للامانة بعد انقطاعي الطويل الفترة الماضية،
و حالتي النفسية الصعبه اللي تدهورت بسبب مرض امي ، و تعثر بزنسي، حاولت بكل الطرق اجرب اشياء جديدة ترجع فيني طاقتي و شغفي للحياة، و تخرجني من المشاعر السلبية، و الحمدلله قدرت اتغلب عليها، بشارككم تجربتي و الامور اللي سويتها لعلها تفيدكم:

اولاً: و اهم شيء واللي كان له دور كبير جداً، غيرت بيئتي و سافرت مكان بعيد عن اي شيء يذكرني بذيك الفترة، السفر علاج .. و المقولة اللي تقول:
" لا يمكن للمرء ان يتعافى بنفس البيئة التي امرضته" هي اكثر شيء اقتنعت فيه،فعلاً.

ثانياً: كانت تجيني نوبات هلع اثرت علي جسدياً جاتني على اثرها مشاكل بالجهاز الهضمي و الهرمونات و مناعتي ضعفت ، ما كنت اعرف انها تصنف كمرض نفسي،لين حجزت استشاره مع استشاري نفسي على تطبيق @labayhapp اسمه حاتم ال زاحم شخصني بالمرض و اضطرابات قلق و دلني على علاج دوائي و سلوكي الله يجزاه الف خير🤍

ثالثاً: حاولت اصنع روتين حياه يخليني سعيدة مع ان وقتها ماعندي اي شغف و لا رغبه بس كنت اجبر نفسي على خلق روتين يسعدني، فكنت اسوي اجواء رمضان و اسوي الفطور و اطلع امشي بالهواء والمطر ، و اصلي التراويح بالمسجد، و اختلط بالناس و اشتري الاشياء اللي احبها حتى لو كانت تافه، والاهم كان زوجي سندي بعد الله بكل هالرحلة🤍

@labayhapp رابعاً: قصيت شعري و غيرت لونه و هالشي مره فرق بنفسيتي بنات، غيروا اي شيء بشكلكم لانك اذا شعرتي بالجمال بنفسك، راح تستشعرينه باللي حولك و معروف اننا كنساء اذا خرجنا من مود معين على طول نقص شعرنا 😅🤍

@labayhapp خامساً: حوطت نفسي بالعائلة، و كنت احرص على كل اجتماع و كل لمة عائلية، من كثر خوفي على امي صار ودي اجمع احبابي كلهم قدامي و اعيش معهم، و فعلاً اشبعت هالرغبه فيني، و صرت اجمعهم عندي او اروح عندهم،حاربت وحدتي و هواجيسي بأقاربي و ارحامي حتى اللي كنا متقاطعين عنهم.

اخيراً و ليس آخراً، تصالحت مع اقداري كلها و وضعت نفسي بموضع المستسلم لحياته و ليس المسيطر عليها، لان مهما بلغت علاقاتك و واسطاتك و فلوسك و قدراتك، ما تملك من حياتك الا ما وفقك الله للسيطره عليه والباقي يجري عليه امر الله و قضاءه و حكمته و لن يغني حذر من قدر، تصالحت مع فكرة المرض والخساره والفقد و اصبحت اكثر ايمان وصبر و توكل، ولله الحمد من قبل و من بعد.
شكراً لوقتك🤍
اتمنى لك حياه جميله تشبهك🤍