لو ممكن أقول نصيحة لخريجي الثانوية العامة في مجال تخصصي اللي بدأته من 30 سنة (الهندسة المعمارية) أول حاجة هقولها ان دخول الجامعة بداية مش نهاية، انت تعبت وجبت مجموع كبير بس الجامعة مش هي المكان اللي هترتاح فيه للأسف، والدراسة في الجامعة غير المدارس والدروس، وخصوصا في مجال العمارة
العمارة مجال ممتع جدا بس مرهق جدا في نفس الوقت، الجانب الجميل فيه انه دايما هيديلك إحساس الإبداع وانه مفهوش تكرار، كل مشروع هو تجربة جديدة تماما، لكن الجانب الوحش هو انها مهنة مرهقة جدا جسديا وعصبيا، ساعات عمل طويلة وضغوط طول الوقت من اتجاهات مختلفة
فلو انت حابب المهنة دي النشوة اللي هتاخدها من الإبداع والتحديات الجديدة كل مرة هتخفف عنك الشعور بالإرهاق بشكل كبير، لكن لو داخلها أكل عيش وخلاص هتفضل مضغوط ومرهق ومش هتحس بأي متعة، دي مش وظيفة تقليدية هتشتغلها عشان الفلوس والمستوى الاجتماعي وخلاص
العمارة كمان مجال بيفتحلك أبواب كتيرة لتوسيع المدارك لأنك مثلا لازم تفهم كيفية عمل أي مبنى (مستشفى/مطار/مصنع/متحف إلخ) وتدخل في أدق التفاصيل عشان تعرف تصممه، ولازم يكون عندك إلمام بالسياق الثقافي والحضاري والاجتماعي والاقتصادي لكل مشروع بتشتغل عليه
وبالتالي لو عندك استعداد لكده هتلاقي ثقافتك العامة وقدراتك على التواصل جوه وبره إطار المهنة وفهمك للعالم بشكل عام بيزيد، لكن لو عايز تقفل على نفسك وتذاكر وتمتحن في اللي ذاكرته بس فالعمارة بالتأكيد مش المجال المناسب لك
نيجي للسؤال الشائع عن الفرق بين قسم عمارة في هندسة وفي فنون جميلة: العمارة عموما في مكان وسط بين الهندسة والفنون عشان كده موجودة في الكليتين، الفرق في الدراسة بسيط وكله في السنة الإعدادية اللي هي في فنون جميلة ألطف شويتين لو انت مش بتشاور عقلك تدخل تخصص هندسي تاني
لكن باختصار في النهاية هي نفس الشهادة ونفس التخصص في النقابة ونفس القيمة في سوق العمل (مع ملاحظة ان دي مهنة فيها تفاوت كبير في المرتبات من أول ما تتخرج عشان اللي بيفرق هو إمكانياتك ومهاراتك وخبراتك انت شخصيا أكتر من شهادتك والجامعة اللي اتخرجت منها)
أخيرا لو ناوي تهاجر أو تشتغل بره (باستثناء الخليج) خلي بالك ان معادلة المعماريين لها سكة تانية أطول وأغلس من باقي المهندسين عشان تبقى "معماري معتمد" وتاخد ترخيص بمزاولة المهنة إلا لو شهادة جامعتك بتعادل RIBA البريطانية وده بقى موجود دلوقتي بس في جامعات قليلة.
شكرا.
شكرا.
جاري تحميل الاقتراحات...