لن امل من ذكر افكار ( معظمها مطبق بالخارج ) لمصر عسى ان يولى الله من يصلح وينفذها ، واليوم لثانى مرة هاتكلم عن المقابر بمصر وللاسف الدوله مشاركه فى النصب على المواطنين لبيع قطع اراضى فضاء لتقسيمها الى مقابر واحواش حتى ان بعض الاحواش وصل ثمنه لملايين ويباع مع الفيلات والمدفن الفقير لا يقل ثمنه عن ٣٠ الف جنيه فى افضل الاحوال فضلا عن ان معظم المقابر بمصر دخلت فى الحيز العمرانى والسكنى لان مصر من ٧٠ سنه فقط كانت فى حدود ٢٠ مليون والان ١٢٠ مليون ومتوقع خلال ٥٠ سنه كمان توصل ٢٠٠ مليون او ربع مليار ؟ طيب الحل اية ؟
الحل معروف ومطبق بالعديد من البلاد وحتى يناسب مصر لابد من تطويرة فيتم عمل مقابر بالصحراء على بعد مناسب فى الصحراء المجاورة لكل محافظه وتكون تابعه للحكومه ويتم الدفن فيها للجميع الغفير مع الوزير مع الرئيس ويحاط بها اسوار عليها حراسه وصاله استقبال وعزاء وحمامات وكافيتريات وعند حدوث حاله وفاة وبمجرد اصدار تصريح الدفن اليا عن طريق الانترنت يتم ابلاغ المقبرة به لتقوم بارسال عربية نقل الموتى على العنوان مقابل رسوم بسيطة يتم دفعها فى استخراج تصريح الدفن ولنفترض ١٠٠٠ جنية ستقوم الحكومه بجمع ٦٦٠ مليون جنيه سنويا وهيا كافية لشراء وتشغيل عربية نقل الموتى ومصاريف الحفر والدفن والحراسة والمقابر القديمة تقوم الدولة بايقاف الدفن بها لمده عامين حتى تتحلل الاجساد ومن ثم تستولى الحكومه عليها مقابل راس المال الاساسى الذى تم ضخه لانشاء الاسوار والعماله والترتيبات وتكون هناك خطوط مواصلات يومية للمقابر لمن يرغب بالزيارة وبذلك نكون ساوينا بين الناس ورفعنا التكلفة عنهم والحرج فى ظروف صعبه كفقدان الاحبه والاهل بالوفاة ، فى المتوسط يموت حوالى ٦٣ شخث يوميا بكل محافظه بمصر مع اختلاف الكثافة يعنى القاهرة ممكن ٥٠٠ وشمال سيناء ممكن ١٠ فقط فيتم تحديد المساحات والعربيات حسب كل محافظة وننتهى من قصة الاحواش الغريبة والدفن الغير اسلامى دة خالص ، ومافيش اى نص بالقران بيقول ان نقل المقابر حرام والى اشترى مقبرة هوا كاتب العقد ( تمليك حتى يوم القيامه )

ولو الدوله مش عاوزة تدخل بالموضوع تقوم بطرح الفكرة على مستثمرين وتمنحهم الارض مجانا بشرط الالتزام بالرسوم المقررة للدفن وتكون متساويه للجميع والدوله من ستدفع للمستثمر لان الدفع فى مكتب الصحه مع تصريح الدفن وتخيل نفسك مستثمر هاتاخد مثلا ٥٠ الف متر مربع هاتعمل سور ارتفاعه مترين وتعين شوية عمال ولودر كيت كات الصغير دة للحفر والردم وكام واحد حراسه يوميا على الاقل هاتدفن ١٠٠ واحد يعنى ١٠٠ الف جنيه يعنى تقريبا ٣ مليون شهرى بالسنه تعمل ٣٦ مليون ايرادات بخلاف الكافيتريا والمية والساقع والسخن وكمان ممكن تقدم خدمات اضافيه كقراءة القران على المدفن ( اللحد ) بواسطه قراء معتمدين وشراء ورود وزعف على القبر وكمان تاجير اوتوبيسات لنقل المعزين يعنى الكل كسبان
الحكومة ؛ استولت عالمقابر القديمه مجانا
الشعب : ارتاح من التفكر بشراء مقبره
المستثمر : هايكسب مليارات بدون مجهود

وبكدة رفعنا الحرج عن ملايين الفقراء بمصر وملايين الناس تستخدم مقابر منذ١٠٠ عام حتى ان المقابر تكدست واخر مرة مات لنا قريب ماكناش عارفين نعمل اية لان كان واحد مدفون من اقل من شهر ومافيش مكان وهاتبقى تكلفة الدفن والموت كلها ١٠٠٠ جنيه حتى لوالفقير مش معاه فلوس اى جار هايدفعها او الجيران يدفعوها وخلاص ولا تشترى قرافة ولا قصة