مواصلة لي ثريد العودة إلى اللا شيء
بعد إستقرينا في حي من أحياء مدني البعيد من السنتر برضو الجنجويد ما خلونا في حالنا قعدنا في بيت نسابتنا الجنجويد جونا المرة الأولى قالو عايزين بطارية يدورو بيها عربية المرة الثانية تلبو لينا جهارا نهارا في البيت وقالو لينا جيبو إثبات .
بعد إستقرينا في حي من أحياء مدني البعيد من السنتر برضو الجنجويد ما خلونا في حالنا قعدنا في بيت نسابتنا الجنجويد جونا المرة الأولى قالو عايزين بطارية يدورو بيها عربية المرة الثانية تلبو لينا جهارا نهارا في البيت وقالو لينا جيبو إثبات .
شخصية إنتو جيش وكيزان معاهم زول تالت قال ليهم خلوهم خلاص وكنا قايلين خلاص الموضوع إنتهى بس في نفس اليوم الساعة ١٠ مساء جونا تاني معاهم سلاح وقعدونا في الأرض وقلبو الصالون شالو زي 50 ألف وشالو تلفونات أخوي الإتنين قالو لي جيب تلفونك قلت ليهم إتنهب في المركزي بس كنت داسيه ..
عرفنا إنو خلاص بقى ما عندنا طريقة قعدة بعد د قلنا نركب الشارع ونمش بي شارع سنار ونحاول نقطع للشرق ومنها لي منطقة آمنة إتحركنا أسرة كبيرة مكونة من أربعة نساء وتلاتة أطفال وأربعة رجال مافي مواصلات في شارع سنار مافي راجل راكب عربية غير الجنجويد في البلد كلها مشينا بي رجولنا بس ..
لحدي ما وصلنا الشكابة قعدنا مسافة إرتحنا بعد داك واصلنا لمن وصلنا قنب الأسد القرى كلها فاضية أهلها هربو من بطش الجنجويد في الشارع لاقانا جنجويدي نزل لينا من العربية ومعاهو زي أربعة قال لينا أرجعو أهلكم القائد وصانا إنو ما نسأل مواطن وفي نفس اللحظة هو سايق عربية زول ناهبو ...
قال لينا خافو ربنا في الأطفال دي زلة ومهانة أرجعو مكرمين لي بيوتكم بالجد تحسو عايز يبكي من الحنية الجنجويد ديل أنواع في ناس فيهم تعاملهم محترم وفي ناس أولاد الحرام زاتو بسيطة فيهم المهم واصلنا طريق النزوح وسط الإرهاق وبكاء الأطفال وجر الشنط ونحن ماشين أكثر من 20 كيلو لمى فينا ..
متفلت تاني من الجنجويد سرق تلفون واحدة من النساوين ومبلغ 10 ألف في الشارع وقال لينا تستاهلو يا حرامية واصلنا شارعنا كأنو ما حصل شي من شدة ما إتعودنا علي النهب والزلة وصلنا تقاطع الحوش زي العصر كدا ونحن ماشين أكتر من ٩ ساعات واصلنا المسيرة وكنا عايزين نقيف في قرية نبيت فيها ...
قبل ما الواطة تضلم بسبب الإرهاق والمشي الكتير المسافات بقت بتتباعد بيناتنا وخلينا ورانا زي راجلين وبنت وطفل ما إنتبهنا إنو نحن بقينا بعيدين منهم إلا لمن حصلن قريب قرية الدسيس قلنا خلاص ننتظرهم تحت شجرة الناس ديل إتأخرو شديد فجأة لقينا أسر مارقة من القرية الكنا عايزين نبيت فيها .
قالو لينا الدعامة عايثين فساد في الأرض بنهبو التلفونات وبتلبو في البيوت ونحن مرقنا في المغارب عشان نرجع مدني قلنا ليهم مدني الوضع أسواء وأكعب المهم إتفقنا إنو نرجع لي منطقة الحوش ونتلم كلنا مع بعض وننوم في ميدان عشان نأمن النساء والأطفال ونحن راجعين جو جنجويد بي تاتشرات من سنار..
رفعو الأسر دي كلها وقالو ليهم بنوديكم مدني أها نحن قلنا ليهم نحن معانا ناس لسة ما جو خليناهم براهم منتظرنهم الدعامة حنسونا وقالو لينا الواطة بضلم عليكم في الخلاء أحسن ليكم أرجعو أبينا قامو مشو وقعدنا نفتش في الرايحين ديل ما لقيناهم إختفو عديل أثر ليهم ماف نضرب في التلفونات ...
والتلفونات مقفولة مافي فايدة خشينا في حالة من الهلع والخوف وتشتت الأفكار بي طريقة عجيبة الواطة ضلمت والبرد والدنيا ظلام ونحن في خلاء ضواحي سنار قلنا خلاص نرجع علي تقاطع الحوش في قرية هناك نبيت فيها الأطفال برجفو من البرد ونحن ما قادرين نمش من الإرهاق والجوع والعطش أنا كنت خايف
على الأطفال أكثر شي والناس الراحو مننا فجأة من ماف وقفت أكسنيين جايات من سنار سايقنها دعامة كشفو لينا وإستغربو ديل بشر ولا جن الماشين في ظلام وخلاء زي د ركبونا كلنا وأدونا بارد شايلنو وأدونا ساندوتشات طعمية وموز وبطانية للشفع ومبلغ 10 ألف ج أقسم بالله العظيم حسيت كأنو ربنا رسلهم
عشان ينقزونا لي بر الأمان قالو لي نحن جينا من سنار مشتبكين مع الجيش هناك قال لي أنا دخول مدني د ما راكب لي في راسي كنا قايلين الحرب دي حتنتهي في الخرطوم بس البرهان ما عايز يتفاوض وبعد جاتنا أوامر التحرك لي مدني ووصلنا وخشينا القيادة قالت تمشو تشتبكو مع الجيش المنسحب لي سنار ..
قال لي انا ما عاجبني الوضع د ولا الناس الماشة ونازحة في الشارع دي بس ما بتقدر تفتح خشمك بدوك طلقة في راسك طوالي عايزين الحرب تقيف لمن شفت عقليتو بالطريقة دي حكيت ليه بالحصل لينا من المتفلتين ياخ الزول د زعل زعل قال لي ديل مستنفرين بتاعين شفشفة تبلغ عنهم في أقرب إرتكاز برجعو ليك
حقك قلت ليهم في سري أنا حقي د بشيلو يوم القيامة منهم حسبي الله ونعم الوكيل المهم وصلونا قرية ومشينا علي المسجد الفيها لقينا شباب قلنا ليهم نحن أسرة قطع بينا الطريق وعايزين حتة نبيت فيها الليلة فتحو لينا الطابق الأول من الجامع ونمنا ما صحينا إلا بي صوت إشتباك بالدوشكا
الجنجويد مشتبكين مع متفلتين في القرية وقبضو منهم إتنين يعني الواحد بقى عايش في واقع كابوسي بي طريقة ما بتتوصف بس الحمد لله صباح اليوم الثاني قدرنا نتواصل مع الناس الراحو مننا طلعو بيتو في قرية قدام والحمد لله اليوم إجتمعنا بس للأسف لسة في مناطق الخطر والإشتباكات
الآن قاعدين مع أسرة بنحاول نرتب في الخطوة الجاية الحرب لازم تقيف مواطن الجزيرة بيتهم إنتهاكه كل يوم بكافة الطرق الممكنة أي كلمة أنا كتبتها في الثريد د عشتها وشفتها وربنا يسألني منها يوم القيامة الوضع فوق المأساوي وحالتي إختصرت مواقف كتيرة
جاري تحميل الاقتراحات...