نعمة ما لاحظتها الا متأخر لكن اشكر الله كل يوم عليها
وهي أن قلبي صار راضي، والله ماكنت كذا أبدًا مهما تصفقني الحياة وتصير أشياء عكس رغباتي اظل هادئة! واقول الحمدلله رب الخير ما يجيب الا خير
هل معناه اني ما أحزن؟
لا أكيد أحزن لأني بشر في النهاية، بس قلبي راضي لأني أعرف..

أن الله متكفل بأمري
قبل فترة ليست بالبعيدة كنت اسخط واكتئب كل ما خسرت أو ضيعت فرصة أو حلم
الحين صرت اؤمن أن الله سبحانه وتعالى عنده خطة وتدبير أفضل من خططي واختياري
واللي يختاره الله بيمشي علينا كلنا سواءً رضينا أو لا
لكن الرضا يضمن لنا راحة البال والهدوء والطمأنينة

الرسول ﷺ قال:"إن عِظَمَ الجزاءِ مع عِظَمِ البلاءِ، وإن الله – عز وجل - إذا أَحَبَّ قومًا ابتلاهم؛ فمن رَضِيَ فله الرِّضَى، ومن سَخِطَ فله السُّخْطُ"
والأماني والأحلام المنتظرة مب لازم تجي بالطريقة اللي نبغاها
عادي جدًا تجي بطريقة أخرى ربنا يشوفها صحيحة ويخليك تكسب أمور كثييير تنفعك في دنيتك وآخرتك مب بس حلم دنيوي وخلاص!