#قصة .
شيخ قبيلة تزوّج امرأة . هذه المرأة متكتمة بمشاعرها حتى صار يسميها ( السكوت ) . لايعرف الشيخ هل هي تحبه وإلا تكرهه وإلا محايدة كأغلب الزواجات ( لا تقول حي ولا تقول ميت ، أداء واجب بكل الأحوال ) . عاد هذا الشيخ شكله موحّد لأنه حريص على معرفة شعورها وإلا لو كان معدّد هي تركض ورا رضاه . استمر الشيخ مع زوجته سنينا ولا عمره سمع كلمة حلوة أو غزل . نفس الوقت ماسمع كلمة كراهية أو بغض . شكا حاله لخبيرة علاقات زوجية ( عجوز بالحي ) . أرسل عليها وإلا راح لها ، المهم قال لها : ياخالة أريد اعرف ( نمونة ) الجنية هذي لنا متزوجين خمس سنين وعندنا ولد وهي ولا تفاعل ولا رتويت ولا لايك . ووصف حاله على رأي فيروز ( إذا رجعت بجن و إن تركتك بشقى
لا قدرانة فل و لا قدرانة أبقى ) .

فهمت العجوز خبيرة العلاقات الزوجية وخبيرة الطب الشعبي قالت له : ولا عندك مشكلة ، عشان هيك وجدوا لنا وظائف بالحي لحتى نحل المشاكل الزوجية للشيوخ وغير الشيوخ . قالت : رح وأنا أمك وصد ثعبان واذبحه واربطه على بطنك وفاجئ زوجتك واذا قعدت من النوم تشوف الثعبان مربوط على بطنك وهي عاد يا أما إنها تفرح وتقول : الحمد لله افتكينا من هالنشبة ؟! يا أما إنها تصوّت وتبكي وتحزن وكذا راح تعرف إنها تحبك . قال الشيخ : الله يوفقك يادكتورة ، ويفتح لك باب رزقه . كم أجرة الكشفية ؟ قالت : أبد طال عمرك ، حنّا ما ناخذ اتعابنا إلا بعد العملية .
راح الشيخ عند الراعي وقال : أبغاك تصيد لي ثعبان صل أسود كبير ملعون مجنى خبيث مذهب سمه يسبق ظله . قال الراعي : ابشر طال عمرك ! وفعلا اصطاد الراعي ثعبان أسود ملعون مجنى خبيث مذهب سمه يسبق ظله وضربه ضربه براسه ومات ، لكن سليم ظاهريا . جاء الشيخ بعد ما تعلل مع الجماعة وتباحثوا في الشوون الداخلية والخارجية للقبيلة ونام بجوار زوجته وعلى وجه الصبح كشف عم بطنه والصل الأسود مربوط ببطنه ( غير..) . ورأن المرأة زوجها وهو ميت والداب ( الثعبان ملتف على بطنه ) ..

ولمّا انبلج الصباح والعصافير قالت كوكو والكلاب قالت هو هو نظرت المرأة الى زوجها الشيخ وإذ ثعبان أسود ملتف على بطنه وهو ميت ، بالحقيقة هو مامات بس سوّى نفسه ميت على رأي المثل ( اعمل نفسك ميت ) . فصاحت وصرخت وشقت ثوبها وقالت شعراً ، الشعر عندهم مايشكل الراعي يقول شعر والورع والمرة والشيخ ، المهم قالت هذا الشعر وتسنده على ولدها زيد وتذكر خصال الشيخ ومميزاته الفل أوبشن :
يازيد رد الزمل بهل عبرتي -
على أبوك عيني مايونّي هميلها -
عليّت كم من مجرم حلت دونه -
بالسيف والا حيلة تستحيلها -
و عليّت كم من سابقٍ عقت جريها -
بعود القنا والخيل حامٍ جفيلها -
وعليّت كم من هجمةٍ قد شعيتها -
صباح والا زعتها من مقيلها -
وعلّيت كم من جادل غيا الصبا -
تمنّاك ياعذب السجايا حليلها -
سقّاي ذود الجار لاغاب جاره -
وخو جارته لا غاب عنها حليلها -
لا مدخل عينه لشقّان بيتها -
ولا سايلن عنها ولا مسيلها -
يوم سمع هالشعر اللي ينومس وعرف محبتها له وهو ينهض من الفرحة يبي يخمها ( خمة معزّة والا الردى ماينولها " صح لسانك يا أعرابي يافهيم " يوم شافت أنها انكشفت وخجلت من نفسها وانفشلت وهربت لأهلها -

يوم هربت لأهلها لأنه انكشف سرها بحبها لزوجها " سبحان الله " قالت : والله ما أرجع له لين الحجر يحكي للحجر . الشيخ ورط وورّط نفسه وحتى الأعمال الادارية للقبيلة تعطّلت . أرسل ورا العجوز حلالة المشاكل والخبيرة الدولية للعلاقات الزوجية وقال : تشوفين السيف هذا ؟ قالت : أشوف طال عمرك ! قال : إن ما دبرت لي طريقة أرجّع زوجتي لأجللك بهالسيف ويقولون راحت غلطة .
قالت : عطني العلم ولا تبربر ياكثر بربرة الشيوخ على غير سنع . قال الشيخ : وضعت شرط ماترجع حتى الحجر يكلم الحجر . قالت : بسيطة عندك رحى ؟ قال : رحى الحرب ؟ قالت : رحى القمح والخبز يمال الغنيمة . قال الشيخ : إلا موجود الرحى . قالت : رح لها وسمعها الحجر يحكي للحجر ، مافيني وضح أكثر . ذهب الشيخ وهو يحمل الرحى وقام يطحن قدامها وهي تسمع وقالت : والله صحيح . بس أبغى الشجر يكلم الشجر وتقوم أمها وتمصطها عصا على ظهرها وقالت : ارجعي لزوجك ولا تبلشينا ، وفعلا أخذت هدومها وشالت زيد ( من هو زيد ؟ ولدها ياذكي ) وذهبت معه وبعد هذا انفرطت بالمشاعر وصارت تقول كل يوم كلام حب لزوجها وهو تعب من كثر ما يسمع كلام حب حتى أنه بغى يرجع للعجوز عشان يعرف يسكتها بس الأعرابي قال : جز عن هالسوالف واصبر كما صبر الأعراب على قرقرة النساء . وبعد أن رجعت المرأة وعاش الشيخ بس جاه طرك بسيط بإذنه وأرسل للعجوز خبيرة التنمية البشرية ناقة و سمن وصاية . قال الأعرابي : انتهت ، أي بالله انتهت !! وش ( صاية ) ؟!