هتعمل ايه لو شفت مريض بيتشنج قدامك أو مريض قدامك جاله نوبات صرع لازم تعرف ان المعلومة الصحيحة مع التصرف الصحيح هيفرقوا مع المريض جدا وهتكون سبب في انقاذ حياته باذن الله مبدأيا كده لازم الهدوء وتجري تنادي على اي حد حوليك، أول حاجة هتبص على الساعة وتحفظ الوقت اللي بدأت فيه التشنجات
كويس وانك اهم حاجة تبعد المريض عن الخطر يعني لو المريض على طريق او جنب كهرباء او على السلم يتشال براحة ويتحط في مكان آمن وهتبعدوا مسافة عنه عشان يتنفس كويس ، طبعا لازم حد يبلغ الاسعاف وعلى ما يجوا حد هيجيب اي قماشة او مخدة ويحطها تحت دماغه عشان متتخبطش في الارض او حد يسند دماغه
ومحدش يحاول يكتفه او يمسكه بعنف عشان ميحصلش اي خلع في الكتف او اي اصابات تانية ، ممكن تلاقي المريض مبيتنفسش ولونه ازرق وممكن تلاقي ضهره متقوس ومقلوب وممكن تلاقيه بيعض لسانه وحرارته عالية ، مش هتعمله حاجة في المرحلة دي وسيب لسانه يتعض ومتحاولش ابدا تدخل لسانه جوه بقه بالقوة
واي اصابة لو حصلت في اللسان هتتصلح جراحيا بعد كده ( مرة طفلة عندنا في الطوارئ بباها الله يسامحه دخل لسانها بالقوة فاتقطع واتبلع في المعدة ) فبلاش عشان ميتكسرش الفك او ميتخلعش مفصل الفك معلومة مهمة جدا وخطأ شائع من الناس في الشارع بعد المرحلة الأولانية دي بيدخل في مرحلة من الترزيع
بيبدا جسمه يتنفض وممكن يدخل في مرحلة الترزيع دي من الاول كل عضلات جسمه بتنقبض وتنبسط بسرعة وبقوة وهنا بيبدأ يتنفس وبتلاقوا فيه رغاوي من بقه لو وقفت التشنجات هتحطوا المريض في وضع الافاقة على جنبه زي الصورة دي لحد م يوصل الاسعاف وياخدوه على المستشفى
مريض الصرع او التشنجات الحقيقية بيبقى في غياب كامل عن الوعي وهيحتاج يتعلقله جلوكوز وهيتحط على اكسجين ومحاليل أدوية للتشنجات لحد م هيفوق بعد فترة باذن الله ، لو مدة التشنجات تجاوزت العشر دقايق متواصلة دي علامة خطر وممكن المريض يدخل العناية المركزة عشان كده قولنا الوقت مهم جدا
آخر حاجة رجاء المريض ده ربنا ابتلاه بالمرض ده مش حاجة تعيبه ولا حاجة تقلل منه أبدا ولازم نكون جنب المريض في محنته عشان يقوم بالسلامة وعشان ربنا يسترها معانا ومع أولادنا واي مريض مصاب بالمرض ده يا ريت تخلي بالك من أدويتك كويس جدا وتتابع مع دكتور الأعصاب وتحافظ على المواعيد بتاعتها
كويس اوي مينفعش الدوا يقف فجأة لاي سبب من الاسباب ومينفعش أي مريضة حامل تاخد اي ادوية للتشنجات الا لما ترجع لطبيب النساء والتوليد وطبيب الأعصاب عشان التشوهات الخلقية ربنا يعافيكم ، ربنا يشفي كل مريض ويحفظكم ويحفظ حبايبكم من كل سوء يا رب ، انشروا الكلام ده وفيدوا غيركم ، دعواتكم
جاري تحميل الاقتراحات...