الاسرة دي ربنا كتب ليها عمر جديد ،والحمدلله الشاب دا قدر يقيف على حيله وللاسف فقد الرجل 🦿، مضروب من بداية الحرب دي ، اها لقيت القصة حقتهم وفرحت شديد لما عرفت ما فيهم زول مات والله حسيت بيهم اهلي الحمدلله ❤️
القصة : 25 رمضان 1444 هـ
16 أبريل 2023
الموافق ثاني يوم في الحرب
بقلم: ود الصول
بعد ما طفح بينا الكيل في حلة حمد بسبب التدوين المستمر واصوات الثنائيات والمدافع والصواريخ و التربص بينا داخل بيوتنا وفي كل الشوارع والجحور من قبل الدعامة وفوق دا كلو قطع الماء والكهرباء لمدة يومين متواصلات بعد إلحاح من الوالدة قررنا نمرق من البيت ونمشي أنا وأبوي وأخوي وائل لي شمبات منزل عمنا وأمي وأخوي النور لموقف شندي للتوجه لي أهلنا هناك ركبنا عربيتي بعد ما شلتا تلفوناتي بس ومعاهم شاحن وكذلك باقي اخواني ما عدا النور الشال معاه غيارات هدوم لأنو على سفر هو والوالدة أما أنا ووائل وأبوي فلا فقط بي غيارنا اللابسنو على أساس الحرب هتنتهي في نفس يومنا الطلعنا فيهو

المهم قبل نتحرك بتذكر كان في دعامي تحت شجرة حديقة البيت وقال لي عطشان عاوز موية خشيت جبت ليه العندنا وطلعت ركبت العربية وأتحركنا على وجهتنا بتقدير مني إنو نمشي بشارع المزاد بي جوا الاملاك لانو الوقت داك كان في ضرب على جهة المظلات وشارع السيد علي وطول الطريق داخل الحلة كلو دعامة المتحركين على ارجلهم والمتحركين بي تاتشراتهم وشايفين العربية وهي ماشة براحة من دون الإعتداء عليها الحمدلله لغاية وصلنا تقاطع كهرباء الأملاك مع شارع أبو الفاضل الخلفي هناك بالزبط بتذكر أخوي الصغير قال لي إنو في دعامي كان واقف محل المكنيكية مع رفاقو عمر سلاحو وبعد كلامو مباشرة ضربونا قرنوف من دون سابق إنذار ولا حتى كلمة أقيفو أو (ثابت) ما قالوها لينا طوالي ملو العربية ذخيرة وأنا مخلوع أنو احنا عملنا شنو وليه ضربونا نار واحنا ماشين براحة كده؟!! أول رصاصة جاتني قطعت عضلات الفارات (السمانة) لرجلي الشمال بتذكر اني شفت عضم الساق شدة ما الجرح كان عميق والدم مالي العربية تحت منها أنا طوالي فكيت رجلي من الفرامل وأنا ما واعي ومخلوع ضغطت على الأبنص بسبب الهلع والخوف (غريزة البقاء اظن)

وقبل حتى ما العربية تزيد سرعتها لحقونا رصاص لا ليهو بداية لا نهاية منها جاتني طلقة ورايش في ضهري وأنا هنا بقيت احاول أضغط فرامل بس ما قادر لأنو رجلي إتعوقت شديد وفي نفس اللحظة ضهري ما قادر أحركو وأنا متوتر شديد بسبب كواريك أخواني الصغار وراي وبكى امي وهم لسع بضربو فينا لغاية ما العربية وصلت تقاطع الNNT شارع موقف الحاج يوسف مع البلدية وهناك رفقانهم ما قصروا معانا واصلو مع أخوانهم ضرب في العربية بكلاشاتهم بتذكر إني لي أول مرة في حياتي أتمنى إنو كلنا نموت أنا وأمي وأبوي وأخواني الأتنين المعانا يا نموت كلنا يا نحيا كلنا لأني عارف لو فينا زول مات أمي ما حيجيها خير وإحتمال تجن وتموت بعدينا حسرة وزعل وتقول هي السبب حتى أنا وأخواني وأبوي ماف زول حيتحمل موت واحد من العيلة بالطريقة دي المهم وأنا بجاي بقيت بحاول أوقف العربية ضغطت على زر البصمة أبطل المحرك عشان تقيف بطلتو والعربية لسع ماشية بسبب السرعة الشديدة الكانت منطلقة بيها ما وقفت طوالي فالحمدلله أبوي قام بقى يلف مني الدركسون لغاية ما العربية إصطدمت بعمود لي سوداتل وإنقلبت

وبعد ما إنقلبت الدعامة لسع بضربو فيها وجو جارين علينا بكلاشاتهم عشان يشوفونا ديل منو الحيطلعو من تحت العربية دي وهطلعو ميتين ولا حيين لما نحن جينا منسحبين من تحت العربية مليانين دم وأجسامنا بتنزف كلها وقفو ذخيرة وبقو واقفين يعاينو بتذكر إني وأنا بحبى في الأرض وملان دم بقيت اكورك فيه ليه عملت فينا كده يا جنابو إحنا عملنا شنو ؟ "
ما ردا لي بقى يعاين بس بتذكر إني بقيت أتشهد خلاص وحسيت اني حموت لأنو الدم كان بنزل من ضهري ورجلي كتير وبقيت بس بقول "أشهد أن لا إله الإ الله ،أشهد أن لا إله الإ الله " بعد أمي طلعت من تحت العربية بقت بتكورك وهي شايفانا مضربين وكلنا دم وبتتمنى لو نحن ما طلعنا من البيت و بتقول هي السبب وهي القتلتنا لأنها كانت مصرة نطلع ونمشي ما نقعد في الحلة وأنا بحاول أهديها وأقول ليها دا قضاء وقدر وما غلطك يا حجة ولو كنا في البيت ما معروف إحتمال كان تجينا دانة ولا صاروخ واقع ياها قسمتنا وما بتفارقنا وكلو مسطر ومكتوب الحمدلله

مع الكواريك دي الدعامة خلونا ومشو قام جونا تجار السوق بتاعين الخضار ودكاكين الجملة جارين يسعفونا بتذكر شالونا فوق الدرداقات أنا وأخواني الإتنين من موقف الحاج يوسف لغاية مستشفى بحري التعليمي عشان يسعفونا ما قصروا والله ليهم التحية كلهم فردا فردا ربنا يجزيهم الخير ودكاترة المستشفى ما قصرو معانا عملو لينا نضافة للجروح ونقلونا من هناك على مستشفى البراحة لأنو حالتنا كانت بتستدعي عمليات نحن التلاتة فالحمدلله وصلنا باسعاف للبراحة وهناك طلعو مننا الرصاص ورايش الرصاص وكانت الاصابات كالاتي:
النور: ٤ رصاصات وحدة في اليد اليمين و٢ في الرجل السمال ووحدة في الرجل اليمين قطعت ليها شريان رئيس
وائل: رصاصة كسرت أصابع رجلو الشمال عدا الإبهام
أنا: رصاصة قطعت عضلات السمانة ورصاصة هبشت السلسلة الفقرية وما اخترقتو الحمدلله ولا كان جاني شلل كامل ورايش في الضهر قرب يخش الصدر
أمي: رايش في الكتف
أبوي: حريق فوق كف اليد الشمال

أخوي النور كان اكتر واحد فينا إتصاب وحالتو حرجة ومحتاج تدخل جراحي طوالي على وجه السرعة بعد مشينا لي مستشفى البراحة وبإستهتار منهم ومن دكتور معاذ بتاع الأوعية والشرايين عشان حضرة سيادتو خايف على نفسو يتضرب في الشارع وهو ساكن الشعبية اللي كانت بت خالتي تمشي وتجينا منها أكتر من مرة عادي وتاني يوم الصباح عملو ليهو إستدعاء لأنو خلاص الحالة بقت حرجة شديد والرجل بقى ما يصلها دم تحت وحتى قالو ليها بنجيبك ونوديك بي عربية إسعاف رفض تماما وقال ما بخلي بناتو في البيت براهم " يعني ما كان ممكن تجيبيهم معاك؟"
بتذكر أنا في نفس اليوم الوصلنا فيهو المستشفى كنت بحنس في دكاترة المستشفى والمدير الطبي انو ممكن نفتش طبيب اوعية وشرايين تاني ما الا دا كانو بقولو لي باستهتار بجي ما تشيل هم باقي الليل دا بصلنا و لغاية اسي ما وصل ...!!! (حسبي الله ونعم الوكيل في الدكتور و فيكم"

بعد إتاخر لي تاني يوم دقينا لدكتور تاني ومشينا جبناهو لحدي المستشفى ولقضاء الله وقدرو قال إتاخرنا شديد والرجل لازم تتبتر وقد كان والحمدلله على كل ربنا يجعلها قدامو في الجنة ويصبرو ويقويه قدر الله وماشاء فعل ولا نقول الإ ما يرضي الله قسمتنا وماف زول بقدر يفارق قسمتو وربنا ينتقم من الجنجويد المرتزقة.