من المفاهيم اللي ناس كتير مش عارفاها في عالم الستارتابس هو ال liquidation preference. الموضوع دة يقدر يخلي شركة اتباعت بملايين أو حتي مليارات بعد سنين شغل والمؤسسين مياخدوش ولا مليم وتكتشف إن كدة الشركة منجحتش. ثريد صغير هيغير طريقة قرايتك لأخبار exit الشركات.
لما شركة بتاخد استثمار بتمضي علي حاجة اسمها liquidation preference ، دة شرط في العقود بيقول إن في حالة بيع الشركة قبل ما نوزع أي فلوس هنرجع الأول من تمن البيعة الفلوس اللي المستثمرين حطوها. واللي يفضل بعد كدة هو اللي يتوزع عالمساهمين علي حسب حصصهم بما فيهم المستثمرين.
مثال: شركة اخدت ٢٠ مليون استثمار من مستثمر اخد ٢٥٪ من الشركة والباقي فضل مع المؤسسين والموظفين. الشركة اتباعت ب١٠٠ مليون. أول ٢٠ هيرجعو للمستثمر وال٨٠ اللي فاضلة هتتوزع والمستثمر هياخد منها ٢٥٪ اللي هي حصته يعني ٢٠ مليون كمان. في الحالة دي المستثمر خد ٤٠ مليون من تمن البيعة.
طب نتخيل إنها بدل ما تتباع ب١٠٠ اتباعت ب١٥ مليون. في الحالة دي ال١٥ مليون كلها هتروح للمستثمر والمؤسسين والموظفين مش هياخدو حاجة لأن لسة ال٢٠ مليون مرجعتش كلها.
وعشان كدة مهم جدا لما تقرأ خبر إن شركة اتباعت خصوصا لو برقم كبير انك تخش تدور هما أصلا كانو واخدين كام استثمارات. شركة اتباعت ب٣٠٠ مليون رقم جميل بس واخدة ٧٠٠ مليون استثمارات غالبا المؤسسين والموظفين طلعو بولا حاجة.
وعشان كدة في نصيحة too much capital could harm you انت كل مرة شركتك بتاخد فيها فلوس دة بيعلي الرقم اللي الشركة محتاجة تتباع عنده عشان يطلع أي حاجة للمؤسسين والموظفين وكمان المستثمرين اللي مش عايزين فلوسهم بس عايزين عائد عليها وإلا كانو حطوها في البنك احسن.
دة كل دة وأنا شرحت بمثال إن الliquidation preference = 1X في مستثمرين بتبقي ممضية الشركة علي 2X أو 3X عشان يضمن عوايده في حالة البيع. يعني يديك ٢٠ مليون ويمضيك إن اول ٤٠ أو حتي ٦٠ مليون من أي بيعة هتروحله قبل ما نوزع أي حاجة علي حسب النسب. دة بيحصل اكتر مما نعتقد. تمت.
جاري تحميل الاقتراحات...