جماعة كترت الأسئلة في ال DM عن طريقة الخروج من البيت وأنا شبكتي كعبة شديد م قادرة أرد ح أكتب هنا عشان الناس تستفيد إحنا لينا كذا يوم بنحاول نطلع واتصلت على نص أرقام الحافلات بقولوا م بدخلوا جوا مدني خطر بقت فا قررنا في النهاية إنه ح نمشي بي رجلينا طلعنا من الصباح 6:30 صباحًا
من مارنجان مشينا بي زلط مارنجان الجوة بتاع حلة حسن أو زلط المصانع مشينا مسافة طويلة صراحة ومتعبة شوية ب النسبة للناس الكبار وصلنا لحدي قريب للبنشر جاء بتاع حافلة قال م طالع بس بوصلنا لي قدام شوية ركبنا معاهو وودانا السوريبة أول م فيها حافلات بس كمية مهولة من البشر
بعدها قررنا إنه نطلع قدام مشينا الشكابة برضو هناك في ناس كتيرة نزلنا وقفنا معاهم وقفنا تقريبًا ساعة جات حافلة بس لازم الناس تكون سريعة وتحجزوا سريع لأنه الناس كتيرة خلوا حركتكم سريعة لو معاكم شفع رسلوهم يحجزوا ليكم سعر التذكرة لحدي سنار بي ٣٠ ألف بتمشي مسافة طويلة قرابة ال ٤ ساعا
وصلنا سنار نزلنا في موقف زحمة شديد ومليان بشر برضو وسماسرة بس حاولوا م تنزعجوا وتركبوا من أول سعر طولوا بالكم عشان م يستغلوكم الأسعار بتختلف شديد حسب مكانكم فتشوا براحة لأنه الإستغلالين مالين البلد لقينا القضارف سعرها من ٧٠/٨٠ ألف وبورتسودان بي ١٥٠ ألف وكسلا بي ٨٠/٩٠ ألف
وإتحركنا من سنار على الساعة ١ ولحدي هسى وفي الوقت الحالي إحنا في الشارع الطريق بدايته متعبه شديد وتراب اللي عنده حساسية من التراب واللي م عنده برضو يلبس كمامة ويدبلها لأنه التراب م بتجازف ولي مسافة طويلة قريب للفاو الطريق بقلب زلط وبعدها الوضع بكون أحسن شوية والشبكة بترجع قوية
طولوا بالكم وشيلوا الصبر لأنه الوضع صعب بس ربنا بفرجها عليكم وشيلوا معاكم بسكويت وحاجة فيها سكر لأنه بتتعبوا شديد م تخافوا من الدعامة لو لاقوكم قولوا ليهم إحنا معاكم وجاهزية واي حاجة بس في سبيل م يعترضوا طريق خروجكم لو سألوكم ربنا يخفف على كل زول ويسهل ليو طريقه خروج الله معاكم
جاري تحميل الاقتراحات...