بما ان التويت انتشرت وانا مكنتش متوقع وانا بكتبها ففيه حاجات مهم اقولها
- الحاجات دي انجاز كذا سنة متتابعة من الفحت والردم مكنش فيهم نتايج واضحة للي بعمله
- انا جيت من اللاشئ فمكنش لا عندي اي فلوس او دعم من الاهل يوصل لكل ده فانا كنت بنحت من الصفر
- النوع ده من الانجاز بيفشخ كل حياتك الاجتماعية والعاطفية وبالتبعية النفسية ومحدش هيستحملك من اهلك وصحابك بالساهل وهتفقد علاقات كتير وهتضحي بيها
- رغم الهيصة دي لو حد قالي اتخلي عن كل ده وابدأ من الصفر تاني بس يبقي معايا زوجة وحبيبة بتونسني هاوافق بدون تردد

انا جيت من كلية اسمها مش موجود اصلا عالنت! مكنش مسموح ليا امتحن معادلة اصلا! وقعدت سنة اعافر في كليتي يوميا شغل بال١٢ ساعة عشان تتحل! اشتغلت في مصر عشان اجمع فلوس لكل ده جنب كليتي وجنب امتيازي! اشتغلت شغل عادي واونلاين عشان اواجه ازمة الدولار! ضحيت بتكليفي وتعييني في الجامعة ونيابتي وده risk كبير لحد معندوش حاجة تسنده! حتي لما جيت امريكا جيت volunteer اصلا بدون مرتب وجيت بمبلغ اكسف اقوله يتقال مجنون واتضطريت اجيبها من تحت هنا زي مجبتها من تحت في مصر لحد ما ربنا شاء يفتحلي رزق من عنده

احنا بنكلم في نتاج ٤ سنين من العمل المستمر وزيادة مصادر دخل عشان تغطي المطلوب وتوجيه كل مصادر الدخل وكل مليم للهدف وكل وقت متاح بيتحط للمذاكرة للطريق ده وكل تفكير وبال ومزاج وشعور بيتوجه للهدف ده! واي حاجة تعرقل ده كنت بفرمها عن سكتي! المقصود محدش بيعمل حاجة بين يوم وليلة او سنة ولا سنتين هي مسألة نفسك طويل اد يه ومنضبط وقاسي مع نفسك عشان هدفك لحد فين

وسط كل ده فيه حاجات وقعتني اكيد مكتبتهاش وفيه معايير اخلاقية كانت بتخليني اخد اصعب طريق والطريق اصلا صعب لواحده! زي اني ماشتغلش اي حاجة طب وانا في الكلية والامتياز عشان اجيب فلوس وانا مش طبيب مؤهل يلمس عيان لسة! زي اني ماشتغلش اي حاجة فيها شبهة حرام! مش بس الطريق صعب ولكن لو هتتقي ربنا اوي اوي هيبقي اصعب ١٠٠ مرة في المشقة والجهد وابطأ في الوصول واقل في الفرص المتاحة والقيمة المادية اللي باكسبها

فيه مواقف كان لازم اسيب اللي بعمله وامشي عشان كرامتي بتنقح عليا من اقل موقف مهين في مصر او هنا وكان لازم ابقي مسلم وواثق بان الرزق واسع وانا في وسط الازمة وانه مش محدود في اللي اترمالي وبعمله الوقتي واني هالاقي بكرة غيره عادي وربنا هيفتحلي مليون رزق وان هاخد قراري بكل شجاعة وانا بابنيه علي النقطة دي وبس بدون اي خوف من اي عواقب اكتر من مجرد ها يا احمد هنتصرف ازاي ونجيب حلول في الواقع ازاي؟!