رتبها

انا عندى كذا تعليق ع الكلام ده..
خلونا نتكلم شوية ف الثريد ده، لاننا محتاجين نتكلم، ومحتاجين واقفه شوية!!
بس قبل ما ابدأ الثريد محتاجه اقول ان كلامه ده ولا من الدين ولا من العقل والمنطق ولا صحي؛ علشان تبقوا عارفين الثريد رايح ف انهه سكه علشان تتجاهلوه من البدايه لو مش عاجبكم…

هو تقريبًا اتكلم ف ١٩ قول ٢٠ نقطه..
قبل ما نمسكهم نقطه نقطه نكنسلهم كلهم محتاجين نتكلم ف نقطتين الأول..

الأولى:
متاخدش نصايحك من الناس ده!
كلمتين بيكررهم لكل الناس من غير ما يعرف ظروفهم/يراعي اختلافاتهم/اهدافهم وطموحاتهم..
علشان تاخد نصيحه تفيدك ف شغلك/حياتك محتاج نصيحه متفصله ع مقاسك، شبهك وشبه ظروفك، ده مش هتاخده من واحد وظيفته انه بياكل عيش ع قفاك مش همه مصلحتك ولا يعرفك اساسًا!

التانيه:
انت مين؟ انت هنا ليه وبتعمل ايه وربنا خلقك ليه؟
اسئلة كتيرة اوى محتاج تجاوبها الأول، لما توصل لإجاباتها هترتاح وبالك هيهدا ومش هتتحول لتور ف ساقيه وتبقى عبد للرأسماليه..
الحياة هتبقى أحسن/اهدا كتير لما تحدد أولوياتك وتعرف انك انسان مش آلة .. وربنا وهبك عقل وعاطفه..

لو الفلوس/ منصب ما هم هدفك فأنت محتاج تراجع نفسك وتراجع أولوياتك!!
الفلوس/السلطة/المنصب مجرد أدوات علشان تمكنك من حاجه معينه/توصلك لهدفك الأسمى -اللى انت لازم تحدده قبل ما تدور زى التور من غير هدف- واللى لازم تبنيه على اساس صحيح ع اساس ديني -أيًا كان دينك- وعقلاني..

كواحده جربت تعيش ك تور و ك آلة والحمدلله وصلت لإنها عرفت ازاي تعيش كإنسانة..
محتاجه اقولك انك لازم تقف..
تاخد نفس! وتشوف مين بيشيّر الكلام الأهطل ده..
هل شوفت رجل أعمال كبير او حد ناجح فعليًا ف حياته بيشيّر الكلام ده وبيقولك ايوه يشباب اعملوا كده؟
ولا شباب الجامعات المتحمس…

اللى لسه مأدركش سبب وجوده ف الحياه..
ولا هو عايز منها ايه..
ولا لو بقى معاه فلوس كتييير اوى وجاب الڤيلا والعربيه اللى بيحلم بيهم واشتغل ف التداول واتعلم الماني وبرمجه واشتغل كاشير بعد الضهر علشان لما يحكي قصة نجاحه ف بودكاست بعد كده يلاقى حاجه يقولها، ماذا بعد؟ هيعمل ايه بعد كده؟

هل الشغل هو الهدف؟
هل التعليم هو الهدف؟
هل العربيه هى الهدف؟
ولا دول الادوات!!
لو دول تحولوا لأهداف .. هتبقى انت الأداة، ومش ده الأصل!
الأصل، انك انت الهدف، صحتك الهدف، انك تكون كويس تعيش كويس، تتبسط، تعبد ربنا وتوظف كل أدواتك ده علشان تدخل الجنة هو ده الهدف..

هل كلنا محتاجين نتعلم ألماني؟
فيه ناس اتخلقت علشان تبقى مبرمجين وناس اتخلقت علشان تبقى دكاترة ف وحدات صحيه ف قرى محدوفه مش واصلها مايه وكهربا علشان الناس هناك محتاجاها..
وناس اتخلقت علشان تبقى موظفين حكوميين بس! وده ف حد ذاتك نجاح هم مش محتاجين اكتر من كده علشان يبقوا مبسوطين..

هل انت عارف اصلًا ايه اللى هيخليك مبسوط؟
ولا عماد مأكدلك انك لو اتعلمت ألمانى وبرمجه وهاجرت، ونزلت من الطياره لقيت البنات مستنيينك بالمايوهات وفى ايديهم ازايز الخمرا ده اللى هيخليك مبسوط؟
على فكرة المصيف ف مطروح أحسن بكتير من الساحل -حسيت انى محتاجه اقول كده بدون مقدمات، عديها-

أي حياة ده وأي عيشه اللى تخليك شغال ١٦ ساعه وساعتين gym وساعتين كورسات والاربع الساعات الباقيين حضور إيڤنتات بقى ومش هتتجوز ومش هتكون صداقات؟؟
وبعدين؟
هتعيش امتى وهتتبسط بشبابك امتى؟!
ف التلاتينات؟ ويت! انت جايب الثقة منين انك هتعيش لحد التلاتينات اصلًا!! صاحب البوست هيضمنلك ده!

ليه؟
افرم نفسى علشان ايه؟ ليه مشتغلش بهدوء وانظم وقتى صح ووقت العمل للعمل ووقف الراحه للراحه بس ووقت الخروج والانبساط للمتعه بس ووقت الأكل آكل براحتى ووقت العبادة اتعبد بضمير؟!
ايه مشكلة ال work life balance ولا انت فشلت فيها ف عايز الناس كلها تفنى شبابها ف الشغل شبه التيران بس!!

بيعطل عن ايه؟؟
هو الهدف من البوست ده ان اللى بيقرأه يوصل لإيه؟؟
مفيش اى مراعاة لاختلافات الناس وان احتياجنا للجواز مش واحد وان الجواز بدري مستحب علشان تعف نفسك وان فيه ناس متعرفش تنجح غير ومعاهم partner بيشجعهم وينجحوا سوا!
كلام مايع .. عديم القيمة .. ميناسبش كل الناس

كلام طبقي سخيف..
ال toxic work environment عمرك ما هتنجح فيها ولو الشغل بتاعك بيديك negative vibes وانت مش مبسوط انت عمرك ما هتعلى للطبقه اللى فوقك -لو ده هدفك يعنى-
فانت حتى لو ابوك مش مليونير انت محتاج بيئة صحيه وشغل آدمي، علشان ازمة الطبقيه قول المصطلحات بالعربي هتظبط معاك…

انت ممكن بدل ما تقفل الانستجرام بتاعك تتعلم الرضا..
اصل اللى هتشوفه ع الانستا لو انت عيّل صغير بيشبط وبيعيط لما بيشوف حاجه ف إيد غيره ف هتقابل ده ف الواقع برده، يعنى مثلًا ممكن تكون رايح الشغل مشي وتعدي من جمبك حته فيراري عادى كده ف يوم مشمس..
ومن هنا ايقنت انه بيخاطب المراهقين!

والله ما شرط!
والله ما للدرجة ده..
وفيه tools كتيرة اوى هتساعدك انك تأدي المهمه اللى بالانجلش اللى شغلك طالبها منك، وممكن شغلك ميحتاجش ده 🤷🏻‍♀️
ممكن تكون محتاج تعرف ت search بس بالانجليزى والباقى سهل، ممكن تكون محتاج اتعلم لغة تانيه، وممكن تكون محتاج تفهم بس اللى قدامك وخلاص شكرًا..

اععععععع
نفس الخطاب الديني ال٣٠ ثانيه اللى بيخللى العيال الصغيرة تلحد لما تصلى وبعدين احلامها متتحقش او تسعى ومتتوظفش او تذاكر ومتنجحش..
بعد ما تفرم نفسك ف الشغل وتجرب وتجازف كتير وتخسر فلوسك، فى الآخر التلاتينات متبقاش رايقه وتشتغل مُبرمج ومتقبضش ١٠٠ الف ج ف الشهر .. ههه البس

بلاش حماس سنة اولى جامعه.
بلاش تصدق كل اللى بيتقال.
فلتر الكلام ومرره على عقلك وعلى مبادئك الاول.
رتب أولوياتك وحدد اهدافك .. واحتياجاتك.
اتق الله فى نفسك/شغلك/صحتك علشان هتتسئل عليهم يوم الحساب.
اعمل بلوك لصاحب البوست وامثاله..
وبس كده .. ربنا يهدينا للخير وينفع بينا .. وشكرًا

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد