الغربه مش مشكلتها انها مره زي ما كان بيتقال زمان...
#مشكله_الغربه_الحقيقيه؟!!
انها بتحولك الي كائن مشوه مش عارف انت بترتاح فين و لا ازاي.
طول ما انت مش في بلدك عايش في انتظار فتره الاجازه علشان تقابل اهلك و حبايبك ، بس طول ما انت في فتره الاجازه بتلاقي نفسك غريب وسطهم..👇

مشكله المتغرب انه داس Pause علي اخر مشهد ليه قبل السفر ، و لما بيرجع بيبقي عاوز يدوس Play لكن للأسف بيلاقي المشهد مختلف تماما، الأصدقاء بيتكلموا في مواضيع انت متعرفهاش، الأهل بيتكلموا عن مواقف و احداث انت معشتهاش، حتي النكت انت مش فاهمها علشان فايتك كتير من الأحداث 👇٢

انت بتبقي نازل و معتقد ان الناس حيقيدوا صوابهم شمع علشان يبسطوك الفتره اللي انت نازلها
إنما الحقيقة ان كل واحد فيهم مربوط في ساقيته و بيلف فيها ، و انت بالنسبه لهم عبأ عليهم، معاد جديد في أجنده حياتهم بس معاد هما مش مخططين له، و اللي بيجي لك مره مش هيجي التانيه👇٣

الناس اتعودت علي حياتها من غيرك و وجودك المفاجئ بيربك حساباتهم ،
بتكتشف لما بتنزل إجازتك انك غريب اكتر من غربتك في الغربه
و الغربه من ضمن تشويه كيانك بتعلمك تحزن في صمت
وفاه اقرب الأقربين إليك بتبقي مجرد خبر ، حزنك لازم يمر في صمت كل اللي مسموح لك في حزنك انك تبكي لوحدك👇٤

تبكي لوحدك لما تبقي لوحدك ، حتي فرحك بيمر في صمت ، مبتعرفش تحضن حد و لا تشوف لمعان عينيه و هو بيقول لك خبر سعيد، كبيرك مكالمة تليفون في وقت الحدث تهنئ بيها ، احاسيسك كلها بتبقي مكتومه جواك ، بتحزن جواك و تفرح جواك .
الصراحه #الغربه_مش_مره ... #الغربه_مسخ.
د. سلوى السوبي