المفترض وفق الخطة الاسرائيلية لاجتياح غزة يكون بعد العملية العسكرية وضع امني انتقالي لو اتفقنا ان هدف العملية الاستراتيجي هو طرد حماس وتفكيك بنيتها العسكرية، واعتقد المفاوضات و الخلافات حاليا مع كل الاطراف هي شكل غزة بعد حماس، هل هتكون تحت السلطة الفلسطينية
ولا قوات عربية ولا قوات دولية و لا مسؤولية مصرية مباشرة..و هل الوضع الجديد زي ما بعض الاطراف بتصر انه يكون ضمن حل سياسي شامل للقضية مبني على فكرة حل الدولتين ولا زي ما اسرائيل عايزة تحول غزة لمجرد كورة نار في حجر الجميع..حماس مدركة ان لا يوجد طريق لانقاذها غير صفقة لتبادل اسرى
تتضمن وقف العمليات و ده يتعارض مع اهداف العملية العسكرية الاسرائيلية و اعتقد انه لو حصل هيكون مجرد وضع تكتيكي لن يوقف الحرب، او ان الصراع يتطور لحرب اقليمية يتدخل فيها اطراف تخفف الضغط العسكري عن حماس و تنقل الصراع لمستويات تانية ومسرح عمليات اوسع،
و دي مش رؤية حماس بس دي رؤية بعض الاطراف الاقليمية والدولية اللي هتستفيد من الوضع المضطرب في الشرق الاوسط وتخفف الضغط عليها. الحاجة الوحيدة اللي ممكن تغير الوضع ده كله هو فشل العملية البرية الاسرائيلية، و اعتقد اسرائيل مش هتتحمل فشلين عسكريين ورا بعض،
الفشل هنا مش مجرد فشل عسكري ده فشل فكرة المستوطنة (الكيبوتز) اللي اسرائيل بتقدمها و بتسوقها كنقطة لجذب المهاجرين اليهود و مكان مأمون للاقامة والعمل، وبالتالي مع كل خسارة على الارض هتكون اسرائيل اعنف في قصف المدنيين وتدمير ما تبقى من غزة،
اسرائيل دخلت العملية دي وهي مدركة انها خسرت الصورة اللي حاولت تبنيها السنين اللي فاتت تحت مظلة السلام الإبراهيمي وانها رجعت لصورة المحتل الغاشم المجرم المتطرف المدفوع بكراهية وعنصرية وتطرف دينيي،علشان كده الحرب دي في اعتقادي مطوله شوية لحين الوصول لوضع يغير ما قبل ٧ اكتوبر
و اي كلام عن غزة بوضعها القديم هو تقدير خاطى، مش غزة بس كل شيىء هيتغير بعد الحرب.ما يعنينا دلوقتي ان المجازر الاسرائيلية تتوقف لان الوضع الحالي كارثي في ظل ضوء اخضر ومظلة حماية امريكية مطلقة وتدليس دولي و ضعف عربي و تواطؤ اقليمي.
كان الله في عون غزة المنكوبة اللي هتفضل شاهد على قبر ضمير العالم وانسانيته المكذوبة
جاري تحميل الاقتراحات...