الانسان ممكن يعمل الصح بطريقة خطأ تسبب مشاكل كبيرة رغم ان قراره صح
امثلة :
شيل اليفط قرار صح بس الطريقة كان ممكن تعمل بيان او تجتمع مع اسر الناس و تقول كل الاحترام للرموز بس هانعمل حاجة افضل وتمنع تصوير اليفط ع الارض لكن انت اختارت الطريقة الغلط بالتالى اصبحت اسر كبيرة غاضبة

وسببت مشكلة بدون مشكلة داخل الجمعية العمومية فمثلا اسرة المستشار جلال ابراهيم كتلة كبيرة داخل النادى يبقى كان ايه لازمته وهل انت ناقص مشاكل
مثال اخر :
حضرتك بتفاوض مدرب لما تتسأل فى الاعلام لا تنفى ولا تأكد اسكت لكن لما تنفى وبطريقة مش حلوة المدرب يزعل لان بيكون شكله وحش

كأنه فارض نفسه عليك ومش لاقى شغل بالتالى هايطلع يكدبك وعشان يثبت انه مطلوب ارسل محادثاتك للاعلام .
طب كان ايه لازمته ماكل اندية مصر بتفاوض ومش بتنفى ولا تأكد خد عندك مثال كامل ابو على بالمصرى فاوض كام مدرب خلال الفترة الماضية هل طلع نفى او اكد بالعكس سكت لحد مااستقر

فى النهاية حابب اقول ان فى اعلام منتظر اخطاءك وفى معزول بيتحرك وفى كتير مش حابين التجربة انت بقى لازم كل خطوة تخرجها كويس لان فى بلدنا اخراج القرار اهم من القرار نفسه وصحته والمجلس ده لو فشل هاندخل فى سنين من القرف تانى الله اعلم هاينتهى ازاى
ركزوا وبلاش نخلق مشاكل بدون داعى