رتبها

🔴 قطع الكهرباء .. إنتهاء مرحلة تخفيف الأحمال وبداية مرحلة الأعطال الفنية لماذا تٌصر الحكومة على خداع المصريين ؟!
#ثريد_مهم
إمبارح كان اليوم الأول لوقف قطع الكهرباء وإنتهاء خطة تخفيف الأحمال اللي أعلنته الحكومة ، تابع الثريد دا و إنت هتتأكد إزاي الحكومة بتخدع المصريين بطريقة وبتلعب عليهم لعبة كبيرة .

2- من 5 أيام رئيس الوزراء الدكتور مصطفى مدبولي خرج في مؤتمر صحفي يزف للمصريين البشرى العظيمة .. الحكومة أخيراً قررت وقف قطع الكهرباء وايقاف خطة تخفيف الأحمال بداية من الأحد 21 يوليو إلى منتصف شهر سبتمبر .
وبعد ما فرح الناس بهذا القرار العظيم رجع وقال بس وقف تخفيف الأحمال مش معناه ان الكهرباء مش هتقطع تاني لأ دي ممكن تقطع تاني بس بسبب المشاكل والأعطال الفنية.

3- وجاء اليوم الموعود لتشغيل الكهرباء بلا انقطاع الأحد 21 يوليو ولكن دا لم يحدث وفوجئ المصريين بإستمرار قطع الكهرباء بالرغم من وعود الحكومة بوقف القطع .. و وثق عدد كبير من المواطنين من محافظات مختلفة استمرار قطع الكهرباء ونشروا فيديوهات على حساباتهم بمواقع التواصل الإجتماعي بيشتكوا فيها من اللي بيحصل فضلا عن الكلام اللي كتبه الكابتن أحمد حسام ميدو وبيشتكي فيه هو كمان من نفس المشكلة !

3- وبعد ما الناس وثقت إستمرار قطع الكهرباء علي مدار اليوم خرج المتحدث الرسمي بإسم وزارة الكهرباء الدكتور أيمن حمزة وقال في مداخلة مع أحمد موسى مجموعة من التصريحات المستفزة
▪️ نفذنا وعد رئيس الوزراء و وارد يحدث إنقطاع بس مش تخفيف أحمال
▪️ قطع الكهرباء اليوم سببه زيادة الاستهلاك وسرقة التيار
▪️ما يحدث من انقطاع نتيجة عطل طارئ وليس تخفيف أحمال
▪️ قطع الكهرباء السبب فيه هو ارتفاع درجات الحرارة وليس تخفيف أحمال
ودا يأكد لك إن الحكومة بتعامل المصريين بمبدأ هتيجي لي يمين هجيلك شمال .

4- النهاردة الموضوع إختلف ومن أول اليوم مسؤولين وزارة الكهرباء و وزارة البترول شغالين تصريحات إن إستهلاك الكهرباء سجل أعلى مستوياته في تاريخ مصر والبترول بتقول إن استهلاك المحطات للوقود سجل برضة النهاردة رقم قياسي و كأن العادة بقت إن المصريين يعيشوا بلا كهرباء ويوم ما يشغلوها يطلعوا يمنوا على المواطن ويذلوه بتصريحات من نوعية إنتوا بتستهلكوا كتير بالرغم من إنهم تأكيداتهم المستمرة إنهم جاهزين لوقف تخفيف الأحمال وعندهم 15 ألف ميجاوات احتياطي بالشبكة .

5- الجزئية الأخطر واللي لم ينتبه لها أحد إنه أمس صندوق النقد إستبعد مصر للمرة التانية من جدول أعماله وأجل موعد صرف الشريحة الثالثة من قرضه لمصر واللي قيمتها 820 مليون دولار بسبب شروط الصندوق علي مصر واللي من ابرزها تحريك أسعار المحروقات والكهرباء والاتجاه للدعم النقدي بدل الدعم السلعي ولمن لا يعلم فالتأجيل دا حصل قبل كدا من 12 يوم تقريباً وبالتحديد يوم 9 يوليو ولما حصل التأجيل دا وقتها خرج رئيس الوزراء مصطفى مدبولي وقال ان هيحصل تحريك في أسعار المحروقات والكهرباء ومدبولي كان بيوجه الرسالة دي ضمنياً لصندوق النقد أكتر من كونها رسالة للمصريين .

6- ولكن تبقى المعضلة ان صندوق النقد بيشترط على الحكومة المصرية انها تحرك أسعار الوقود والكهرباء وتخفض الدعم بشكل عام والحكومة لسة منفذتش الشروط دي علشان كدة الصندوق أجل مناقشة صرف الشريحة التالته من القرض مرتين وهنا الحكومة بتستغفل المصريين وبتعمل حركة رخيصة أوي وهي انها مش هتقدر تزود أسعار الوقود والكهرباء والمصريين في قمة الغضب بسبب الكهرباء اللي منكدة عليهم عيشتهم وبالعكس دا لو فكرت تاخد قرارات زيادة الاسعار في ظروف قطع الكهرباء وحالة الغضب اللي عند المصريين دا ممكن يتسبب في اضطرابات اجتماعية و سياسية في البلد

7- فتقوم الحكومة تقرر تأجيل قطع الكهرباء لمدة شهرين و في خلال الشهرين دول نرفع أسعار المحروقات والكهرباء ونكون أخدنا الشريحة الثالثة من قرض صندوق النقد بعد ما نفذنا شروطه وبعد ما الناس تنسى وتكون اتأقلمت مع موضوع زيادات الأسعار في خلال الشهرين دول نرجع ان شاء الله نقطع الكهرباء تاني من منتصف شهر سبتمبر ويطلع يقول رئيس الوزراء أنا قايلكم اننا هنرجع نقطعها من نصف سبتمبر

8- الخلاصة .. الحكومة بتلعب لعبة كبيرة على المصريين رجعت تشغل الكهرباء علشان الفترة اللي جاية هترفع سعر الوقود والكهرباء ومقدرتش تآخد قرار الزيادات دي في ظل غضب المصريين من قطع الكهرباء فأخدت قرار مؤقت بوقف تخفيف الأحمال علشان تهدي المصريين ومن الناحية التانية هتزود أسعار الكهرباء والوقود وهتكون ضمنت الشريحة التالتة من قرض صندوق النقد بعد ما نفذت شروطه وبعد ما المصريين يكونوا إتأقلموا و عدى موضوع الزيادة بدون أي احتجاجات أو قلق هترجع تقطع الكهرباء تاني علشان توفر الغاز و رئيس الوزراء هيطلع يقول وقتها أنا نفذت وعدي و وقفت قطع الكهرباء من منتصف يوليو لمنتصف سبتمبر بس الظروف العالمية أقوى مننا وتعيش إنت يا مواطن وتاكل غيرها .

4-
x.com