رتبها

اغنية وائل جسار الاخيرة نزلت كفيديو كليب و بالفديو كان هو وزوجته سوا .. وطبعاً كلمات الاغنية تعبر عن قصة حبهم وانها كانت حلم له وتحقق 🥹♥️♥️
وفعلاً قصة حبهم غيييير وغريبة زي القصص اللي بالافلام .. تعالوا اقولكم قصتهم 👇🏻

اول شئ وائل جسار من مواليد 1976م يعني عمره 48 سنة .. وزوجته ما صرحت كم عمرها ولكن عمرها قريب من عمره

والمسيرة الفعلية لبدايته في مشوار الفن كانت في عام 1986 لما كان عمره 10 سنوات وقتها نزل اول البوم له وكان اسمه " كلمة وداع "

وعدت السنين وكبر واستمر بمجال الفن ..
بس ما كان فنان قوي ومعروف مره .. له جمهوره ولكن عدد جمهوره محدود وقليل

و حتى حالته المادية كانت سيئة لانه من اسرة مستواها المادي عادي جداً يعني تعتبر عائلة شبه فقيرة

وكان يحاول يسوي حفلات كثيرة من بداية مشواره الفني عشان يرفع من مستواه المعيشي ..

وطبعاً لما كبر وكان يسوي حفلات .. باغلب حفلاته لاحظ ان في وحدة دائماً تحضر له بي ما كانت تتصور معاه ولا تكلمه ولا شئ

بس حفظ وجهها لانها باغلب حفلاته كانت تحضر وهو لسه ببداياته ما يعرفونه كثير

وفي يوم من الايام كلمها وشكرها وكان حوارهم عادي جداً .. بس هو اعجب فيها وفي قلبه كان يقول هذه بتكوم حب حياتي وزوجتي

وهذه البنت هيا فعلاً زوجته حالياً واسمها ميرَي ..
كيف تزوجوا ؟ 👀

بعد ما حس بالاعجاب اتجاهها وشافها مره ثانية صارحها .. وفعلاً حبته وحبها وهذا الكلام عام 1998م يعني كان عمر وائل جسار وقتها 22 سنة .. صغيييير لسه واتوقع كلنا ممكن لو نعرف ذي القصة لشخص بهذا العمر بنقول طيش وهبال واندفاع مو حب حقيقي 🤣

وسارت علاقتهم قوية ببعض وقريبين من بعض مره وقرروا انهم يتزوجون .. بس للاسف فيه عوائق كثيييير بطريقهم !

اول عائق .. هو مسلم وهيا مسيحية ! والاثنين اهلهم مستحيل يوافقون على الزواج لان الموضوع هذا صعب ومو اي اهل يتقبلونه .. وخصوصاً اهلها هيا

ثاني عائق .. هو فقير يعتبر وعائلته فقيرة وبالمقابل هيا من عائلة غنية في لبنان ومعروفين فاكيد اهلها ما راح يرضون انهم يزوجون بنتهم واحد اقل من مستواهم المادي وهذا الموضوع مهم اكيد عند اغلب الاهالي

وهذا اللي حصل .. تقدملها واهلها رفضوه رفض تاااام وحاول مره واثنين وعشرة ورفضوه تماماً 🥲

وبالنهاية ميرَي اعترفت لاهلها وقالتلهم انها تحبه وتبي تتزوجه وهيا راضية بكل الاختلافات المادية والـ..دينـ.ية وكل شئ وموافقة .. طبعاً اول ما اعترفتلهم السيناريو الباقي عليكم لان ردة فعلهم كانت زي اغلب العوائل 🏃🏻‍♀️

وبالعكس لما اهلها عرفوا انهم يحبون بعض زاااد اصرارهم على الرفض .. يعني باختصار قالولها تحلميييين انك تتزوجينه انسي 🤝🏻

وبعض الرفض التام مازالوا يحبون بعض و يتواصلون سوا ويحاول يشوفها لو من بعيد لبعيد من وقت للثاني .. واستمروا يحبون بعض من 1998 لين 2002 يعني 4 سنوات

وبعد 4 سنوات حب قرروا يتركون بعض بحكم انه مافي امل يتزوجون ابداً وعشان كل واحد يشوف حياته ونصيبه .. وتركوا بعض بنهاية 2002 🥲💔

ووائل كان يقول كل ما طالت مدة البعد كنت احسب ان حبي لها تدريجياً راح يقل بس العكس تماماً .. يقول كل يوم كانت في بالي وكل يوم كنت اقول بنتزوج واحنا لبعض وكان عنده امل كبييير ان الايام بتجمعهم سوا 😢

وما تحمل البعد وكان يرسلها رسايل من وقت للثاني انها مازالت بقلبه وانها حب حياته ومستحيل يحب غيرها .. وهيا كانت تبادله نفس الشعور

وعدت الايام والاشهر وكملوا سنتين وهم قاطعين علاقتهم ببعض وكانوا بس وقت الحنين يرسلون رسايل لبعض وبفترات متقطعة وبعيدة عن بعض

وكان وائل يقول لنفسه لو تحسن وضعي المادي ممكن يقبلون اهلها فيني .. لانه يقول حتى هو ما كان راضي بداخله انه يعيشها بمستوى معيشي اقل من اللي عاشته عند اهلها رغم انها كانت تقوله " راضية اعيش معاك على الخبز والزيتون "

هنا واضح انها تحت تأثير البدايات 🤣

المهم ان وائل في ذيك الفترة سوا كل شئ ممكن عشان يتغير وضعه المادي 180 درجة .. وفعلاً وقتها نزل اغاني كثيرة وضربت وانعرف فيها وسار له جمهور كبير ونزل البومات جديدة وتغير وضعه المادي تماماً

وبعد 3 سنوات من فراقهم في 2005 نزل اغنية اسمها " مشيت خلاص " وكلمات الاغنية كانت تعبر عنه .. ووقتها دق على ميرَي وسمعها الاغنية وقعد يبكي ويقولها انه ما نسيها ولا يوم ومازال يحبها ومتعلق فيها 💔💔

كلمات الاغنية صييياح 💔💔

وبعدها بكم شهر في 2005 نزل اغنية اسمها " اعذريني يوم زفافك " يعبر فيها عن شعوره لو تزوجت اللي يحبها بيوم من الايام من واحد غيره 😢

وطبعاً نزل اغنية يوم زفافك لانه بعد ما تحسن وضعه وسار معروف وفنان مشهور رجع حاول باهلها مره ثانية بس هم رافضيييين تماماً وبدون ادنى نقاش .. لانه مسلم وهم مسيـ.حيين ولانها تحبه ويحبها

ونزل الاغنية لانه توقع انها اكيد بتتزوج وتشوف حياتها خلاص بعد اصرار اهلها بالرفض 💔

و بعد اخر محاولة كلهم فقدوا الامل انهم ممكن يكونون لبعض 💔

والشئ اللي خاف منه وائل فعلاً حصل !
ميرَي تقدملها واحد واهلها بيزوجونها هو .. وقالت للي خطبها انه بقلبها واحد وتحبه وما تبي تتزوج واللي خطبها كان ما عنده مشكله ويبيها وبيتزوجها ! وهيا كانت تحسب انها لما تقوله كذا بيهج 🥲

وللاسف اهلها اصروا انها تتزوج من الشخص اللي تقدملها .. وانخطبت له وحددوا موعد الزواج وكل شئ

ووائل ما كان يعرف طبعاً انها بتتزوج لان اخبارهم انقطعت عن بعض .. ومابينهم تواصل ولا قالت له

وكان باقي 9 ايام على زواجها وكانت توزع دعوات الزواج .. ومن الصُدف ان ميرَي صديقة " زوجة اخو وائل " وكلمتها انها بتجي تعطيها بطاقة الدعوة للزواج

ووائل كان موجود ببيت اخوه وقتها .. محد يدري هي صدفة ولا زوجة اخوه كانت تدري بسالفتهم وعزمته ببيتهم بنفس اليوم اللي بتجي فيه ميرَي 👀

وجت ميرَي وحصلت وائل موجود .. وشاف بطاقة الدعوة للزواج وعرف بالموضوع وقالتله ميرَي تعال احضر لانه كان موجود وهي تعزم زوجة اخوه واخوه .. وتقول قالتلها وهي مغبونه 💔

واول ما قالتله كذا انهار وبكى وهي بعد 💔💔💔 وكانت لابسة خاتم الخطوبة باليمين .. تقول قالها خلاص فكي الخاتم من اليمين وارميه وبكرا تحطين غيره باليسار لاني انا بكرا بتزوجك !!

شلون وكيييف ؟؟
من ثاني يوم خططت هيا ووائل وخطفها وهربوا سوا وتركت اللي كان خاطبها وكل شئ وهربت معه .. وتزوجوا من دون علم اهلها

عشان كذا اقولكم قصتهم زي الافلام🏃🏻‍♀️

وبعد ما تزوجوا رسمياً .. تواصلت مع اهلها وبلغتهم وحطتهم تحت الامر الواقع .. وابوها على طول جاته جلطة لان الموضوع صعب ومستحيل تقبله بالوطن العربي تمممماماً حتى لغير المسلمين

تزوجوا في نهاية 2005 يعني بنفس السنة اللي غنى فيها اغنية مشيت خلاص ويوم زفافك

وعدت الايام والاشهر والسنين وهي بعيدة عن اهلها لانهم ما تقبلوا اللي سوته ..

وبعد فترة طويلة وبعد ما حملت منه تقبلوا الموضوع وخلاص رجعت علاقتها باهلها من احلى ما يكون .. وخلاص ساروا راضين تماماً بزواجها منه 🥲

والان هذه عائلتهم الحلوة ما شاء الله.. عندهم بنت وولد ✨

ولهم 19 سنة متزوجين ما شاء الله.. وعلاقتهم احلى منها مافي وللان كل ما طلع بمقابلة وسألوه عن زوجته يقول هذه قصة كفاح وحلم كنت احلمه سنين وربي تممه 🥹

وصورهم وكلامهم لبعض للان كله غزل وفعلاً اثبتوا ان حبهم كان صادق ومن القلب .. وسارت زوجته وام عياله ♥️♥️♥️ ويبين تقديرهم واحترامهم لبعض بكل اللقاءات والفديوهات ما شاء الله تبارك الرحمن ولا قد تكلموا عن بعض بطريقة سيئة او طلعوا اي مشكله لهم بالعلن

وبكل حفلاته تحضر له .. وينزل لين عندها ويسلم عليها قداام الكل للان بكل حفلة ما شاء الله .. ما قال احنا مقابل بعض بالبيت ما يحتاج اسلم عليها 🤣🤌🏻 هذا اللي حبه قول وفعل

ودخلت الاسلام عشانه .. قد قال بلقاء له انها تصوم معنا وكل شئ وحابة الدين الاسلامي وبنفس الوقت قال انا حاب تدخل الاسلام عشان تتبع ديانه زوجها وينشأون ابنائي تحت ظل دين واحد اللي هو الاسلام وفعلاً دخلت بالاسلام من حبها له وتاثراً فيه وعشان رغبته