طول عمري كنت بتجنب الmainstreams والتريند وكان من ضمن الحاجات اللي تجنبتها كتاب فن اللامبالاة لما انتشر بسبب صورة صلاح وهو بيقراه، ومن شهر مكنتش لاقي حاجه أقراها فقررت اديله فرصة، اكتشفت حاجتين مهمين جدًا، اولا ان الكتاب عنوانه وان كان جذاب جدًا إلا انه بعيد تماما عن فكرة الكتاب>
اللي بيرسم صورة واضحة عن الشخصية السوية صاحبة المبادئ الغير متأثرة برأي الناس لان لها حدودها وأساساتها الصحيحة والمناسبة تماما لطبيعة الشخص وبيتكلم عن طريقة التعامل مع المشاكل من وجهة نظر انها مهمة لتطوير الشخصية اكتر منها عبئ الناس المفروض تتخلص منه>
الكتاب بيتكلم عن تجاهل رأي الناس فيك تماما والانكفاء التام علي ذاتك وتطويرها طبقًا لمعتقداتك الحقيقة وليس ما يعتقده المجتمع ممثلا في سوشيال ميديا او حتي الدوائر الاجتماعية المقربة من الواحد، وغيرها من الأفكار الكتير اللي تخليك وانت لسه في نص الكتاب تقول لنفسك انه >
لازم تقراه تاني لانه فعلا "بيجيب من الاخر" والقدرة علي تنفيذ أفكاره (اللي بتبتعد عن تحديد أسس محددة للشخصية السليمة) وبتتكلم عن أزاي أصلا يكون عندك أسس ومُثل صحية ليك ولحياتك. وتحول عندي لأهم كتاب قريته فعلا لانه كشف عن اي عوار كنت بعاني بسببه في وسط المشاكل والتعامل مع الناس>
ما علينا من الكتاب نفسه لان فعلا المساحة هنا غير كافية لسرد جماله وأهميته وقد ايه ممكن تمسكة وما تقومش غير لما تخلصه، الحاجة التانية اللي اكتشفتها انك لما تقرا الكتاب ده وتشوف طريقة صلاح وتعامله مع كل مشكلة بيقابلها اللي من ضمنها الهجوم المستمر عليه >
علي السوشيال ميديا وفي كل مناسبة، هتلاقي انه بيطبق الكتاب بحذافيره، وانه اختار نوع الالم وحجم المشاكل اللي يناسبة ويتحمله وابتعد تماما عن الاستعانة او التأثر بأي رأي او تجريح ممكن يأثر علي قدرته علي اتخاذ القرار المناسب له هو >
هتلاقي انه مش بيهرب من اي مشكلة او بيحاول يغير رأيه او تصرفاته عشان تطابق توقعات حد او مبادئه، ولما تشوف اللي وصله من نجاح ومحافظته علي نجاحه وتربط ده بطريقته المستمرة في "اللامبالاة" إلا باللي هو شايفه صح بغض النظر عن تفسير الناس لتصرفاته هتعرف انه فعلا بني ادم مميز >
لو صورة صلاح جنب شجرة الكريسماس تدل علي انسلاخة من جلدة او انه خرج عن الاسلام يبقي سفره يدل علي انه مش بيحب مصر ولا مهتم بالمنتخب، وهكذا من الأمثلة اللي هو كان يسمع فيها كلام الناس وانتقادهم ويخاف ويغير من شخصيته وتصرفاته، ويمشي ورا اللي يجنبه المشاكل ويريح دماغة >
بس ساعتها أنا متأكد انه عمره ما كان هيبقي محمد صلاح اللي نعرفه دلوقتي وكان هيروح ويرجع زي ما غيرة من اللاعيبة رجعوا او راح ونسي فعلا اصله زي ما لاعيبة كتير (منهم ناس بتشتمه دلوقتي) نسيوا اصلهم وراحوا جابوا الفيراري وربوا كرش ورجعوا مثلوا في افلام هابطه >
ساعتها مكنش مدرب اقوي فريق في العالم لسنين هيتكلم عن strong mentality بتاعة صلاح ولا كان زمايله هينبهروا به وكان هيحصل ماني علي بلد الشوال ويعبئ فلوس، صلاح في مشهد مباراة الكنغو كان مُلهم مش بس كمشهد لرياضي عدي بدراما في ارض الملعب، لا كمان كأنسان عدي في مراحل >
نفسية صعبة في ثواني ووقف علي رجليه مراحل في ناس بتقع فيها سنين وما تطلعش، اختلف مع صلاح هو مش اله ولا هو مُنزه عن الخطأ، لكن، اوعي تفتكر انك انت او انت او العقل الجمعي هيأثروا علي قرار من قراراته، احكم عليه انه خاين وعميل وكافر وهرب وجبان وبيتقمص >
بس اوعي تفتكر انك قريب بأي شكل من الاشكال لتكوينه النفسي او قوته العقلية، وخليك عارف انك في حالة انك بتكرهه وتتمناله الفشل ف هو مش هيفضل إلا لما يتهم برأيك، وانك لو بتحبو وزعلت منه انك هتقدر تفهم هو بيفكر ازاي، وده مش لانه مميز ولا جامد فشخ (وده حقيقي) بس ده لانه >
ببساطة إنسان غيرك ومختلف تماما وعرف كده واشتغل عليه وشخصيته تطورت وهو مُتسق تماما معاها بعيد تماما عن اي فكرة مختلفه عن مبادئ هو ارساها لنفسه من سنين، صلاح قدوة ومثل، مش في النجاح ولا الوصول للعالمية والشهرة والثروة >
صلاح قدوة في انه بني ادم صحيح النفسية له حدوده وقواعده ومبادئه اللي مسيطرة عليه بشكل لا يسمح لحدود اي حد انها توجهه، قدوة في انه اختار نوع آلمه ومعاناته ومشاكله وقرر يواجهها بدل ما يسيب السوشيال ميديا هي اللي تعمله مشاكله وتحدد شكل حياته.
جاري تحميل الاقتراحات...