من كام سنة كنت ماسك إدارة قسم وكان فيه موظف طباعه صعبة، صبرت عليه كتير.. مرة أتكلم معاه ومرة أشد عليه ومفيش فايدة.. كان عامل مشاكل مع الزملاء والعملاء.. لغاية ما في يوم عمل مصيبة حرفياً.. وكان لازم أخد قرار.. وأنا من طبعي مبحبش اقطع رزق حد، لكن ساعات بيكون القرار لازم يتاخد
قعدت معاه واتكلمنا وسمعته لكن مفيش حاجة قالها كان ممكن تغيَر القرار.. خصوصاً إن الإدارة العليا كانت مدياني تعليمات إنه لازم يمشي.. بعد ما خلص كلامه.. قلتله، للأسف مش هينفع أديك فرصة تانية.. هو كان لاعب في إيصالات رسمية وسارق مبلغ كبير.. كان بينكر لغاية لما أثبتتا الواقعة
وبعدها إعترف وقال إنه كان مزنوق والشيطان لعب في دماغه..بعد ما بلغته إنه لازم يرجع المبلغ عشان الشركة ما تاخدش معاه إجراء قانوني ونخلص الموضوع ودي ويمشي في هدوء..أجهش بالبكاء وفضل يتحايل عليا أديله فرصة تانية..وبعد ما رجع المبلغ كامل ومشي من الشركة..بدأت الرسايل تجيلي على الموبايل
في البداية كانت الرسايل كلها ندم وطلب فرصة تانية.. وبعدها بدأ يبعتلي رسايل تهديد ممزوجة ب ربنا ينتقم منك ، وهاخد حقي منك ومن عيلتك!! بلغت ال HR والشؤون القانونية وعملناله محضر عدم تعرض! غاب شوية ورجع يبعت تهديدات من رقم تاني.. و أنا بصراحة كبرت دماغي، لا برُد على رسايل ولا حاجة
مرت كام سنة، وكان بيبعت رسايل على فترات متقطعة.. كل شهر رسالة طويلة عريضة كلها شتايم وتهديدات.. وبعدها إنقطعت الرسايل تماماً.. من كام شهر.. كنت نازل من المكتب ورايح أركب العربية، لقيته قدامي واقف جنب العربية!! قلت لنفسي، ده مشهد النهاية.. حاولت أتراجع بس كان متأخر...
جالي و لقيته بيبتسم.. مساء الخير.. أنا عارف إنك خايف مني ولك حق.. بس أنا والله جاي النهاردة وبقالي ساعتين مستنيك في الشارع عشان عايز أتكلم معاك.. كان حاطط إيد في جيبه والإيد التانية ممدودة للسلام.. سلمت عليه بتحفظ.. وطلب مني يركب معايا.. وافقت وطلعنا على مكان نقعد فيه
حكالي عن السبب اللي خللاه يسرق.. وقالي إن إبنه كان عيان وكان لازم يعالجه.. وفي نفس الوقت، هو كان بياخد مخدرات وفلوسه كلها رايحة على الكيف! لكن الحكاية ما انتهتش لغاية كده.. حكالي إنه بعد ما ساب الشغل بشهرين، جاه عند المكتب واستناني عند العربية.. وكان معاه مطوة في جيبه
أنا لما سمعته بيقول مطوة ورجعت لورا وبدأت أشوف أقرب مخرج للمكان وأحسب عدد الخطوات كمان... وقالي إنه يوميها وهو واقف وبدون سابق إنذار، عربية مسرعة دخلت في عربيتي و خبطت البابين وهو أخد خبطة في رجله واتكسرت وراح المستشفى!! طبعاً أنا بلِمت! أنا فاكر اليوم ده زي إمبارح
لقيت فرد الأمن داخل مكتبي وبيقولي إن عربيتي اتخبطت.. نزلت جري ولقيت العربية جنبها الشمال متدمر، واللي خبطني واقف حاطط إيده على دماغه والناس ماسكين فيه، وقالولي إن فيه واحد اتخبط وراح المستشفى.. قعدنا شوية في الشارع وجت الشرطة.. أنا اتصالحت معاه لكنه كان عنده قصة تانية مع المصاب
هو ده اليوم اللي أخينا كان جاي وفي جيبه مطوة! الحادثة حصلت قبل ما أنزل من المكتب بحوالي ربع ساعة! يوميها كنت متنكد وعمال أقول، ليه كده يا رب.. يعني الراجل يسيب كل الشارع ويخبط في عربيتي!! وفضلت فترة متعكنن والعربية كلفت كتير في التصليح واستعوضت ربنا في الفلوس
مرجعتش على اللي خبطني عشان كان سواق ومش هيقدر يدفع.. المهم.. حكالي إنه بعد ما فك الجبس ما استوعبش الدرس.. كان هيكرر المحاولة تاني بعدها بسنتين!! وطلعلي الرسالة اللي بعتها وهو نازل من بيتهم وافتكرتها! شوفت التاريخ بتاع الرسالة وكتبته عندي..
وقالي إنه كان نازل من البيت ومعاه سكينة "غالبا عتبة المطوة كانت وحشة فقال ياخد سكينة يمكن تظبط معاه"..وراح وملقاش عربيتي تحت المكتب..راجعت التاريخ ولقيت إني كنت طريح الفراش في الفترة دي بسبب الكورونا! هتقولي صدفة هقولك لأ!مرتين على مدار سنتين..محاولتين والحمد لله ربنا نجاني ونجاه
وكمل الحكاية وقالي إنه بعد تاني مرة لم ييأس.. كان بيخطط تالت مرة لكن إبنه تعِب ودخل المستشفى! قلتله.. بص ربنا بيحبك! زي ما ربنا شال عني ٣ مرات هو شال عنك إنت كمان وعن عيلتك.. كنت هتوَدي نفسك في داهية.. قاطعني وقالي.. عشان كده أنا بعد اللي حصل تالت مرة وقفت مع نفسي
راح مصحة واتعالج من الإدمان، و قالي سبحان الله، بعدها بفترة لقيت شغل تاني بمرتب كبير.. وعرفت أصرف على إبني وصحته بقت أحسن كتير!.. وقالي، أنا كنت بكرهك وكنت بالنسبة لي مشكلة حياتي، كنت عايز انتقم منك بأي طريقة.. لكن دلوقتي جاي أشكرك.. قلتله إشكر ربنا اللي أنقذك من نفسك
خلصنا القعدة ورجعت البيت.. قعدت لوحدي أفكر.. لما عربيتي اتخبطت كنت زعلان ومقهور ومش عارف إن خبطة العربية فدا نفسي وفدا شخص تاني كان هيضيع نفسه.. ولما جاتلي الكورونا فضلت أعتب على نفسي، مكنش لازم تقعد مع فلان اللي نقللك العدوة..ربنا بيشيل عنا حاجات كتير و إحنا مش عارفين! الحمد لله
جاري تحميل الاقتراحات...