🔱 السياحة في روسيا
كثير طلبني اتكلم عن رحلتي ل #روسيا
اليوم كتبت لكم #ثريد عن كل شي تحتاجه قبل لا تسافر بالتفصيل
☑️ احفظ التغريدة بتحتاجها بعدين
🔆 لايك وريتويت قبل لا نبدا
جهز الشنطة من الحين 🧳🇷🇺

1️⃣ التأشيره
طبعا قبل لا تسافر اي دولة لازم تعرف وش تحتاج عشان تدخلها.
لكن بالنسبة لروسيا تحتاج تأشيره تطلعها اونلاين ب ٣٥٠ ريال تقريبا من موقعهم، عن نفسي كلمت واحد وهو زبطها.
تقدر تروح اي محل او تطلعها بنفسك.

2️⃣ الطيران
اول شي عندك الطيران تقدر تحجز في اي طيران انت حاب.
تقدر تشيك على:
▫️تطبيق Wego
▫️تطبيق المسافر
▫️تبحث عن طريق قوقل
وتشوف ارخص طيران
بالاخير تروح لموقع الطيران الاساسي وتحجز منه.
عن نفسي لقيت طيران اذربجان ترانزيت في باكو بعدها تروح لموسكو، الحجز كان تذكرتين رايح وراجع.
💳 التكلفة: 2230 ريال

3️⃣ ورقة مهمه
وقت ماتدخل روسيا بيعطونك ورقة بيضة صغيرة بكبر الجواز. احفظها عندك ولا تضيع لانها مهمه جدا واذا ضيعتها ماتطلع الا لمن تدفع غرامة 200 دولار.
🔅 لا اخذتها خلها داخل جوازك

4️⃣ الفلوس
بالنسبة للفلوس أول شي تحولها للدولار او لليورو.
حول ل 3000$ حق 10 ايام تكفيك وزيادة.
لمن توصل روسيا تقدر تحول لروبل (عملتهم) مبلغ يكفيك حق التاكسي والفندق ولا تحول كل الفلوس لانه المطار تحويله اقل من المحلات في داخل موسكو.
حول 1000$ والباقي حولها بمحل ثاني بداخل موسكو بس مش امورك بالتاكسي وحجز الفندق عشان ماتبتلش وتريح شوي بعد السفر بعدين تقدر تصرف الفلوس براحتك.
من افضل اماكن الصرف في موسكو
Yandex:
Chestnaya klinika
Moscow, Mira Avenue, 79
yandex.com
Google map:
maps.app.goo.gl

5️⃣ البطاقة الإتمانية
طبعا هناك محجوبه الفيزا وماستر كارد بسبب المقاطعة بس متوفر عندهم UnionPay
بتلاقون بطاقة في بنك الانماء تقدرون تطلعونها وتحولون عليها ريال سعودي وانتم بروسيا وتروحون للصرافات الي عليها علامة UnionPay، وتسحب طبيعي من الصرافه بعمله الروبل.
طبعا الحركه ذي اشوفها اذا ودك تشتري شي بس ماكفت الفلوس تقدر تحول من حسابك طبيعي الى بطاقة الانماء وتفعلها وتسحب من الصرافه.
🔺ملاحظة مهمة
حد الصرافة لكل سحبة 10,000 روبل،
يعني اذا تبي تسحب 40,000 لازم تسحب ٤ مرات وبكل مره فيه رسوم على كل عملية سحب.
تقدر تفتح حساب في بنك روسي وتودع فلوسك بعمله الروبل وتصير تحاسب المطاعم والكوفيات بالشبكة.
عن نفسي فتحت حساب في بنك
Sberbank - скачать
وصرافاته بكل مكان.

6️⃣ اللبس والبرد
بالنسبة للبس كنت شايل همه وكنت متخوف من درجات الحرارة لكن طلع الوضع بسيط تحتاج تشتري من هنا ثيرمال تيشرت وبنطلون من محل كولمبيا وقفازات ثيرمال، بالرياض بتلقى المحل في النخيل مول.
الباقي لبسك العادي مع قبعة شتوية وشال وتقدر تلف الشال على فمك، الي شايف انه يتحسس من البرد فيه زي القناع تلبسه ويغطي فمك وخشمك وكذا بتدفى.
🔺ملاحظة
اي شخص يشوف مايتحمل البرد مره ما انصحه يروح روسيا لانه البرد في الشتاء مايمزح توصل الى 35- وافضل تروح نهاية الشتاء.

7️⃣ الإنترنت
عن نفسي اخذت باقة مدتها شهر فيها 10 قيقا كفتني وزيادة ب 950 روبل يعني تقرياكبا 9$ بس
مهم تاخذ الرقم عشان تقدر تسجل بتطبيقاتهم وتتتصل على الكوفيات والمطاعم للحجز.

8️⃣ التطبيقات المحجوبة
شغال معك كل شي بس ماتقدر تشغل
▫️Instagram
▫️Tiktok (ترند روسي بس)
▫️LinkedIn
▫️Twitter (X)
اذا تبي تشغلها استخدم VPN

9️⃣ التطبيقات الي تحتاجها
عندك اكثر من تطبيق تحتاجه هناك
▫️Yandex maps - بديل قوقل ماب
▫️Yandex Go - بديل لا اوبر
▫️Google translate - ضيف كيبورد لغة روسية عشان تترجم بسهولة
▫️Ostrovok - تطبيق لحجز الفنادق
▫️VPNProxyMaster - او اي تطبيق ترتاح له

🔟 خطة رحلتي
كانت ٦ ايام في موسكو واشوفها كافيه عليها مع الفعاليات و ٤ ايام في سانت بيترسبورغ للامانه اشوفه كثيره عليها وافضل يومين على ٣ بالكثير.
موسكو فيها اماكن جدا جميلة وخصوصا المشي فيها بالليل زينه الانوار في كل شوارعها ومن اشهرها الساحة الحمراء.
سانت بيترسبورغ اشوفها جميلة، اشوف التاريخ فيها افضل اكثر. مثل من اكبر المتاحف في العالم ومتحف دوستوفيسكي وغيره كثير.

1️⃣1️⃣ حجز الفنادق
بالنسبة لحجز الفنادق تبحث عن افضل الفنادق عن طريق تطبيق Ostrovok.
لكن يفضل تحجز من التطبيق والدفع عند الحضور، احيانا تقدر تكاسرهم وتاخذ سعر اقل.
بالنسبة لي حجزت في موسكو بفندق ماريوت.
Marriott Imperial Plaza
Краснопрудная улица, 12
yandex.com…
اخذته ٦ ايام ب 45,000 روبل يعني 450 دولار تقريبا غرفه لحالي king bed
اليوم كان ب 7500 روبل كان سعره جدا ممتاز ممكن تحصل اغلى بس حاول تكاسر معه.
الفندق الثاني كان في مدينة سانت بيتر سبيرغ.
Corinthia
Невский проспект, 57
yandex.com…
اخذته ٤ ايام وكان ب 30,000 روبل يعني 300 دولار تقريبا فخم والفندق على شارع السنتر كل شي حولك واخذت غرفة لحالي King bed
كان باليوم 10,000 روبل وكان فيه اكرامية يوم مجانا وطلب مني احط ديبوزت يعني زي مدفوعات محفوظه واودعت 3000 روبل فوق 30,000 حق السكن.
المبلغ مسترجع وتقدر تستخدمها في ميني بار وغسيل ملابس وغيره.
🔺نصيحة
لاتغسل ملابسك لانه قيمه الغسيل عندهم بالفندق تعتبر غالية مثلا القطعة حول 1500 روبل تقريبا بتكون ١٥ دولار
افضل انك تشتري ملابس جديدة ولا تغسل ملابس الا للضرورة فقط.

1️⃣2️⃣ الفعاليات
الفعاليات كنا نتواصل مع احد المنظمين للفعاليات وهو الي يحجز لكم رقمه بالواتس
7999555-95-88+
ملف الفعاليات:
sejda.com…
في موسكو كانت فيه فعاليات حلوة في مزرعة كانت فيها كلاب الهاكسي وركوب الخيل ودباب الثلج كلها في مكان واحد، اشوف جدول حلو لمن يكون قريب من الغروب بيكون المنظر اسطووري خصوصا ركوب الخيل او كلاب الهاسكي
عندك برضو فعالية هليكوبتر من اجمل الفعاليات، راح تستمتعون بجمال المنطر من فوق وخلوها على العصرية عشان تستمعون بجمال الغروب وانتم في هليكوبتر.
وفيه اكثر من فعالية بس ماسمحلنا الوقت، لكن المشي في شوارع موسكو في الليل شي خورافي ماراح تنسونه.
بالنسبة سانت بيترسبورغ فيه فعالية الحرب تركب دبابة وتطلق في الرشاشات هذي تكون كل يوم سبت.
وعندكم متحف في الساحة الكبيرة عند كولم تاور، برضو عندكم متحف للدبابات والطيارات الحربية وعندكم متحف سفينة حربية حرفيا تدخلون سيفنة حربية وتتمشون داخله.
يعني ممكن تخلون يوم كامل حرب في حرب 😂.

3️⃣ 1️⃣ المطاعم والكوفيهات
يفضل قبل لا تروح لهم تتصل عليهم وتحجز طاولة، بس لاحظت اذا انت روسي يدخلك علطول وسالفه الحجز احسها عناد.
مثلا حجزت لكوفي بعد يومين وبنفس يوم الحجز خوينا الروسي راح هناك واخذ طاولة بدون حجز.
لكن انت جس النبض وشوف اذا يحتاج حجز او لا
والمطاعم والكوفيات يسكرون الساعة ١٠ بليل، لكن فيه شارع سمعت عنه يقولك مفتوح ٢٤ ساعه بس مارحت له.

وبكذا انتهى اطلق ثريد بتشوف عن روسيا 🇷🇺
إن أحسنت فمن الله، وإن أسأت فمن نفسي والشيطان.
محتواي مخصص في #الامن_السيبراني لكن لعيونكم شطحت.
اذا مهتم في ثريدات بالامن السيبراني تابعني يشرفني اضافتكم:
@YasserREED