⚠️تحديث
اسمرا الوضع صعب جدا جدا
السودانيين ملوااااا البلد بكميات كبيرة والسفارة السعوديه فى اليوم الواحد بتستخرج خمسة جوازات فقط وهذا شى يخص السفاره وبسبب هذا الإجراء تكدس عدد كبير من السودانيين فى اسمرا واسمرا مدينة صغيرة جداً فلذلك صارت اخر مدينة يدخلها السوداني هى مدينة كرن من اسمرا 97 كيلومتر واليوم كرن زاتها ممنوعه السودانيين لانها اتملت وبقى آخر مدينه يدخلها السودانيين هى مدينة اغردات وتبعد من اسمره 174 كيلومتر لجهة السودان
افضل لك تمشى طوااااالى إثيوبيا
تنبيه 🔻🔺️
لاحظت ناسنا بيحبوا الفتوى و التنظير بتواريخ معينة انه اسمرا حتفتح يوم 21 🫠🫠
ياريت تراعوا ظروف بعض وانه الناس في طريق سفر و اليوم الواحد بيكون محسوب مصاريف و سكن .
من وين بتجيبوا التواريخ دي ؟؟
خلاص قفلت قفلت ماتتحرك او شوف وجهة تانية ..
البرة برة والجوة جوة لامن ربنا يسهل امرهم ١😴

⚠️تجربة السفر من السودان الى اسمرا لعمل إجراءات الزيارة العائلية
أول شي لازم تطلعي مستند الزيارة العائلية جهه القدوم اسمرا
لو مسافرة بالبر تمشي كسلا تطلعي تصريح السفر ب 15500 لكل فرد حتى الاطفال و عشان تطلعيهو مفروض يكون معاك إثبات شخصية غير الجواز( رقم وطني/ بطاقة قومية/ رخصة) و تبدلي عملة ( دولار و نقفة) من سوق هايكوتا في كسلا النقفة بتحتاجي ليها لما تدخلي ارتريا لكن ما تكتري منها شديد و خلي اغلب قروشك دولار
بعدها بتركبي تكسي يوصلك المعبر الراكب 10000
بعد توصلي المعبر هناك تعملي الإجراءات حقت الدخول و بتركبي البص لما سافرت كان مجان لكن دفعنا 10 نقفة على كل شنطة البص بوصلك تسني لو وصلتي بدري طوالي احجزي بص اسمرا طبعا ح تبيتي في تسني لأنو البص بتحرك تاني يوم الساعة 4 صباحا الفنادق في تسني كانت اسعارها من 50 لي 150 نقفة للسرير و في فنادق أغلى
أول ما توصلي اسمرا طوالي امشي الوكالة احجزي لأنو تأخير يوم ممكن يأخرك اسبوع بعدها تمشي تشوفي فندق الفنادق في اسمرا السرير من 100 و أكتر علر حسب الفندق
تاني يوم تمشي السفارة توثقي الأوراق لو كانت قسيمة او رقم وطني او شهادة ميلاد بطلبوا منك صورة بس و الإجراء دا مجان بعدها تمشي تاني الوكالة تسلمي الأوراق المطلوبة منك و في رسوم في الوكالة 165 دولار للجواز الواحد و بتزيد لو العمر أكتر من 40
ماف زول بقدر يديك تكلفة محددة لأنو صرف الناس بختلف بس تقلي جيبك و كتري من الدولار لأنو لو احتجتي نقفة عادي ممكن تفكي الدولار لكن النقفة ما بتقتدري تستفيدي منها لو طلعتي من البلد
بس في حاجات خلي بالك منها الجو بارد شديد في اسمرا جيبي معاك لبس شتاء و جيبي معاك معلبات تاكليها لأنو اكلهم ما حلو نهائي و من كسلا جيبي معاك مويه صحة و بالاخص واحده اسمها ايديال لأنو الموية في اسمرا ما بتتشرب و غالية شديد
تذاكر الطيران فلاي دبي سعرها 380 دولار
طيران ناس عامل رحلات تقريبا ارخص
⛔️اتأكدوا من انه مافي زحمة وتقدروا تدخلوا لاسمرا برا بدل تتقفلوا في تسني