رتبها

بيشتروا التاريخ
ويعبوه في اقلام عشان يبقى واقع بكرة!
بينما نحن نعوم في بحر الاسعار ولدينا حوارات مع الدولار والعالم مشغول في كذا حوار،
اثيوبيا شغالة على صناعة اشياء واخبار!
شراء الاقلام و تأجير العقول مش جديد، لكن حاليا شراهم بيصنع معجزات من الانجازات بالتزوير
-١تابع

في الحقائق التاريخية.من غير ما تطول في الكلام تعالوا نشوف اثيوبيا بتعمل ايه في الميديا العالمية!
الفترة الحالية لتشهد نوع من المقالات السياسية والابحاث الجغرافية التاريخية عجيبة الشكل!
نشرت الواشنطن بوسط على موقعها مقال من أعجب ما رأت العين حاجة كدة كان معروض تبقى فيلم هندي
-٢

لكن فجأة اتحولت لمقال هندي!
اه اللي كاتبها هندي الاصل والجنسية والهوية فعلا.
المقال يا سيدي الفاضل بيتكلم عن الدور الاسطوري اللي لعبته أثيوبيا من القرون القديمة في مركز التجارة العالمية وربطه مع الاتفاق الموقع حديثا بين أثيوبيا وأرض الصومال بخصوص الميناء البحرية!
-٣تابع

بيقولك حضرة الكاتب ان المؤرخين كانوا في حالة حيرة شديدة من الكوكب الدري في العصور القديمة اللي كان اسمه "اثيوبيا" بحكم إن أثيوبيا كانت العالم اللي قاعد جواه قلب التجارة العالمية!
مش بس كدة دي كنوز روما والهند هى كمان كانت بتتدفق عبر موانئها بطول خليج عدن و البحر الاحمر -
-٤تابع

والتجار والحجاج مكانوش بيعرفوا يروحوا الحج بعد عبور الشرق الأوسط بدون مرور قوافلهم على أرض أثيوبيا بالخصوص (يمكن كانوا بيرجموا الشياطين هناك الاول زمان🙈)!
و بيستشهد الكاتب بمؤرخ بيزنطي من القرن السادس (انا بقيت بتشائم من كلمة مؤرخ-لما يجيي من طرف الجماعة دول)
-٥تابع

بإن مملكة أثيوبيا كانت بتملك اسطول ضخم من المراكب البحرية الخشبية (كانت اختراع اثيوبي ايامها بحسب البيزنطي)واليونانيين القدماء اطلقوا على الجانب الجنوبي من المحيط الاطلسي بحر اثيوبيا برغم انه بيبعد عّن اثيوبيا و مرتفعاتها آلاف الاميال!!👻
-٦تابع

و راح الكاتب مرفق الخريطة دي و مدي اثيوبيا منطقة نص القارة التحتاني لحد عمق جنوب افريقيا!!
واخدة في وشها:
كينيا
جنوب السودان
افريقيا الوسطى
اوغندا
الكونغو
انجولا
رواندا
بتسوانا
زمبابوي
ناميبيا
11 دولة بحسب الكاتب الهندي يعتبروا املاك اثيوبيا في الزمن القديم!!
شفت ازاي؟!
-٧تابع

التأليفة دي ألماظ جدا و معرفش نوع المخدر اللي يوصل بني آدم إنه يكتب محتوى يمَلك فيه دولة ذات اطماع توسعية دول اخرى بالكذب لتبرير محاولاتها الخبيثة لبلع اقليم أرض الصومال من دولة جار وهى الصومال للحصول على منفذ بحري على البحر الأحمر(مستحق+حق قديم تم اغتصابه)دا بحسب الكاتب؟!
-٨👇

ملقيتش شيء منطقي يبرر هذا الهراء إلا إنه متهدد و أثيوبيا ماسكة عليه سيديهات!!
ليه بقى؟
لان منذ قديم الأزمنة اثيوبيا اللي هى اثيوبيا بشكلها واسمها الحاليين لم تكن موجودة اصلا🙈
ودي المفاجأة
-٩تابع

عرفت إثيوبيا في الكتب والمخطوطات القديمة باسم الحبشة (باللاتينية: Abyssinia)، اسم إثيوبيا اول من استخدمه رسمياً كان الإمبراطور الإثيوبي منليك الثاني، (1889-1913) ابو اخر امبراطور لاثيوبيا هيلاسلاسي اللي اتخلع عن العرش في 1974
-١٠تابع

و هو لفظ إغريقي من آيثيوبس بمعنى الوجه المحروق أو البني اللون، و ورد اللفظ مرتين في الإلياذة وثلاث مرات في الأوديسة.
واستخدمه بعض المؤرخين اليونانيين لوصف الأراضي الواقعة في جنوب حدود مصر، بما في ذلك السودان وإثيوبيا الحالية وبلدان الساحل الأفريقي.
-١١تابع

وأما اسم الحبشة المشتق من لفظ حبشت والذي ورد في التوراة فيعني الأجناس المختلطة والمختلفة إشارة إلى التصاهر ما بين الساميين الوافدين من جنوب الجزيرة العربية في غرب آسيا والحاميين الكوشيين من السكان الأصليين للبلاد.
-١٢تابع

يعني فكرة ان اسم اثيوبيا يجيي على خريطة في هذا الزمن دي تعتبر نصباية وتضليل تُحاسب علي السماح بنشره الواشنطن بوست ليه بقى؟
برضو من التاريخ الاثيوبي القديم +الحديث هتلاقي الاتي:
اثيوبيا ذات الاطماع وصاحبة اعلى ريكورد في الاغارة على جيرانها
-١٣تابع

سواء من خلال التحالفات او باستعمال الغشومية (قصدي القوة) لم تتغير مهما تعاقب عليها الحكام !
و نرجع تاني لمنليك الثاني اللي كان بينافس ملوك أوروبا على استعمار افريقيا فادعى السيادة على مساحات شاسعة من الأراضي التي بتشكّل دلوقتي أقاليم دول في شرق إفريقيا.
-١٤تابع

وصرح منليك بطموحاته التوسعية الاستعمارية اللي بتمتد حتى الخرطوم في خطابه الشهير لرؤساء و ملوك بريطانيا العظمى، وفرنسا، وألمانيا، وإيطاليا، وروسيا في 10 أبريل1891، واللي كان بيحاول فيه كسب اعترافها بأطماعه.
و دي احد خرايط القارة قبل العصر الاستعماري مفيهاش اثيوبيا اصلا!
-١٥تابع

ولجأ منليك للعاطفة الدينية لحشد تأييد وتعاطف القوى الاستعمارية الأوربية عشان تساعده في السيطرة على سواحل البحر الأحمر اللي قال بأنها قد وقعت في قبضة المسلمين
اه أصل الاثيوبيين بيستعملوا لعبة الأديان في حديثهم مع الخارج لحد النهاردة باعتبارهم (جزيرة مسيحية وسط بحر من المسلمين)
-١٦

و بتحقق لهم مكاسب على فكرة لحد النهاردة برضو!
وعشان اثبتلكم انه مش كلامي ولا مجهود مني في واقعة شهيرة في التاريخ السياسي الاثيوبي شكلت توجههم "حديثا" لانه كان قديما كدة برضو بس مبيحبوش يقولوا على النت 🤡
"الجزيرة المسيحية في بحر إسلامي" في أفريقيا
-١٧تابع

هو الوصف اللي قاله الإمبراطور هيلاسيلاسي على بلاده إثيوبيا لما زار امريكافي1954 وألقى خطابه أمام الكونجرس
اه قالها كدةومفيش اي اندهاش ومعايا منشور من سياسيين اثيوبيين بيعترضوا على تولي مسلمين مناصب قيادية باحزاب سياسية عملا بهذه العقيدة،سلم على الديموقراطية يا اسماعيين بيه🙈
-١٨

مش بيفكرك الكلام دا بحاجة قريبة وبلعت أراضي شعوب أخرى؟
نرجع تاني للقوى الأوروبية اللي خاطبها إمبراطور الحبشة مردتش على خطابه المذكور. وبعد 8 سنين، بدأت المفاوضات في 15 أبريل 1899 بين الإمبراطور منليك وجون هارينجتون، ممثل بريطانيا، لتحديد الحدود بين السودان والحبشة،
-١٩تابع

اللي بالمناسبة كانت بتتمحور حول مناطق شرق ووسط القارة قاصد سيطرته على اغلب السودان
تمسّك منليك بما اعتبره “الحدود الفعلية” اللي نصّ عليها في تعميمه إلى رؤساء الدول الأوربية بتاريخ 10 أبريل 1891. وقالك طالما أن بريطانيا لم تعترض على التعميم فإن سكوتها يعني الموافقة!
-٢٠تابع

لكن الانجليزي هارينجتون صمم على أن إدعاء دولة ما السيادة على بعض الأقاليم دون أن تُتبِع ذلك باستيلاء فعّلي، زي القاعدة المعمول بيها في القارة الإفريقية، غير كافي لان حاكم دولة مجاورة يعتبرها ملكه!
عيب بقى اصحى مش كل الطير اللي بتاكل لحمه😉🫣😱👊
-٢١تابع

واضطر منليك للتفاوض نظرا لموقف هارينجتون المتصلب(واعي للحركات دي،الانجلو ساكسون هما اللي بدعوها)
نفس الموقف اللي بتحاول اثيوبيا تخلقه مع الصومال:
يعني هو مضى ورقة مع جزء من الصومال بيحاول ينفصل ويكَوِن دولة، واعتبر انه طالما مضى معاها يبقى هو منحها اعتراف دولي
تعبوني فالشرح🤨
-٢٢

يبقى من حقه ياخد منفذ بحري ويعمل قاعدة عسكريةعلى أرضها والباقي ياخده بالذوق او بالعافية!
نتيجة التفاوض دا حصل في الاخر انهم وافقوا لمنليك على ابتلاع جزء من أقاليم السودان وهو "اقليم بني شنقول" اللي مقام عليه سد النهضة حاليا-اه يا جماعة البلطجة الاثيوبية خطيرة على جيرانها
-٢٣تابع

ولا يجوز الاستهتار بها لانها بتعرف تخلطها مع شوية تلاعب بالقانون وتحايل على الاوضاع مما يؤدي لانها بتبلع أراضي بلاد أخرى!
ودي خرايط بتوضح حدود الحبشةما قبل منليك الثاني وما بعدها وبرضو مكنش لها منفذ على البحر الاحمر و اللي بتفسر عدم اندماج الاقاليم الاثيوبية اندماج وطني
-٢٤تابع

ومفيش فمشروعات اثيوبيا السياسية متنفس لها بالنجاة
ونرجع لخربطة اوخريطة السيد الهندي ونقول انه فشل في الاتيان بخريطة تثبت حق اثيوبيا التاريخي في منفذ بحري زي ادعاء آبي أحمد أو غيره لانه بحسب الخريطة المزعومةملهاش منفذ على البحر الاحمر،منافذها على المحيط الهندي والمحيط الأطلسي!
-٢٥

نسيت اقولكم ان حضرة الهندي مش ذاكر مصدر الخريطة غير انه ناقلها عن المؤرخ البيزنطي 🤡
شغلانة المؤرخين دي دخلها هوا مؤخرا ناخد بالنا يا جماعة🙈
ما هو المؤرخ البيزنطي برضو مش حجة علينا و على العالم عشان اثيوبيا تاكل كل الاراضي دي او تمهد لضم أراضي جديدة!
-٢٦👇

خطورة مقال زي دا و غيره في صحيفة أمريكية شهيرة معروف توجهها اليساري المتآلف مع الادارة الديموقراطية الحالية في مبدا بتتبعه الولايات المتحدة واللي وراها من القوى الاستعمارية الحديثة هو انهم بيروجوا للافكار بالتمهيد عن طريق التوثيق الناعم اولا لأي فكرة عايزين ينشروها.
-٢٧تابع

بالرغم من ان الموقف الرسمي الامريكي أعلن بوضوح عن انه بيأيد الصومال وسيادته على كامل أراضيه،لكن ميمنعش يعني يكون له متلاعب يخدم مصالح اثيوبيا حليفته منذمنتصف القرن الماضي وكمان ذراعه المسيحي في القرن الافريقي!
والدليل هو سعادةوسيل لعاب الاعلاميين والباحثين الاثيوبين بالمقال
-٢٨👇

انتابتهم يا حرام حالة من النشوة المصحوبة بوافر من "فرط الحركة وتفلطح الشفة المنغولي" ويا عيني مش عارفين نرجع ملامحهم زي ما كانت!!
وبعد النفير بين كتائب الباحثين، هيتم نشره على كافة وسائل الاعلام، ومش بعيد يتعمل مواد فيلمية وثائقية
-٢٩تابع

وبالتالي يحدث حالة من اعتماده بالنسبة للرأي العام، يعني الشعب هيصدق ان دي أرضه فعلا !
خد عندك يا سيدي المقالات الصحفية بتُدرج ضمن المصادر لرسائل الماجيستير والدكتوراه والابحاث وهاتك بقى يا توثيق و تناقل بين الجامعات والمعاهد داخل و خارج البلاد حتى تثبت الفكرة على اطار واسع
-٣٠👇

نفس فكرة الافروسنتريك وطريقة طرحها بانك تخلق سيناريو ملوش وجود وتروج له ضمن المواد الاعلانية وتقوم بعدها بتبني قضايا فرعية تنسبها لمشروعها الاستيطاني الكبير-هو دا اللي بتعمله اثيوبيا في سيناريو أرض الصومال ونفس الحاجة عملتها في فرض احقيتها في بناء مشروع تنموي داخل اراضيها
-٣١تابع

بالمخالفة للمعاهدات الدولية والقانون الدولي- هى اخدت فقط جزئية الدولة ذات السيادة ونسيت القانون الدولي في المبدأ القانوني في الاستخدام المنصف والمعقول ل "النهر الدولي"
اعتمدت على دعاية المظلومة من جهة و الاستحقاق من جهة اخرى!
-٣٢تابع

اعتمدت على دعاية المظلومة من جهة و الاستحقاق من جهة اخرى!
وللاسف لم يتم التناول الاعلامي للشق القانوني من قضية سد النهضة في الداخل المصري بما يسمح للمتابع فهم ابعاد القضية والتلاعب المشين مش بس من اثيوبيا لا كمان ساهم فيه ضعف وتواطؤ المنظمات الدولية
-٣٣تابع

وتقول في فرق بين:
سيناريو فيه مشروع تنموي معمول داخل حدود دولة ذات سيادة
وبين
مشروع استيطاني هيتعمل بالمخالفة جوا حدود دولة ذات سيادة في بينا وبينها معاهدات دفاع ومواثيق مشتركة والحدوتين معمولين لمحاربتك
مهما تحاول تدخل المعلومة في عقول الناس المتعلمة اصحاب الدوكتورروهات
-٣٤تابع

للاسف مش قادر يستوعب الفرق
لدرجةاساتذة سياسةمش قادرة تفرق بين سيناريو فلسطين واسرائيل
وبين سيناريو العراق الكويت
وبين سيناريو الصومال واثيوبيا في تفعيل اتفاقية الدفاع المشترك في جامعةالدول العربية وليه الصومال توجهت للقاهرة!
يقولك خيبتكم ولو كنتو!
احنا بنعمل ممكن🤐لحد ما نخلص
-٣٥

خطورة رعاية وتبرير الشرعنة لإثيوبيا في انتهاك سيادة الصومال وتفتيت وحدته هتوصلنا لأمرين:
- أن تُقابل إثيوبيا الدعوة بأريحية المستعمر وتبدأ تبحث عن رعاة لعدوانها زي ما عملت في القرون الماضية
- أن تكرر أديس أبابا السناريو في مناطق أخرى..
-٣٦تابع

بمعنى آخر:
امبارح الفشقة السودانية
النهاردة أرض الصومال
بكرة عصب الإرترية
النتيجة: مصلحة اثيوبية مدعاه مؤقتة وفوضى إقليمية دائمة.
زي ما حصل في سيناريوهات أخرى!
وكل دا برضو بيخدم على حاجة اساسية لاي حاكم لهذا الاقليم المتغير الحدود والقوميات المسمى "اثيوبيا"
-٣٧تابع

وهو ان الممارسات دي بتحسب في خانةالانتصار الوطني والانجازات للحاكم بينما هى لالهاء الشعوب الاثيوبية عن المطالبة بحقوقها اوالالتفات لجرايم الحكومةالفيدرالية ضد اقاليمها زي ما حصل في الحرب على التيجراي والامهرة والاورومو
المنطقة كلها هتدور في فلك الفوضي لخدمة سيدالقصر الاثيوبي!
-٣٨

اللي هيفضل على مر العصور أداه في ايدين المستعمرين من خارج القارةسواء بالقوة او بمساعدةأدوات المستعمر المستحدثةلتطويع النظام العالمي لصالحه ونشوفه في منظمة الايجاد مثلا اللي بتساعداثيوبيا بانها تخلق موقف تفاوضي مع الصومال على أراضيها اللي مش تحت السيادة الاثيوبيةولا محتلة أصلا
-٣٩

الموقف دا تستغله أثيوبيا في صنع أمر واقع ملوش وجود أساسا!!
نشوفه كمان في موقف الاتحاد الافريقي المتخاذل من القضية الصومالية واللي استجاب للضغوط الاثيوبية وأخر نزول بيان الاتحاد الرسمي 72، بينما دول زي مصر كانت أسبق منه اللي جاء على لسان وزير خارجيتها
-٤٠تابع

تصريحات نارية واصفا المسلك الاثيوبي ،
"جاء ليثبت صحة وجهة النظر المصرية بشأن أثر تلك التحركات والسياسات على استقرار الإقليم وزيادة حدة التوتر في العلاقات بين دوله، حيث باتت إثيوبيا مصدراً لبث الاضطراب فى محيطها الإقليمي"
-٤١تابع

ومنظمات زي جامعة الدول العربية كمان دعمت موقفها ببيان قوى اللهجة! و دا بيأكد على نية "ممولين المنظمات اياها على دعم الموقف الاثيوبي لاحقا"
اثيوبيا مش هتنجح داخليا و دا بنشوفه بعينينا من بعد ما ابتدينا نتابع شؤونها مؤخرا مش محتاجين عليه دليل، هى دولة مديونة اقتصاديا
-٤٢تابع

ولولا الدعم الخارجي الخبيث كانت انهارت لانها اوهن من بيت العنكبوت.
دولة كلها بيتنازع مع كلها، مفيش نوع من السلام ولا الرغبة في التعايش، دا غير ما خلفته الحروب الاخيرة من متوالية ثأرية هتفضل تبحث عن منفذ عشان تنفجر حتما وقريبا.
-٤٣تابع

خارجيا مش هتنجح لانه لاول مرة في اقليم القرن الافريقي بنشوف تكتل ضدها من چيبوتى واريتريا والصومال في الاغلب كانت بتلعب على منطق فرق تسد حاليا هى في مرمي سهام الثلاث دول. كمان إقليمياً هنلاقي تحفز من القوى الاقليمية في المنطقة ضد اثيوبيا
-٤٤تابع

مع اعلان المواقف الرافضة بضراوة زي ما شفنا موقف مصر وتركيا والسعودية وجامعة الدول العربية دا غير كمان رفض قوة لا يستهان بها على الارض و هى جماعة شباب المجاهدين الصومالية اللي بالفعل اعلنت رفضها الاتفاق وهى عدوة لاثيوبيا وممكن تقوم باعمال عدائية واسعة ضدها.
-٤٥تابع

نقطة اخيرة
اثيوبيا اختارت توقيت خاطئ في تقديري الشخصي لاعلان رغبتها في الوصول للبحر الاحمر ، هى تصورت ان فوضي احداث غزة وتغول عصابات الحوثي الارهابية تشبه اجواء ثورة 25 يناير و الهشاشة السياسية اللي احدثتها ومكنتها من الاعلان عن سدها بسرعة .
-٤٦تابع

التقديرات الخاطئة اعطت المتحفزين لها فرصة للانقضاض الدبلوماسي اللي ممكن يتطور لحرب اقليمية مفتوحة غير مأمونة الجانب لدولة داخلها يعاني من سيولة أمنية وهشاشة سياسية كبيرة. الخطاب الإثيوبي الاستعلائي وتجاهلها لحقوق الاخريين ونبرة الاستعلاء مش هيخدم تحقيق اهدافها المزعومة
-٤٧تابع

لان دول كتير منهم الجارة رواندا محققين نماذج نجاح اقتصادي رائع برغم كونهم دول حبيسة، الشعوب الافريقية مش هتشتري خطابها الاستعلائي ولا المظلومية هى قدمت خطاب مش عارفة توازن فيه بين حديثها ذو النبرة العالية بالاستحقاق، وبين سياستها المهادنة بالمظلومية الخبيثة!
-٤٨تابع

لن يستسيغ العالم استخدامها للاخر الخارجي حل دائري مستديم لمشكلاها الداخلية- الفاتورة المرة دي تمنها كبير واللعب في البحر الاحمر من ادارة تتمتع برعونة شديدة مش مقبول حتى الاطراف الدولية اللي حاليا بتصارع في مياة غير دافئة بالنسبة لها!
-٤٩تابع

إثيوبيا هدفها واضح:
منحها نقطة انطلاق للتحكم في حركة الملاحة بالبحر الأحمر ومضيق باب المندب الواصل لقناة السويس،أمر موجه لتهديدالأمن المصري والقومي ومصالح مصر الاقتصادية والأمنية اللي بيدعمها من خلف ستار ويروج لها براحةومن غير دوشة قوى اكبر بكتير من البرڤان التاريخي "اثيوبيا"
-٥٠

استغلالا لضعف الصومال باستخدام نفوذ إثيوبيا بالصومال لصالح أجندتها
التسويق فاشل والاحلاف المدعوون للصراع المحتمل لن يدعموها في وجود اطراف قوية مش هتسمح بنشر افراس النهر المتوحشة في البحر الاحمر
طفح الكيل وامبارح مش هيرجع ومصر كمان تخطت مرحلة التهديد من زمااااان!
بقلم
#شيرين_هلال

@KhaledG94238883

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

نسخ سلسلة