🔴 المصريون في الخارج "المغتربين" .. ومحاولات مستمرة من كل مسؤولين الدولة لتقليبهم !
#ثريد
النهاردة عاوز أتكلم عن موضوع في منتهى الأهمية بقالي فترة ملاحظه لأنه زاد عن الحد بشكل مبالغ فيه وهو " تقليب المغتربين والمصريين في الخارج " واللي على ما يبدو إنه بقى توجه عام عند كل مسؤولين الدولة واللي بقى شغلهم الشاغل إزاي نطلع من المغتربين بأي مصلحة يكون فيها دولارات أو ريالات أو يوروهات .. تابع الثريد دة و إنت هتتأكد بنفسك .

1- البداية كانت من 5 أيام لما خرجت النائبة ريهام عفيفي عضو مجلس الشيوخ بإقتراح لوزارة الهجرة و وزارة التعليم العالي إنهم يطلقوا مبادرة لزيادة نسب قبول الطلاب المصريين من الحاصلين على شهادة الثانوية العامة من الخارج في الجامعات المصرية مقابل دفع وديعة دولارية يتم استردادها بعد انتهاء الدراسة نهائيا بمعنى أدق لو إنت إبنك مصري ودرس ثانوية عامة برا مصر وحب يرجع يدخل جامعة في بلده مصر تدفع له وديعة دولارية ومتاخدهاش إلا بعد ما يخلص جامعة .

2- وفي يوم 31-5-2024 أعلنت وزيرة الهجرة السفيرة سها جندى عن توفير وزارة الهجرة لصكوك أضاحي للمصريين في الخارج لكن الدفع بالدولار أو اليورو ومن يومين بتاريخ 9-6-2024 خرجت نفس الوزيرة تقول للمصريين في الخارج إن دار الإفتاء طلعت فتوى تبيح لكم إنكم تضحوا داخل مصر حتى لو إنتوا في الخارج ونشرت أرقام حسابات علشان يحولوا عليها الفلوس وأهم حاجة بالدولار أو اليورو !

3- وفي يوم 17-12-2023 نقابة أطباء الأسنان أعلنت إنها لن تقيد الطلبة المصريين اللي درسوا طب أسنان في جامعات الخارج قبل ما يقوموا بسداد مبلغ 2050 دولارًا و إن دا بقى من ضمن اشتراطات القيد للسنة الأولى في نقابة أطباء الأسنان بعد قرار الجمعية العمومية العادية للنقابة !

4- وطبعا لا ننسى الهبرة الأكبر للحكومة و هي إعلانهم في 30-7-2023 عن مبادرة تسوية الموقف التجنيدي للمصريين في الخارج واللي بدأتها الحكومة بـ 5000 دولار أو يورو وبعد كدة أعلنت زيادتها لـ 7000 دولار أو يورو في 1-5-2024

5- كمان فيه تحقيق وقح جدا نشره موقع صدى البلد بتاريخ 28-10-2022 بعنوان مصادر دولارية جديدة من المصريين بالخارج وبيتكلم عن المبادرات الي طرحتها الحكومة لتقليب المغتربين وبيقول التحقيق تحاول الدولة المصرية إيجاد حلول عديدة ومصادر دولارية جديدة للتخفيف من أزمة شح النقد الأجنبي في البلاد ومن أهم هذه المصادر تحويلات المصريين بالخارج وإنهم في سبيل الحصول علي الدولار من المغتربين عملوا مبادرة ليهم بالسماح باستيراد سيارات بدون جمارك، مقابل وديعة دولارية، وطرح أراضي ووحدات سكنية مميزة ليهم في العاصمة الإدارية وغيرها من المدن ولكن البيع بالدولار دا غير إن الحكومة أعلنت وقتها عن إمكانية إنشاء شركة مساهمة للمصريين بالخارج وطبعا كل دا بيحصل في سبيل أي دولارات ممكن يقلبوها من المغتربين !

6- طبعا دا غير قرار رفع رسوم إصدار جواز السفر اللي أقره السيسي في 15-3-2024 وبموجب القرار سعر إصدار جواز السفر للمغتربين خارج مصر بقى بـ 440 يورو للجواز الجديد بدل من 345 يورو وللجواز البدل فاقد 655 يورو بدل من 470 يورو .

7- ولا ننسى أيضا المقترح البرلماني العجيب لوكيل مجلس الشيوخ المصري المستشار بهاء الدين أبو شقة واللي طالب فيه بإيجاد منظومة قانونية تُنظم تحصيل نسبة مئوية مما يحصل عليه المقيم بالخارج من دخل معتبرًا أن هذا حق الدولة اللي علمته وكبرته وخرجته عشان يحصل على ما يريد من الخارج .

8- والحقيقة الشاهد المشترك بين كل الأخبار و المبادرات دي إن مسؤولين الدولة كلها من أكبر واحد لأصغر واحد مبيفكروش غير في إنهم إزاي يقلبوا المغتربين وياخدوا منهم فلوس بالظبط زي اللي بيحصل في المصريين اللي عايشين داخل مصر .. عصابة بتحكم بلد وعمرها ما بتفكر غير إنها إزاي تقلب الناس ومش مهم بقى إنت عايش برا أو جوا المهم هتتقلب و هتدفع !