كممارس مختص ومرخص ومصنف للكايروبراكتك فالمملكة العربية السعودية واستراليا بوضح بعض المفاهيم والنقاط المهمه فهالموضوع!
- الكايروبراكتك ليس العلاج الطبيعي اليدوي ولاتخصص تحت العلاج الطبيعي فهو تخصص منفرد ومختلف عنه.
- الكايروبراكتك دراسته ومسار دراسته ليس من كلية العلوم الطبية التطبيقية بل من كلية الطب وليس تخصص يؤخذ بدورات العلاج اليدوي بل بدراسة قد تمتد ل ٧ سنوات.
- الكايروبراكتك تخصص ليس بالتخصص الدخيل وليس بالتخصص الغير معترف او المبني على الجهل فهو تخصص له ابحاث واثباتات.
- الكايروبراكتك تشخيص ثم علاج ممنهج وقد يكون جزء منها (طقطقة) وليس كماهو منظور (طق) طلع صوت وتطيب.
- الكايروبراكتك قد لايصدر صوت (طقة) ولا(يطقطق) كل مريض يدخل عليه (واللي زارني العيادة يعرف هالشي).
- الكايروبراكتك ماهو طقطقة شديدة وعالية للرقبة فاللي فالمقاطع يبالغ علشان يصدر الصوت وهذا اللي قد يضر المريض ..

فالكايروبراكتور فالحقيقة تكون حركته خفيفة ناعمة وصغيرة ويتفادى الدوران الكامل او انحناء الرأس للخلف لسلامة الشرايين، فاللي نشوفه فالمقاطع قد يشكّل خطر على بعض المرضى فالصوت فالمقاطع هذي والمبالغة كلها علشان السوشيال ميديا

طيب نجي لجانب آخر .. هل تشكل خطر او جلطة؟
ايه نعم ممكن ولكن في حالات نادرة جداً وراح ادعم كلامي فالأخير بمجموعة ابحاث قوية من اطباء مختلفين منهم جراحين للعمود الفقري، مخ واعصاب، اوردة وشرايين تكلموا على انها آمنه ولاتشكل خطر وانها تكون في حالات نادرة جداً وغالباً تكون من غير مختص او حتى بعوامل اخرى مساهمه معها اما جلطة تحركت او امراض مزمنه مثل امراض القلب والشرايين وغيرها.

صحة الانسان مهمه واي تخصص طبي ممكن يستخدم على وجهين بمعنى اخر لو صرف الدواء من شخص غير مختص بكمية غير دقيقة المريض راح يتأثر بشكل سلبي، وبنفس الشي يكون على الامور الطبية الثانية لو تسوت عملية معينة و زادت جرعة التخدير راح تأثر على المريض وممكن تؤدي للوفاة هي نفسها نفس الكايروبراكتك او العلاج الطبيعي او العلاج اليدوي اذا تسوت عند شخص غير مختص وغير متمكن راح تؤدي لمثل هالمضاعفات

وفي الجانب الآخر من الصورة .. فيه اللي يقول ان العلاج وهم وغير مجدي ومبني على خزعبلات ولايوجد ابحاث تدعمه ولافيه قواعد وإرشادات .. تفضل هنا فيه مجموعة ابحاث تتكلم عن Chiropractic safety and effectivity وملف آخر فيه Guidelines .. لازم تشوف الجانبين علشان تحكم مو الجانب اللي تبي تشوفه فقط 🙏🏼