من فترة طويلة كنت أعاني من مشكلة كبيرة في تنظيم وقتي والالتزام بمواعيدي دايمًا أكون متحمسة لبداية أي مشروع أو فكرة، لكن مع الوقت الحماس يخف والالتزام يصير صعب، او انو مزاجي ونفسيتي تتحكم في انتاجيتي وبسبب هذا الشي كنت أشوف مشاريع وأهدافي تتعثر بسبب قلة الانضباط، وكان هذا الشيء محبط جدًا.
قررت في يوم من الأيام إني لازم أغير هذا الوضع بدأت أبحث عن طرق وأساليب تساعدني أكون أكثر التزام وانضباط قرأت كتب، تابعت دورات، واستفدت من تجارب اشخاص منضبطين وملتزمين وحبه حبه بديت أطبق بعض النصائح والأساليب اللي لقيتها فعالة وتناسب شخصيتي واسلوب حياتي.

أول شيء سويتو هو تحديد أهداف واضحة ومحددة كنت أكتب أهدافي بشكل دقيق ومفصل وأحدد لها مواعيد نهائية هذا ساعدني أعرف ايش اللي أبغى أوصل له وكم الوقت الي عندي عشان أحققها.
ثاني شيء هو إنشاء جدول يومي بديت أخصص وقت لكل نشاط أو مهمة خلال يومي كنت أحرص على توزيع الوقت بشكل متوازن وأعطي لكل مهمة وقت كافي بدون ما أضغط على نفسي الجدول اليومي ساعدني أكون منظمة وألتزم بمهامي بدون تأجيل.

ثالث شيء هو تبني عادات صغيرة وبسيطة كنت أبدأ بأشياء صغيرة زي اني اصحى بدري، امارس رياضتي، اقرأ يوميًا مع مرور الوقت، دي العادات الصغيرة صارت جزء من روتيني اليومي وساعدتني أكون أكثر انضباط.
رابع شيء هو المرونة والتكيف كنت أحرص على إني أكون مرنه مع نفسي، وما أضغط عليها إذا سار شي غير متوقع أو اضطريت أغير خطتي المهم هو إنو الالتزام يكون مستمر حتى لو اضطريت أعدل أو أغير بعض الأمور.

خامس شيء هو التحفيز الذاتي كنت أحرص على إني أكافئ نفسي بعد تحقيق أي هدف أو إنجاز، حتى لو كان صغير هذا الشيء يعطيني دافع وحافز أكبر للاستمرار.
بفضل ربنا واتباع هذه الأساليب قدرت أكون أكثر التزام وانضباط في حياتي الشخصية والمهنية وشفت كيف حياتي بدأت تتحسن ومشاريعي تصير أكثر نجاح.
الالتزام والانضباط مو شيء يجي بيوم وليلة هو نتيجة جهود وتدريب مستمر ومع الوقت، بتشوف كيف إن دي العادات بتصير جزء منك وبتساعدك تحقق كل أهدافك.✅