23 عيل مصر اتمسكو في ميدان " مونستراكي " في اثينا ، وصلتلهم مكان الاحتجاز بعد ما اتمسكو بساعتين ، اكبر واحد فيهم عنده ١٥ سنه ، وصلو اليونان عن طريق البحر من ليبيا من فترة ، دخلو دار رعاية الاطفال وهربو منه لانهم لازم يحضرو مدرسة ويتعلمو علي الاقل اللغة ! #١
لما وصلت عملت عليهم سكان سريع كده ، كلهم بنفس قصة شعر "امام عاشور " ورايقين رغم ان وشوشهم تعبانه ، في الحالة دي لازم يرجعو مقر رعاية الطفل واي محاولات للهرب مرة تانيه هيتحول لسجن الاحداث لحد ١٨ سنة ، موضوع سخيف يعني #٢
وظيفتي اني افهمهم بالراحة كده انهم مينفعش يهربو وان دي مشكلة كبيرة ، واعرف منهم ايه اللي ناقصهم وليه مش حابين دار الرعاية ، سلمت عليهم " بيبصولي بس وواحد منهم طلب من زميلة يطفي الاغاني ، عشان يسمعوني وكده " بقولهم طيب ردو السلام يارجالة ، واحد منهم قام وقالي#٣
"بقولك ايه انت هنا تترجم بس واللي نقولهولك تتقوله للظابط " كنت عايز اسمع منه ، فضول يعني فقولتله سمّعني ، قالي " خليهم يسيبونا نشتغل ويدونا اوراق نمشي بيها في البلد ونعرف نسافر براحتنا ولحد ما نلاقي شغل يوفرولنا سكن وفلوس " #٥
قولتله تمام ، خرجت من الاوضه ورجعت بعد ١٠ دقايق " والله ياشباب الظابط قرر يرجعكو مصر " وهتركبو الطيارة كمان ساعتين ونص فكلمو اهلكم يستقبلوكم وخرجت من الاوضه ومشيت ، العيال زي ما تكون دبحتهم وبعديها ب١٠ دقايق قعدو يندهو سبتهم شويه ودخلتلهم #٦
"والنبي قول للظابط ميرحلناش والنبي اتصرف والنبي مش هينفع " نفس الطفل اللي كان بيقولي انت هنا تترجم وبس ، المهم خال نفس الطفل ده كان علي التليفون وهنا كانت المصيبة لما قالي كلم خالي #٨
سلام عليكو ياباشمهندس ، هو فيه ايه ؟ الواد ١١ سنة وعايز يكون مستقبله ودافعينله ٣٠٠ الف جنيه عشان يوصل عايز ترجعهولنا ليه يعني ؟ ما الناس كلها بتاكل عيش وبعدين لغة ايه ومدارس ايه اللي اليونان عايزاه يحضرها ، احنا فاضيين ؟ #٩
اتأكدت اني مينفعش اشرح للانسان ده اي شئ ، قولتله يعني انتم مالكوش معارف في اليونان ياخدو بالهم منه ويسكنوه معاهم ويتعلم اللغه علي مهله ؟
قالي فيه كتير ناس بس كل واحد شايل نفسه ،
(( والله العظيم اخوه كان ٨ سنين خارج معاه علي نفس المركب بس قولنا بلاش )) #١٠
قالي فيه كتير ناس بس كل واحد شايل نفسه ،
(( والله العظيم اخوه كان ٨ سنين خارج معاه علي نفس المركب بس قولنا بلاش )) #١٠
قفلت السكة مع خال الطفل وسيبت الغرفه اللي فيهم ورجعت بعد نص ساعة ، فهمتهم انهم هيرجعو دار الرعاية ، لازم يحضرو الدروس ، واي محاولات للهرب واتمسكو هيقضو وقت في السجن ، كانو برضه غضبانين وزعلانين بس روحو والمشرف بتاعم جه خدهم #١٢
بنقفل التقرير ، الظابط قالي بالحرف " انت ايه اللي مزعلك ؟ هيهربو تاني واحنا عارفين وهيتحطو بالسجن وهناك هيتعلمو غصب عنهم ، اللي بعتهم كان متوقع ايه ؟ ا#١٣
القصة حاليا في مبدأ " الاستحقاق " -" البجاحة" الجيل الصغير ده اللي متخيل انا الدنيا متسخره ليه وعلشانه ، واي اصول او عيب وحرام تبقي ضعف وقلة حيلة ، مترو اثينا حالات التحرش فيه لاول مرة وكل التقارير شباب تحت السن " مصريين " #١٤
في العيد كان فيه اكتر من خناقة في اماكن نضيفة وكلها كنت ضد شباب مصري صغير ، منع دخول بار - تحرش -تدخين حشيش - المشي بازايز الخمرة - منظمات المجتمع المدني كلها بتنزل الاقسام وبتطلع العيال ، والعيال مبتقولش حتي شكرا او مش هعمل كده تاني #١٥
انا بشتغل مع المهاجرين من ٢٠١٦ في اوروبا وفترة صغيرة في امريكا ، الظاهرة دي جديدة جدا جدا ، فئة معينه في سن معين من دولة معينه يبقو بمنتهي قلة الذوق والتربية ، الموضوع مرصود وظاهر ، المصريين في اليونان من اواخر التسعينات هي اكبر واهم جالية، ناس بتشتغل وبس السمعه دي بتنهار #١٦
جاري تحميل الاقتراحات...