رتبها

🇪🇬ماهو الفرق بين الشعب المصري والشعوب الأخري🇪🇬
مقال مهم .......محتاج تقرأه بهدوء وصبر لانه طويل ، بس يفهمك حاجات كتير استنادا على كلام علمى تماما
عادة ما نفكر ان الناس زى بعض ، وان اللى يناسب شعب ما ، يناسب الكل ، وعلى اساس هذه النظريه ، يقول دعاة الديمقراطيه الغربيه بضرورة👇

تطبيقها فى كل العالم (بشكلها الغربى) ما دام نجحت فى الغرب !
لكن
هل كل الناس زى بعض فعلا ؟ ام ان الشعوب تختلف عن بعضها فى طريقة التفكير ؟
هل هناك فروق جوهريه بين (طباع) و ( طريقة تفكير ) الشعوب ؟!
وهل فيه وسيله (( علمية )) لدراسة هذا الامر و الاجابة على هذا السؤال ؟👇٢

🔔الموضوع ده جاد ، محتاج قراءه هاديه ورايقه ، هو طويل شويه بس مهم ، لانه ممكن يساعدك على تفهم اشياء كتير بتحصل لنا ، وتحصل لغيرنا فى السياسه والاقتصاد و غيره ، انا بوضحلك الواقع باسلوب علمى بحت ، ومبقولش الواقع ده ( حلو ولا وحش ) انا مبقيمش ، انت لك التقييم النهائى !👇٣

🔹فيه بروفسور اسمه هوفشتد ، عمل دراسة عظيمه وشامله لعدد كبير من الشعوب لقياس (( الثقافه الوطنيه )) لكل شعب او ما اعتبرها " البرمجة الجماعية للعقل التي تميز أعضاء مجموعة واحدة أو فئة من الناس عن الآخرين " ، يعنى العقل الجمعى لكل شعب
🔸هوفشتد وضع 6 معايير لقياس هذا الامر 👇٤

كل معيار يقاس من صفر الى 100 ، وانا هنا هحاول اقرب وابسط الفكره للقارىء العادى وليس المتخصص ، وسنتفادى الدقة الاكاديمية المزعجه عادة ، خصوصا ان المعايير دى لها تفسيرات مختلفه فى كل سياق عشان محدش يطلعلى فى كومنت يقولى ده المعيار الفلانى له معنى مختلف ، لان لسه قايله اهو👇٥

ان فيه اكتر من تفسير لكل معيار حسب السياق ( يعنى الكلام عن البيزنس او الاقتصاد ، قد يكون غير العادات الاجتماعيه كمدلول احيانا ) ، ماشى ياعم ؟!! ربنا يهديك ، تعال نبدأ
1- السلطه وتقبل وجودها : كلما زاد الرقم يعنى هذا ان المجموعه تتقبل وجود السلطه بل وتبحث عنها ، والمجتمع نفسه👇٦

( ترتيب هرمى) حسب السلطه من فوق لتحت ، وكلما قل الرقم معنى كده ان الشعب لا يتقبل كثيرا هذا التواجد السلطوى الكبير ، بالبلدى لماتلاقى الرقم اكتر من 50 فده معناه ان الناس دى عاوزه السلطه و بتهتم بوجودها ( سلطة الاب ، مدير المدرسه ، مديرك فى الشغل ، الوزير ، الرئيس )👇 ٧

ومتحسش بالامان غير فى وجود تلك السلطات ،و السبب انها بتحملها مسئولية كبيره فى اتخاذ القرارات المهمه
2- الفرديه مقابل الجماعيه :يعنى كلما زاد الرقم يعنى زيادة اهتمام الفرد بنفسه واسرته المباشره ( فقط) وليس غيره ،يعنى ينحرق ابن عمه او بنت خاله ده لا يعنيه كثيرا ومهواش مسئوليته👇٨

انما مسئوليتهم هم ، هو بيركز حياته على نفسه وعلى زوجته واولاده تقريبا فقط ، حتى ابوه وامه بيعتبرهم مسئولين عن انفسهم فى اغلب الاحوال ، و لما الرقم يقل يعنى ان الفرد مهتم بالاقارب و المعارف والاصدقاء ومشغول بهم ، وتفكيره فى ( احنا ) اكتر من انا ، لما بيفكر يعمل مشروع👇٩

تلاقيه بيفكر فى اخواته و اولاد اعمامه ، واصدقاءه و ازاى يجمعهم وهكذا ، واحيانا بدل ما يفكر فى شغله ، يفكر فى شغل الوزير او رئيس الجمهوريه!
3- الذكور والانوثه : دا وصف رمزى لا اكثر ، الذكوره مقصود بها معايير معينه ، اللى هى اهتمام المجتمع ده بمعايير القوه و البطوله و الانجاز👇١٠

و التصميم على النجاح والتنافس والبقاء للاقوى ، ام الانوثه اللى هى معايير اخرى زى الاهتمام بالضعفاء والفقراء و الفئات الاكثر احتياجا والتعاون والعمل لتحسين الحياة ( وليس العمل من اجل نجاح اقوى وافضل ) ، الرقم الاعلى يعنى معايير ذكوره اقوى👇١١

4- تجنب الغموض وعدم اليقين : شعور أعضاء المجتمع بعدم الارتياح إزاء عدم اليقين والغموض. القضية الأساسية هنا هي كيف يتعامل المجتمع مع حقيقة أن المستقبل لا يمكن معرفته أبداً: هل ينبغي لنا أن نحاول السيطرة على المستقبل أم أن نتركه يحدث وسنواجهه ؟ هل سنتقبل افكار جديده غير مجربه👇١٢

ام نفضل المضمون ، هل نقبل التجديد ام نخشاه ونهرب منه ؟! هل نقبل السلوكيات الجديده ام نفضل التقليديه ؟ الرقم الاكبر يعنى زيادة فى (( تجنب عدم اليقين )) يعنى نقول بالبلدى البعد عن المخاطره ورفضها و تفضيل البقاء فى الجانب الآمن 👇١٣

5- النظره طويلة الاجل : يعنى هل تخطيطك يكون طويل الاجل ام قصير الاجل وعادة الشعوب التى تسجل رقم منخفض ( نظرة قصيرة الاجل ) تكون رافضة للتغير فى العادات او تغيير السلوك ، بينما ذات الرقم العالى تفضل توجيه الاهتمام لما سيغير المستقبل وتضحى بالكثير فى الحاضر من اجل هذا المستقبل👇١٤

6- التساهل فى اشباع الحاجات الانسانيه ، وقدرة افراد الجماعه على اسعاد انفسهم ، كلما زاد الرقم زادت قدرة الافراد على اشباع حاجاتهم وكلما نقص كان الفرد اكثر خشية من انتقاد المجتمع له اذا اشبع رغباته او اسعد نفسه بالطريقه التى يريدها ، يعنى نقدر نقول بالبلدى كلما زاد الرقم👇١٥

كلما كان الشعب ده ( فرفوش و بيقدر يبسط نفسه ومش خايف من انتقاد الناس ليه لان محدش بيبصله او مهتم باللى بيعمله ولا هينتقده اصلا ) بينما كلما انخفض الرقم ( كان الشعب ده كئيب ونكدى ، لانه خايف من بعضه ، كله قاعد ينتقد كله ، وكله خايف من النقد ده ، وبالتالى مفيش اشباع كافى)👇١٦

⭕لاحظ ان النقط دى كلها اجتماعيه ، يعنى بيتكلم عن الشعب نفسه ، وطباعه ، وطريقة تصرفه فى المواقف المختلفه ، لكن تقدر تفسرها فى الاقتصاد والسياسه و البيزنس لانها هتفسر حاجات كتير
🔔هتلاقى فى صوره مع البوست عباره عن رسم بيانى بيقارن بين اربع دول فى المعايير الستة دول👇١٧

الدول اللى انا اخترتها هنا هى مصر و الصين و المانيا ولبنان
سبب الاختيار ، هنا دولتين عربيتين فى نفس المنطقه ، ظروفهم الاقتصاديه متقاربه ، عشان الامور تبقى موحده ، فلو ظهر اختلاف كبير هيبقى سببه داخلى ، من الشعب نفسه لان الظروف متقاربه جدا ، اى عيوب او مميزات هتبقى من الشعب👇١٨

وليس من الظروف المحيطه
الصين ممثلا عن الشرق الاقصى ، الصين التى يعجب بها الكثيرون ، من المفيد ان نرى طبيعة شعبها بالمقارنه بنا ، لان ده عامل لا يمكن اهماله عند تقييم تجربتهم الاقتصاديه او السياسيه
المانيا اخترتها ممثلا عن الغرب ، المانيا اصل القبائل الجرمانيه👇١٩

التى تحكم العالم الغربى ويصل تاثيرها شرقا الى شمال الهند ، اعتقد انها مثال مناسب جدا لتمثيل الشعوب الغربيه ، اضافة الى انها شعب يلقى احتراما كبيرا من المصريين والعرب وبالتالى نقدر نفهم ايه الفروق المجتمعيه اللى ساعدتهم و عوقتنا👇 ٢٠

طيب ايه اللى انت شايفه فى الرسم البيانى
1- عامل السلطه : هتلاقى ان باستثناء المانيا ، فكلنا عندنا عامل مرتفع واعلى رقم كان عند الشعب الصينى ده يوضحلك ان التقدم الصينى وعدم التقدم المصرى صعب ترميه فى حجر السلطه عموما ، لان العامل مرتفع عندنا وعندهم ، الشعبين بيحبوا تواجد سلطه👇٢١

سلطه بقوه ، فى كل اجزاء المجتمع من فوقه لتحته ، والصينين اكتر مننا كمان ، يعنى نقدر نقول لو هذا العامل معوق ( باعتبار المانيا منخفضه جدا فيه ) فهو لم يعق الصين واى محاولة للقول انه معوق لمصر هيبقى تبرير ، الصين كمثال تنفيه بوضوح ( ملحوظة اليابان وكوريا الجنوبيه👇٢٢

لهم ايضا معامل مرتفع فوق الخمسين لكن اقل قليلا مننا )ده يفهمك ببساطه ليه انا مثلا شايف ان السلطه مش هى سبب تخلفنا !!
2- الفردية : الصين ومصر تقريبا زى بعض ، الشعبين لهم نفس الصفات تقريبا برضه واهتمام الشعبين بالاسره والمحيط العام من اصدقاء واقارب ومعارف كبيره جدا 👇٢٣

( ملحوظه كوريا الجنوبيه ايضا تحقق رقم مقارب 17 ، اليابان تحقق معامل اعلى قليلا 45 ، لكن لا يزال تحت الخمسين ، ما يشير الى التغير الاجتماعيه التى حدثت بعد عملية التغريب عقب الاحتلال الامريكى التى شرحناها فى سلسله كامله م وعلى فكره قريب كده جدا من الشعب اللبنانى اللى تقريبا👇٢٤

الاكثر اقترابا من الثقافه الغربيه فى الدول العربيه ) برضه ده ربما يساعد على تفسير الانتشار اللبنانى فى الخارج فى كل القارات بشكل مدهش وقدرتهم على الانفصال و الفطام من الدوله الام بسهوله اكبر من المصرى الذى يفضل دائما العوده لوطنه وعلى ما يبدوا ان الصينى والكورى مثله تماما )👇٢٥

الالمان والغربيين يمثلوا وضعا مختلفا تماما ، الفرديه هنا تحكم كل شىء
3- الذكوره : هنا نحن امام شىء مدهش حقا ، انفصال كامل للمصريين عن الباقين ، معايير الذكوره التى شرحناها من قبل ، هى الاقل فى مصر لصالح معايير الانوثه ( راجعهم لو نسيت ) بينما كافة الشعوب الاخرى👇٢٦

الصين و لبنان و المانيا تحقق نفس النتائج تقريبا ( ملحوظه اليابان تحقق رقم مذهل يصل الى 95 ) اى ان تلك الشعوب تقدر القوه والنجاح والتصميم وهى المحرك الاساسى للتفكير هناك اكثر من معايير
التعاون والتكافل و العطف على الضعفاء مثلا وهى المحرك الاساسى فى مصر 👇٢٧

(الضعفاء يشمل الاطفال اللى الاب بيوقف حياته تماما على تامين مستقبلهم مثلا) احنا هنا قدام نتائج لا يمكن تجاهلها ، انفصال للشعب المصرى فى هذا المعيار ، وهو امر واضح ، انت بتشوف اغلب المصريين بيبصوا لرجل الاعمال الناجح على انه ( حرامى ) انما يهتموا اكثر بالراجل اللى👇٢٨

( بيعطف على المساكين والغلابه ) لو سمعوا وشافوا رجل اعمال بيعمل كوبرى مثلا على حسابه كتبرع ، مش هيهتموا ، انما لما يشوفوه بيوزع فلوس على الارامل والغلابه ، هيتعاطفوا معاه اكتر ! ويقولوا عليه راجل بتاع ربنا ، ويفضلوا الموظف الفقير على راجل الاعمال الغنى من حيث التقدير النفسى👇٢٩

باعتبار الاول شريف والثانى دائما حرامى ( ده مجرد مثال توضيحى ) ، برضه هتلاقى ليل نهار على الفيسبوك لما يتم اتخاذ قرار اقتصادى باغنية (( طب والغلابه يعملوا ايه))
4- تجنب الغموض وعدم اليقين : مصر هى اعلى رقم على الاطلاق ، يعنى احنا اكثر ناس بنكره عدم اليقين ، بنكره المخاطره 👇٣٠

فهتلاقى دايما نفضل استمرار النظام الحاكم لسنوات اطول باعتبار ( ان اللى تعرفه احسن من اللى متعرفوش ) ، نفضل دائما
الاستثمار فى الاراضى والعقارات والدهب ، ونكره عمل مشروعات لان فيها ( مخاطره) بينما هتلاقى الصينى الاكثر استعدادا للمخاطره الالمانى اقل استعدادا للمخاطره من الصينى👇٣١

واللبنانى ( وده هتلاقيه واضح برضه فى محاولاتهم للاتقان بشكل مذهل ، ايضا نادر ما تلاقى شركات تجاره المانيه ، عادة مصانع مستقره ، بينما اللبنانى و الصينى لهم شغل تجارى كتير ، الصينى ينتج بضاعه سيئه او جيده ، معندوش مشكله يخاطر بده ) واحنا بنرفض الانتاج والاستثمار من اساسه👇٣٢

لانه فيه ( مخاطر) ، اضافة لكل هذا عندك اننا بنرفض اى افكار جديده بنعتبرها عادة ( قلة ادب ) بنرفض اى عادات جديده وبنقاومها بعنف بنرفض الموضه الجديده ، وبنبص عليها بقرف ، دايما تلاقى اسئله غبيه من نوعية ، امتى الدولار سعره ينزل ؟ امتى المرتبات تزيد ؟ لان الكل خايف من المستقبل👇٣٣

ومعندوش استعداد يواجه اللى هيحصل
5- النظره المستقبليه طويلة الاجل : تعتبر فضيحه ، احنا اقل رقم بشكل هائل ، لا يمكن انكاره ، بنفضل نبص تحت رجلنا ، نرفض التغيير ، نرفض المخاطره ، نرفض التخطيط الطويل الاجل ، لما نسمع الحكومه تقول خطة 2030 ، اوتوماتيك تلاقى كلام من نوعية👇٣٤

( احيينى النهارده وموتنى بكره ) ، طب يا مين يعيش ل 2030 ، طب نعيش ازاى دلوقت لحد 2030 ، موت يا حمار ، وهكذا ، دايما نفضل العمل قصير الاجل اللى تاثيره هيبقى سريع ، عاوزين تطوير تعليم النهارده، وعاوزين نتيجته تظهر امبارح !! معندناش صبر للخطط الطويله ولا التزام بها ، وعشان كده👇٣٥

دايما كنا ماشيين بخطة ترقيع ، نحل المشكله دلوقت اى كلام ، نلصمها عشان نمشى الحال ، على قد فلوسهم ، بكره يحلها ربنا وهكذا ، معندناش استباق للمشاكل ، بل دائما رد فعل ، متقدرش البلا قبل وقوعه يا استاذ !! بل اننا نهاجم الحكومه لانها تقوم بخطط طويله !! ونعتبر هذا اسرافا وسفها !!👇٣٦

تخيل التفكير ؟!! دى عادة شعبيه اصيله زى منت شايف ، والحكومه من هذا الشعب ايضا وتضطر اغلب الوقت انها تعمل حسبما يفكر لانها منه ، اللبنانين زينا برضه بس افضل شويه ، وعشان كده بيشتغلوا فى استثمارات قصيرة الاجل زى التجاره او مصانع بسيطه ( ملحوظه كوريا الجنوبيه وصلت الى 100👇٣٧

وده فعلا متماشى مع قصة نهضتهم اللى كلها اتبنت على خطط طويله الاجل ، يعنى فى جيل او اكثر مشافش اى نتيجه لتعبه ، عشان ابناءه واحفاده ، اليابان برضه قريبه من 100)
6- التساهل فى اشباع الرغبات الشخصيه ، احنا الاقل وبفارق مهول الشعوب الاربعه عندها برضه مشاكل فى الاشباع👇٣٨

لكن احنا منفصلين عنهم بفارق واضح ، احنا نكديين و قاعدين لبعض على الواحده ، متفرغين لنقد بعض ، عشان كده كلنا مش مرتاحين ولا مبسوطين ، محدش بيشغل باله بانه يسعد نفسه ويسكت ، لا ، ازاى ، احنا عينا من بعض اكتر ما بنبص على نفسنا ورغباتنا ، شاغلين نفسنا بغيرنا جدا ، وعشان كده👇٣٩

وعشان كده معندناش اى تساهل فى اشباع رغباتنا ، بقينا طبعا شعب كئيب لان فيه مليون حاجه بتفكر فيها قبل ما تعمل اللى نفسك فيه ، ما يكفى انه يقفلك من الحاجه نفسها! هتلاقى ان من اهم نشاطتنا المسليه والممتعه ، هى السخريه من الاخرين وتصرفاتهم !!!👇٤٠

🇪🇬كده واضح اننا عندنا اربع ، او خمس عناصر كامله فيها اختلاف عن الشعوب الاخرى المذكوره بسبب طباعنا الاجتماعيه وتفكيرناعلى ما ٤١يبدوا انها ( قد تكون معوقة لنا )👇٤١

اتمنى كده يبقى التحليل ( قريب ) من فهمنا ، انت بقى دورك تفسر النتائج دى على حسب تفكيرك ، تفهمها ، تحاول تشوف المشاكل فين وتحلها
آسفة للإطالة
#حفظ_الله_مصر_وجيشنا_وشعبنا_ورئيسنا
#تحيا_مصر_بجيشها_وعاش_السيسي
د.سلوي السوبي

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد