قبل فترة كنت العب مع تيم اسويين في لعبة لول، وقعدوا يسولفون علي عن تجربتهم في جامعة Mit وعطوني الحكاية من الالف للياء كيف انقبلوا فيها من بعد الثانوية او بعد البكالوريوس، وسألت برضوا السعودين الي يدرسون هناك سواءً انقبلوا بعد الثانوية او الجامعة...
وهذا ثريد ملخص تجربتهم بالقبول

محتوى الثريد:
1- الشروط الاعتيادية.
2- اشياء تبرز تقديمك اذا كنت طالب ثانوي.
3- اشياء تبرزك اذا كنت طالب جامعي.

1- الشروط الاعتيادية.
-خطابين توصية من معلمينك/دكاترتك
-شهادتك الثانوي والمتوسطة
-درجة اختبار الSAT
-مقال عن نفسك
وشيء لازم تعرفه ان فيه حول 40 الف طالب يقدم سنويًا وينقبل منهم 2500 تقريبًا...
موضوع الدرجات مهم بس ترا مايشكل شي كبير في نسبة قبولك، لان 90٪؜ من ذولي الي قدموا درجاتهم فل الفل
فيه اشياء ثانية تخلي طلبك يبرز اكثر ويتقدم عليهم.

2- اشياء تبرز تقديمك اذا كنت طالب ثانوي.
-يكون عندك "النشاطات الاصفيه":
النشطات هذي اشياء تسويها خارج الصف وتفيد الغير وتفيدك برضوا...
وفيه نوعين منها ولازم يكون عندك الثنتين هذي طول سنواتك الثانوية:
النشطات الي في العطله الصيفية
مثل عمل صيفي او تطوعي في جهة صحية...
النشطات الي في وقت دراستك، مثل كنت تشتغل على اختراع معين ولا بحث معين ولا كنت فريق كورة ولا وفريق فعالية ولا حق النظام...
-تدخل برامج صيفية:
اغلب الجامعات القوية عندنها برامج صيفية جتى Mit، عشان اي طالب ثانوي وده يدخل في مشاريع علمية صغيرة وكذا ويدرسونك برضوا التفاضل واشياء تاخذها باول ترم بالجامعة...
وهذا الشي راح يفيدك وبشكل قوي، خصوصًا اذا اخذت البرنامج الصيفي هذا عند جامعة Mit واخذت درجات حلوه بالرنامج، كذا راح يعرفون انك شخص ذكي ونسبة قبولك مرتفعة جدًا.
-يكون عندك ابحاث:
انه يكون عندك ابحاث برضوا راح يفيدك بشكل كبير وجدًا، وترا نسبة كبيرة من المتقدمين اقل شي عندهم بحث او بحثين، ف عملك على ابحاث تكون من الاوليات عندك.
-المسابقات والانجازات:
انه يكون عندك ميداليات او جوائز محسوسة من مسابقات ومسابقات كبيرة مو شي تسويها مدرستك، شي تسويها جهة كبيرة او جامعة وكذا.
-البرامج حقت المبدعين:
انك تكون برنامج حق مبدعين والتنافس فيه عالي مثل قمم ولا موهبة، هذا الشيء جدًا راح يرفع من مستواك.

3- اشياء تبرزك اذا كنت طالب جامعي.
انك تكون طالب جامعي وودك تكمل الماجستير او الدكتوراه في Mit فرصة حلوه، خصوصًا ان التنافس اخف بكثير من بعد الثانوية...
-المعدل لازم يكون فوق 4.2:
المعدل هنا شيء مهم، وجدًا وكل ما قربت لل5 يكون افضل
-البرامج حقت المبدعين:
انك تكون برنامج حق مبدعين والتنافس فيه عالي مثل قمم ولا 1923 project، هذا الشيء جدًا راح يرفع من مستواك.
-المسابقات والانجازات:
انه يكون عندك ميداليات او جوائز محسوسة من مسابقات ومسابقات كبيرة مو شي تسويها جهة مالها قوة، مسابقة تسويها جهة كبيرة او حكومية وكذا.
-يكون عندك ابحاث:
انه يكون عندك ابحاث برضوا راح يفيدك بشكل كبير وجدًا، وترا نسبة كبيرة من المتقدمين اقل شي عندهم بحث او بحثين، ف عملك على ابحاث تكون من الاوليات عندك.
ولا يكون عندك كم فترة تدريب على بحوث في جهات كبيرة بالبحوث مثل كاوست وكذا.
ولا تقدر تقدم لجامعة mit بان ودك تصير باحث عندهم في احد المجالات الي يبحثون فيها فترة الصيف، وهذا الشي راح يخلي فرصة قبولك عالية جدًا.
-تدخل برامج صيفية او تدريب صيفي:
التدريبات او البرامج الصيفية هذي من اهم الاشياء الي مفروض تمتلكها، خصوصًا اذا كانت في شركات كبيرة وتعطيك مهارات ممتازة، راح يزيد من فرصة قبولك.
-الصناعات او المشاريع:
وهذا من اهم اهم اهم الاشياء الي راح تزيد من فرصة دخولك، انك تكون مشارك في مشروع لصناعة صروح مثلًا ولا نموذج للوح طاقة...والخ، راح يخلي فرصة قبولك مرتفعة جدًا...
واذا كنت انت مدير المشروع وفكرتك، راح يزيدها بشكل اكبر واكبر...

لو تلاحظ كثرة ترديد جُملة "راح تزيد من فرصة قبولك"
وهذا هو الي لاحظته من الناس الي تحاورت معهم بالموضوع هذا، تقييم طلبك راح يكون شمول، مافيه نسبة واضحة، وعادي تكون مثالي بس بوقت المقابلة الشخصية ترفض وغيرها من الامور...
الي عليك هو انك تكون فريد، وانك تبين للجامعة اذا تخرجت منهم راح تصير شيء كبير، وان شغوف بشكل لا يوصف وان شغفك بيكمل بدون او مع الجامعة...

عطني رايك في السلسلة الجديدة، واذا اعجبتك صدقني اشياء حلوه جايتك.
اعذروني على الأخطاء إن كان فيه خطأ،
وفقكم الله