الحمدلله 6 شهور انقضت بخيرها وشرها للأمانة فكرت قبل مشاركة هالتجربة لكن قلت دام انها للفايدة ف مو غلط ابداً خصوصاً ان كثير يمروا بمثل هالتجربة ويحتاجوا يعرفوا ناس تمر بنفس التجربة فبتكلم عن كل ما يخص السيبرالكس بواقع تجربة
ممكن كثير مر عليهم اسم هالدواء وتحصله في ميمز او من هالقبيل عموماً دواء السيبرالكس هو دواء خاص بعلاج الاكتئاب ونوبات الهلع او ما يسمى ب panic attack ، الحالة اللي تجيك من ضيق تنفس وتسارع في نبضات القلب وضيقة وتحس انك مكتوم ممكن هالشي يجيك فجأة او يكون ناتج عن تراكمات تمر فيها
كثير يمروا بهالحالة ويوم يلجئ لأحد من اهله ما يكون في تفاعل من طرفهم ومافيك الا العافية وروح بس فهالشي ينعكس عليك سلباً او على ولدك او بنتك في حال كانوا يمروا بهالحالة لان ممكن تزيد حالته سوء وتطول فترة العلاج بسبب اهمالك اتجاه نفسك او ابنائك وفالاخير نفسك امانة عليك
اذكر تم طرح هالموضوع قدام كم شخص فكان يقول لا ترد على الدكاترة تراها مو كويسة وبتضرك ، مو من المنطق اني اسمع كلامك واتجاهل كلام شخص سنين يدرس في مجال الطب ويعرف شغله
وضروري جداً انك ما تتبع هالخطوة بدون رجوع لدكتور كثير يقولوا خذها بدون رجوع له او بدون وصفة وهذا اكبر غلط فالاخير لو انتهى الكورس الخاص فيك تحتاج انه يكون موضوع لك خطة من طرف الدكتور بأنك كيف تقطعه تدريجياً
اول شهر من العلاج كان الموضوع صعب جداً جسمك مو متعود على العلاج فبدل لا تخف حالتك راح تزيد وكان هذا كلام الدكتورة فالامر طبيعي جداً وكان في اول شهر مخصص دواء ثاني معه يعتبر منوم بحيث تبقي جسمك في خمول وتخفف النوبات اللي ممكن تجيك ويكون استخدامه في اول اسبوعين ثلاث الى ان تتعود على الدواء اذكر كان نومي يومياً في اول شهر يتخطى حاجز ال16 ساعة
مع مرور اول شهر شهرين يبدا العلاج ياخذ مفعوله الاشياء اللي ماكنت تقدر تسويها بتصير تبدا تحاول تسويها كنت اواجه صعوبة في اني حتى اخرج من البيت او اني انام في غرفة لحالي التفكير دائما بشكل سلبي وكنت دايم اشعر اني مو ممكن اخرج من هالدوامة لكن الحمدلله شوي شوي مع العلاج يزول هالامر
احد الاسباب اللي تكلمت لأجله الصراحة اذكر يوم طلعت في البودكاست وتكلمت عن هالامر واني تعالجت مع دكتورة اسمها رانيا في السعودي الالماني فالدمام ثاني يوم كان عندي موعد مع الدكتورة فيوم دخلت قالت شفت مقابلتك قلت كيف عرفتي عنها قالت جاتني بنت وامها وقالت انها جات بتوصية بعد كلامك وكان من اكثر الاشياء اللي اسعدتني
السلبية الوحيدة فيه انه يسبب زيادة فالوزن بشكل مو طبيعي لكن في سبيل صحتك وسلامتك فما يخالف ابداً دام هالشي بيغير فيك للافضل
في حال احد احتاج لإنه يتكلم في هالامر او يستشير او يسأل او حتى يشارك تجربته فكلي اذان صاغية تقدر تتواصل معي فالخاص وبحاول اساعدك بكل ما اوتيت من قوة لأني مريت بنفس الشعور وكنت دايم احاول ابحث واشوف ناس مروا بمثل اللي اشعر فيه واحاول استفيد من تجربتهم
جاري تحميل الاقتراحات...