رتبها

ربي أنقذني من دين مع شركة الجميح
قبل خمس سنوات تقريبا في عام ٢٠١8
بقولك القصة وأنت أحكم⚖️
في رمضان عام ٢٠١8 م
كان معي كامري ٢٠١٢ م وماشية معي تمام ،
لكن العائلة كبرت وعيالي صاروا أربعة- الله يصلحهم ولكم- ، ولإني كثير التمشيات بالرياض والسفريات ، وكنت بسافر للباحة ثاني العيد ، فقررت اشتري سيارة جديدة عائلية تاهو أو يوكن .
فعلا ذهبت للمعرض وأول ما دخلت جذبني التاهو وكان فاتن وأول ما فتحت الباب ،، أووه جتني ريحة الوكالة ، وحسيت بشعور حلوو ، وركبت السيارة اعيش اللحظة .
واسع ، ومريح ، وشاشات ...
جاني موظف المبيعات وابتسم ابتسامة الصياد
وقال ( ماشاء الله والله لايقة عليك ) طبعا أنا صدقت
على طول سألته عن السعر والأقساط:
قال : شوف ترى فرصتك العرض بينتهي نهاية رمضان
ماذكر بالضبط العروض ولكن كان تقريبا <
-شهرين بدون قسط ( يعني تعّيد بدون خصم )
-خمس سنوات تأمين شامل .
-بدون كفيل .
-بدون دفعة أولي .
فوراً بدون تفكير قلت : متى أقدر استلمها ؟،
قال: جيب الأوراق خلال أسبوع والسيارة معك ..

ثاني يوم جهزت الأوراق، وصليت التراويح وبروح أخلص معه ..
وفي لحظة يقظة .. جاء في خاطري أفكر شوي ،
وتذكرت نموذج القبعات الست ، ولأني أدرب عليه ، قلت لنفسي الحين مشغل العالم طبقوا النموذج في قرارتكم وأنت ما طبقته !!
جلست بمكتبة الجامع وطلّعت ورقة وقلم وبسم الله :

الأولى :القبعة البيضاء (البيانات والمعلومات ):
١-كم راتبي
٢-كم القسط وكم سنواته ..وكم الدفعة الأخيرة .
٣-أملك كامري
٤-مستأجر
٥- ما أملك أرض ولا بيت
ووووو كتبت كل الأشياء التي تعتبر من البيانات المهمة.

ثانيا: القبعة الصفراء (الإيجابيات ) :
1-سيارة واسعة
2-ما يحتاج صيانة
3-ودق سلف وامشي.
4-وشاشات ووو .

ثالثا:القبعة السوداء ( السلبيات) :
١-يمكن ترتفع الضريبة وكانت وقتها ٥٪
٢-أو يرتفع الإيجار ٣- ترتفع التكاليف
٤- ترتفع الأراضي
٥-يلغى قرار الدعم السكني ووو،

رابعا: القبعة الخضراء ( الأفكار الإبداعية ):
طرحت على نفسي سؤال :
-هل السيارة مهمة؟ نعم مهمة
-هل هي عاجلة؟ طبعا لا موعاجلة .!
طيب وش هدفك الرئيسي من السيارة ؟ ( اتوسع )
يعني مولازم سيارة جديدة ! نعم صحيح .
وش رايك تشوف مستعمله لو بعد سنة وتدخل جمعية بنفس القسط ..!
ولأني قليل خبرة وغشيم بالسيارات
اتصلت على أبومحمد صاحبي متخصص بالسيارات
سألته بكم أسعار السيارات التاهو واليوكن واللي مثلها ،
قال. كم ميزانيتك قل يعني من ٢٥ إلى ٣٠ ألف
وقلت ارسل لي صور السيارات ما عرف الموديل والشكل ، فأرسل لي موديل 2008 و 2009 وكان شكلها مقبول بالنسبة لي ،
قال: أسعارها ما تتجاوز 25 ألف نظيف وفيه الاكسبدشن بعد بتحصل نظيف قريب من السعر وأقل ...شكرته وقفلت .

خامسا:القبعة الحمراء (المشاعر):
صراحة حسيت بشعور مريح إني ما استعجل واني أصبر عام كامل دام أن معي كامري وماني مستعجل.

سادسا: القبعة الزرقاء (القرار )
دخلت جمعية من 2000 ريال لمدة عام ..
وبعد عام صار معي 24ألف..
كلمت خوينا أبو محمد وحصلي
اكسبدشن أسود ب 21500 ريال مع النقل والتأمين ..
النتيجة الرهيبة :
وبعدها
كان أول قرار لي أشتري بيت أو أرض وفعلا
شريت أرض مساحة الأرض بـ 840 م
وبنيت دور مسطح بناء 420 م
واليوم
وساكن ولله الحمد في بيتي من أكثر من أربع سنوات ..
تخيل:
لو أني أخذت التاهو كان توني انتهي من القسط ، وباقي ساكن بالإيجار ،،
الخلاصة لا تستعجل في قراراتك وخاصة غير العاجلة
فكر وفكر واستشر واستعن بالله ،.
ودمتم سالمين