إمبارح قعدت أقلب فى حساب @ycombinator عشان أشوف إيه اللى بياخد funding اليومين دول ورايحة بينا على فين يا تكنولوچيا والAI هيقعد الناس فى البيت ولا لأ ... إرهاصات مش مرتبة فى ثريد.
مبدئيا أى حد مش حاطط AI فى إسم الشركة فلاح ومش هياخد ولا سنت. من كل ٢٠ شركة مثلا واحدة مافيش AI فى إسمها...
نيجى بقى للأفكار ودة اللى كان صادم بس فى نفس الوقت منطقى ، ٩٩٪ منها GPT Wrappers مع تركيز على use case معينة لدرجة إن فى منهم بيقولك التسعير عبارة عن تكلفة الAPI بتاع OpenAI وعليه هامش ربح. بس كدة؟ أومال إنت فاكر إيه.
كذا شركة بتعمل موضوع خدمة تتصل بالتليفون وتعمل حاجة زى مثلا خدمة تتصل بالكوافير تحجز ميعاد باديكير. الديموز كلها بدائية وتحسها إعادة للديمو بتاع جوجل اللى عملوه من كذا سنة على نفس الموضوع... فى شركات عاملة فيديو مفيش حتى برودكت
وطبعا كذا شركة شغالة على موضوع الsales automation حاجات زى خد أكسس على إيميلى وكالندرى واجرى ورا الشخص لحد ما تحجز معاه ميعاد... الprospecting هيتحول لمكنة وهيبقى extremely efficient
خدمة العملا بردو من الحاجات اللى فيها هجوم رهيب وكل الناس عايزة تاخد حتة من التورتة وتأتمتها على قدر المستطاع. كل البيزنسيز بتكره تكلفة خدمة العملا وأى حاجة تقلل تكلفتها هيدفعو فيها فلوس. فى رأيى دى من الحاجات اللى هيستفيد منها الشركات الكبيرة أكتر من الصغيرة لأن عندهم الداتا.
كمان لفت نظرى سن المؤسسين كلهم أوائل عشرينات ودة خلانى أفكر فى الفرق بين أمريكا وأوروبا وإزاى الصغيرين لهم edge رهيب هناك والأمريكان مبيهمهمش إرمى الفلوس ودخله السيستم ولو أول شركة فشلت التانية هتنجح ودة بالظبط ناس زى sam altman وreddit وتويتش كلهم كانو خريجين جدد لما خدو funding
عالجانب الآخر هنا أى حد هتتكلم معاه أول حاجة هيقولهالك وسمعتها بودنى كذا مرة مين فى أمريكا ينفع ننسخه؟ فى استثناءات بس عاجبنى فى الألمان إن عارفين إن دة تمام السوق هنا وإنهم عارفين إنهم execution machine هينفذو الموضوع مجرد ما يعرفو الطريق من اللى حصل فى أمريكا. بيتعلمو كويس أوى.
عموما واضح جدا إن خلاص دة المستقبل. هيبقى فى هرى كتير وفلوس هتترمى فى الأرض فى حاجات مش حقيقية بس دة تمن طبيعى للinnovation cycles.
فى رأيى منطقتنا لسة بدرى على ما تستفيد من التقنيات دى لأنها لسة غالية وفى بلد زى مصر فى حاجات كتير تكلفة العمالة مازالت أرخص من سيستم بالدولار.
وبالنسبة للخريجين الجدد أو لسة فى الجامعة مفيش حاجة يتخاف منها للدرجة دى احنا لسة موصلناش لقمة اللى محتاج يتعمل بالسوفتوير. اشتغل على نفسك وجرب كذا حاجة ومتقلقش. التغير هو السمة المؤكدة فى مجالنا فاستمتع بالرحلة وخش بقلب جامد ولأ الAI مش هيقعدنا فى البيت بس لازم نستغله لصالحنا.
جاري تحميل الاقتراحات...