انا اتسألت كتير سافرت ازاي، ف انا هاحكي انا سافرت ازاي، مع العلم اني ولا دكتور ولا الافريدج مبرمج المصري في الريف الاوروبي
مبدأيا كدا انا خريج ألسن صيني عين شمس، دراسة اللغات بحسها من الطرق اللي بتسهل للواحد السفر بشكل عام، ولكن كل بلد وحسب هي بتدعم تعلم الاجانب للغتها ازاي، انا عامة لاحظت ان اللغات الآسيوية هي اكتر بلاد بتدعم الاجانب يتعلموا لغاتهم، ف في منح للدراسة لكوريا والصين واليابان اكتر من الدول الاوروبية
اعرف ناس من ال٣ لغات دول سافروا درسوا برة بكالريوس وماسترز وفضلوا قعدوا هناك وكدا، بس للامانة انا ماسمعتش عن حد كان بيدرس برتغالي مثلا وسافر البرتغال منحة دراسية وكدا، ف دي حاجة حابب اوضحها ان البيئة اللي انت بتهيئها لنفسك من الاول بتساعدك كتير تسافر او لا
انا خلصت دراسة في مصر وخلصت الجيش وبعدين قدمت على امتحان قياس اللغة الصينية ونجحت فيه، وبسبب كدا قدرت اقدم على منحة واعرف اسافر ماسترز للصين وكدا، دا الموضوع باختصار ولكن دا هايفتح الباب لكذا سؤال، ف انا هاحاول اجاوب عليهم هنا…
١. هل لازم اكون خريج السن علشان يجيلي منحة زي دي؟ الاجابة لا، المهم هو انك تعدي امتحان قياس اللغة الصينية بدرجة حلوة في مستوى عالي، يعني تمتحن المستوى الاخير او القبل الاخير وتجيب درجة حلوة، ف دراسة الجامعة للغة بتساعد كتير طبعا، ولكن مش عامل اساسي خالص، ونفس الموضوع فالياباني والكوري
٢. ايه الاماكن اللي اتعلم منها اللغات دي؟ للصيني معهد كونفيشوس هو افضل مكان لتعلم اللغة الصينية بكل جدارة
اللغة اليابانية: مؤسسة اليابان او الJapan foundation دا احسن مكان
للغة الكورية: المركز الثقافي الكوري
باقي الاماكن التانية مش رسمية ومش هاتساعدك اوي
اللغة اليابانية: مؤسسة اليابان او الJapan foundation دا احسن مكان
للغة الكورية: المركز الثقافي الكوري
باقي الاماكن التانية مش رسمية ومش هاتساعدك اوي
٣. هل تعلم اللغات دي صعبة؟ اه تعلمها صعب ومحتاجة تفرغ لفترة طويلة علشان تعرف تتقنها، ف انت محتاج عالاقل ٦ شهور متفرغ للاساسيات وكدا وبعدين تذاكر يوميا بعد الشغل وكدا، ماينفعش تتعامل مع اللغات دي معاملة الانجليزي والفرنساوي واللغات الهبلة دي
٤. هل الماسترز هناك بيكون متعلق باللغة؟ اغلب الوقت اه، بس طبعا في مجالات بتقدم عليها ولكن نسبة القبول فيها مش عالية اوي، ولكن موجودة
٥. طب انا درست اللغة خلاص، اقدم على المنحة ازاي؟ ودي بقى فايدة انك تتعلم اللغة من اماكن معتمدة زي ماقولت فوق، لان الاماكن اللي قولتها فوق دي هاتساعدك تقدم عالمنحة وتختار الجامعة وتتابع معاك الاجراءات وكدا، ف انت مش محتاج تقلق من النقطة دي، انت محتاج تركز تتقن اللغة وتعدي الامتحان
٦. هل سهل بعد الدراسة هناك اني الاقي شغل وكدا؟ دا على حسب اهتماماتك من الاول، لان الحياة هناك سهلة وفيها تلاهي كتير ف سهل تنجرف مع الحياة وتنسى ان وقتك محدود وماتدورش على شغل، ولكن بشكل عام كل اللي اعرفهم كانوا بيدوروا على شغل بجدية لقوا شغل هناك الحمدلله بعد دراستهم
٧. طب نظام العيشة هناك عامل ازي؟ دا هايكون ثريد مفصل في وقت اخر ان شاء الله
للي حابب يعرف ليه العيشة في اسيا احسن من اوروبا، يتابع الثريد دا
لو حابب تفهم ليه انا سيبت اوروبا بعد ما قعدت فيها سنة ونص، انا شرحت دا في الثريد دا هنا
جاري تحميل الاقتراحات...