يقولون
صاحب الحاجة أعمى
وأنا أقول ربي ستر عليه 🤲🏻
صديقي يبحث عن تذكرة لإسطنبول
دخل مواقع الخطوط نفسها وشاف الأسعار
بحث بعدها في بوكينق (رحلات الطيران) ولقى السعر أرخص ب 300 ريال !!
حجز ودفع والحجز مؤكد
وكل شي تمام ؛ هل إنتهت القصة ؟
للأسف لا ؛ توها تبدأ 💔
معاك وقت ؟ حياك 👇🏻

صاحبنا بعد فترة
دخل على موقع الخطوط
عشان يضيف شناط زيادة
تفاجأ بشي صادم جدا
الرحلة موجودة
والتفاصيل صحيحة
لكن بيانات المسافرين
- الجوازات وكذا - غير موجودة !
مع إنه مدخلها بنفسه !
مراسلات مع بوكينق
والتجاوب صفر
كل موظف يحوله على الثاني
والخلاصة
ما نقدر نسوي شي
تواصل مع الخطوط !

بحث في قوقل
عن رقم التواصل
لشركة الطيران - محلية -
( ما راح أذكر إسمها )
وأول رقم طلع له إتصل عليه
السلام عليكم
معاك فلان من خدمة العملاء
كيف ممكن أخدمك !
قال أنا عندي الحجز الفلاني
وأحتاج أضيف بعض البيانات
لجميع المسافرين لإنها غير موجودة
قال له إبشر ؛ غالي والطلب رخيص !!

لمدة عشرين دقيقة
صديقي يعطيه الأرقام والتواربخ
وهذاك معطيه جوه وياخذ منه التفاصيل
لما خلص
قال لازم تدفع 820 ريال
حاب تدفعها الان
أو عن طريق رابط
قال له أبدفعها الان وخلصني
صديقي عطاه تفاصيل البطاقة 😭😭
وتم سحب المبلغ بثواني
ساعة ويجيك إيميل بكل التعديلات

ساعة
ساعتين
مافي حس ولا خبر
يتصل على الرقم يرد عليه ويقفل بوجهه
من بكرا فيه محاولات سحب لكن ربي ستر عليه لإن البطاقة مافيها رصيد 🤲🏻
تخيلوا كل هذه الإشارات
وصديقي مفهي ولم يتخذ أي إجراء
أصلا ما توقع ولا واحد بالمية إن اللي صار له عبارة عن محاولات إختراق ونصب وإحتيال !

تواصل معاي يسألني
ليش ما أرسلوا إيميل 😭
قلت له وش السالفة ؟!
شرح لي السالفة 😩
وعلمته وش يسوي
تواصل مع البنك ووقفوا بطاقته وكل حساباته لكن قالوا له إن السحب جاي من موسسة في السعودية ولهم حساب عندنا وشغله نظامي !
بدأ بعدها بالإبلاغ عن الحادثة
بشكل رسمي عبر الجهات المختصة ✅

حتى الآن تجيه إتصالات
من أرقام مجانية 9200
ومن ثابت وجوالات وغرابيل
معاك فلانة\فلان من البنك الفلاني
بخصوص الشكوى اللي قدمتها
نحتاج تفاصيل الحساب البنكي
وراح نرسل لك رابط عشان تدخل البيانات !
شي ما تتخيلونه يا أصدقائي
يقول صرت ما أثق في أي إتصال حاليا
بالعامي ؛ صار موسوس 🥹

الخلاصة ⚠️
لا تحجز طيران ✈️
من وسيط أيا كان
بوكينق
ويقو
سكاي سكانر وغيرهم كثير
نعم تراها مواقع موثوقة
لكن لو صار ما صار
ردد ياليل ما أطولك
خصوصا لو كان الموقع
غير سعودي للأسف الشديد
أنا شخصيا ؛
أستخدمها للمقارنة فقط
أشوف أسرع مسار
أقصر رحلة
مدة الترانزيت
المطارات اللي راح أتوقف فيها
شركة الطيران اللي تناسبني أكثر وهكذا
وبعدها أروح لموقع شركة الطيران
أو تطبيقهم وأحجز مباشرة
لو حبيت أعدل ؛ ألغي ؛ أضيف خدمات
أتواصل معاهم مباشرة وتمشي الأمور والفرق في السعر ما يستاهل لو صار لك شي ✅
فندق ؛ ما عندي مشكلة
سيارة ؛ تساهيل والخيارات كثيرة
لكن الطيران
لا تتعدى الموقع الرسمي
لا تربط نفسك بوسيط
خصوصا إذا كنتوا عائلة
تقول أنا لحالي
وما عندي مشكلة أغامر
السعر مغري جدا وفرق كبير
براحتك يا صديقي وربي يستر عليك
رحلات آمنة وماتعة للجميع 🤍