محرك اللاندكروز واللكزس الجديد V6 "التيربو"
بين فتره وفتره قاعده تطلع له مقاطع تخبيط وكلها تقريبا نفس المشكلة عطل بسبيكة الكرنك
وكنت افكر بأكثر من احتمال منها "نوعية الزيت"
لكن بالاخير اعلنت تويوتا عن المشكلة وانها بقايا من الآت التصنيع بعد فتره تسد مجاري الزيت وتسبب الاحتكاك

انسداد مجاري الزيت يبدأ من الطرمبة وبعدها إلى باقي مجاري البلوك
ونقص الزيت عن اجزاء المحرك يعني احتكاك وتخبيط مهما كانت نوعية الزيت
يبدو ان تويوتا عالجة المشكلة من فتره بخط الانتاج لذلك بتحصل موديلات ال2023-2024 قليل فيها هذا العيب

معالجة الخطأ المصنعي للأسف في الغالب بيكون بتغيير "نصف محرك" مثل اللي بالصورة ⬇️ً
وهذي موجوده عند تويوتا وبعض الشركات بيع نصف محرك عبارة عن "بلوك وكرنك وبساتم"
مشدودة شدة المصنع يصير بس يركبون الرؤوس وباقي اكسسوارات المحرك

للاسف توقعت المحرك بيكون خالي من العيوب الكبيرة بما ان سبق وتجربته من 2018 على الLS500
لكن هذي ايضا من نتائج عدم تجربة السيارة بشكل كافي من خبراء "مننا وفينا" موب تجارب الخواجات
لأن منطقة الخليج تقريبا هي اكثر دولة تستعمل اللاندكروز
والمفترض الاختبارات تكون بالسعودية وبعز الصيف لأن ايضا يبدوا ان هناك تقصير بالتبريد خصوصا التيربو
والتجربة الصحيحه تكون على ثقافة اغلب مالكي اللاندكروز واستعمال الزيوت الثقيله والغير مناسبه والتاخير على الزيت .. إلخ
لكن بشكل عام دائما حاول تتجنب اول كم موديل من اي جيل جديد لأي شركة
والله يعوض اصحابها

بالنسبة للأشخاص اللي يقولون التيربو ما ينفع في اجواء الشرق الأوسط وانه غير عملي
هالكلام ماهو صحيح 100٪، اذا صنعت الشركة المحرك بشكل متقن وتبريد ممتاز
ما راح تواجه مشاكل تذكر
ومحركات التيربو موجوده من سنين على سيارات عسكريه ومعدات اخرى اعمارها فوق ال30 سنه وشغاله بشكل ممتاز

محركات الديزل تكاد لا تخلو من التيربو وتعتبر من المحركات اللي اعمارها دبل اعمار محركات البنزين "التنفس الطبيعي"
نعم نقدر نقول بشكل عام محركات التنفس الطبيعي افضل
لأن اي شي اضافي تضيفه للمحرك راح يكون عبء عليك بالصيانه في المستقبل
لكن بالمختصر تقدر تصنع محركات تيبرو جيده

السبب اللي مخلي الناس شابين على تويوتا سواء عندنا او حتى في امريكا
لأن حصل عندهم استدعاء على نفس المحرك الموجود على السكويا والتندرا
الناس شارين وهم في بالهم انها تويوتا وفي ومستحيل تكون فيه مشكله كبيره
لكن غلطة الشاطر بعشرة .