أنا عامله الدكتوراه في بريطانيا، وقت القبول اعفوني من اختبار الIELTS لاني كنت قبلها شغالة في بيئة عمل كلها لغة انجليزية.. احتجته اعمل IELTS فيما بعد عشان اجراءات الهجرة لي كندا.. امتحنته من غير دراسة وجبته 7.5.. وحسب موقع IELTS الزول اللي لغته الام انجليزي متوقع منه يجيب 7.5.. لاسباب نقاط الهجرة كنت محتاجة ارفعه لي 8.. عملته حاجات كتيرة ودراسة مكثّفة لمدة شهر وجبته 8.5.. اخدته الدرجة الكاملة في الreading والlistening.. ومن يومها، بنصح اي زول عايز يجيب درجة كويسة بالحاجات التالية:

١- الامتحان ده ما امتحان لغة وبس، امتحان سرعة! اغلب الناس بشتكوا انهم ما بقدروا يكمّلوا الاسئلة كلها.

٢- مشكلة الIELTS في تعدد المصادر، اكتر حاجة ساعدتني كانت اني ركّزته على مصادر كانت ممتازة.. خاصة لبعض انواع الاسئلة الكنت بحسها بتلخبط. اهم مرجع للقصة دي هي قناة يوتيوب رهيبة ومشهورة جدا اسمها IELTS Liz، دي ساعدتني للreading and listening

٣- بالنسبة للجزء بتاع الكتابة، في موقع متخصص بس في الموضوع ده وبشرح انواع الwriting الممكن تجيك في الامتحان وكل واحده فيهم كيف تكتبها بترتيب معيّن وبالتالي تجيب درجة كويسة، الموقع مجاني بالكامل وعنده خيار اشتراك بي دولار واحد في مجموعة في فيسبوك، فيها شوية افكار اضافية، عنوان الموقع ieltsadvantage.com

٤- التدريب، والهدف منه التعوّد على الاسئلة، وفي نفس الوقت التعوّد على سرعة الحل.. افضل طريقة هي كُتب Cambridge البكون فيها تقريبا خمسة امتحانات حقيقية سابقة مع إجاباتها، دي بتعوّد الواحد على طريقة الاسئلة، وبعد شوية ممكن تظبط الtimer وتحاول تحسّن من زمن اجابتك، عشان تقدر تخلّص الامتحان بإجابات صحيحة والوقت يكفّيك..

٦- حقيقي ما بقدر افتي في موضوع ال speaking لانه ما كان عندي فيه مشكلة، من المره الاول كنت جبته فيه 8.. لكن في فيديوهات مفيده في يوتيوب بتشرح وتدي امثلة.

٧- يوم تاني ممكن اكتب عن انواع الاسئلة .. بس اول عايزه اتأكد انها لازالت نفسها ولا اتغيّرت.. بس المصادر الجبتها ليكم دي، صالحة دايما…
والله من وراء القصد.