المضحك المبكي في قصة…
أهلي في قرية ود الهندي (إحدى قرى ود مدني) جوهم الدعامة مرتين، المرة الأولى جو وطالبين بيت الأسرة بالاسم، وين ناس فلان، وصلوا البيت وخشوا وقالوا عاوزين مفاتيح العربات دي، طبعاً تحت تهديد السلاح، والبيت وقتها كان فيو أكتر من 5 عربات واقفة في الحوش
[1]

من العربات الموجودة، شالوا العربات العالية بس (برادو، توسان، ولاند كروزر) ورجعوا المفاتيح الباقية قالوا ما عاوزين باقي العربات - (تحلف تقول داخلين دلالة يشيل ويعزل) - وبعداك اتوكلوا
تاني يوم أثناء ما ناس البيت مارقين على سنار ومعاهم باقي العربات الصغيرة، لاقوهم الدعامة تاني
[2]

لاقوهم تاني وشالوا منهم باقي العربات الصغيرة، وخلوهم في الشارع ساكت مع دفار كان متعطل وكان ناس البيت رافعين فيو الحاجات
بعد شوية جو دعامة تانيين أظرف شوية، صلحوا ليهم الدفار، وساقوهم فيو، ورجعوهم القرية، وقالوا ليهم ما تطلعوا تاني وشالوا منهم الدفار والذهب الكان معاهم
[3]

بعد أهلنا رجعوا البيت، العصرية، جاهم قائد المنطقة، ودخل البيت، وقال ليهم نضفنا ليكم مدني من الكيزان، ارجعوا بعد ده بيوتكم عادي وما تخافوا
يعني أقسم بالله ضحك مبالغة، شالوا منهم أي حاجة وقالوا ليهم ارجعوا بعد ده
اللهم أجرنا في مصيبتنا وحسبنا الله ونعم الوكيل
[End]