد عن الحالة الاقتصادية المتدهورة اللي بتعاني منها إثيوبيا بعد قرار تعويم البر الإثيوبي
-٥٥تابع

بحسب اتفاقه مع صندوق النقد، اللي انهار من أول يوم وسببت حالة من السخط الشعبي، وحط عليها كمان التوتر السياسي اللي سببه في المنطقة من وقت إمضاء إتفاقيته المشؤومة مع إقليم صومالي لاند، واللي بسببها هتتغير التمركزات العسكرية في القرن الإفريقي تما
-٥٦تابع

ولسة بيهدد الصومال بإنه مش طالع من أراضيها (اثيوبيا كانت موجودة في الصومال ضمن بعثة أتميس التابعة للاتحاد الإفربقي)إلا بمزاجه ودا طبعا ردا على إعلان مصر مشاركتها عسكريا في بعثة الإتحاد الإفريقي لأول مرة
فترة الحارة آبي أحمد مجربش يشوف قوة أكبر منه بتحط رجلها في وشه حرفيا!
-٥٧تابع

كل دا خلا غدوا أندرقاتشو وزير خارجيته السابق يشوف دا الوقت المناسب لإشعال الحراك ضد آبي أحمد اللي أصبح صداع في دماغ القوى اللي بتسانده كل مرة، ومفيش فايدة (وإنت تمايل وإيه يعدلك).
وضع خطير وتصعيد عسكري كبير وشيك في منطقة أصلا مليئة بالصراعات وقرن إفريقي على شفا حفرة من النار.
-٥٨

ووجود عسكري أجنبي حاضر من قواعد عسكرية وبعثات مكافحة ارهاب و قواعد طيران لكل القوى الدولية تقريبا مع تحفز كبير من دول الجوار لاثيوبيا و اللي بتصدره للاقليم من مشاكل و توترات، مع تعنتها المعهود في كافة الملفات اللي بتكون هى طرف فيها!!
الامر خطيرررر🧯💣🧨
-٥٩تابع

خلصنا كدة، فاضل إعتذار للقراء الأعزاء.🙏
هذا السرد كان مفروض ينزل من إسبوع فات، ونظرا لضيق الوقت مقدرتش أنزله قبل كدة. عارفة إني وعدتكم دايما تفضلوا على علم بالأمور في الشأن الأفريقي قبل أي حد و لكن عارفة برضو إن رصيدي من المودة والإحترام يسمح تسامحوني.🥰🎩🌹
-٦٠👇

كل التحية و الإحترام لكم و تحيا مصر الآمنة بفضل الله وبتمسك أهلها ببلدهم ومصالحها و معرفتهم قيمتها و تحية كبيرة جدا لرجال الجيش المصري العظبم خير أجناد الأرض🇪🇬
بقلم
#شيرين_هلال
#عين_على_افريقيا🌴

المزيد من هذا الكاتب

مواضيع ذات صلة

الأكثر اعجابا

المزيد من هذا الكاتب

مواضيع ذات صلة

الأكثر اعجابا

فك الثريد