بالنسبة لحالات الكوليرا المنتشرة ح ادي معلومات عن طرق الحماية الممكنة و عن طرق العلاج المتوفرة بما انه الكوليرا ماف ليها تطعيم فدي طرق وقاية و طرق لي المصاب انه يتعدى الساعات الاصعب من العدوى لو جاته
اولا عشان نعرف الوقاية لازم نعرف الكوليرا بتجي من وين،، غالبا الحاضنات المائية سبب الاصابة او العدوى المباشرة لو اتعاملت مع مريض كوليرا في فترة العدوى حقته و اتعاملت مع السوائل البتطلع منه،، تجنب للعدوى من الحاضنات اي موية ح تشربها تتاكد انها مغلية لي مدة خمسة لي ١٥ دقيقة
و بعدها تتجمد او تتبرد، اي شي ح يتاكل تتاكد انو مطبوخ، يعني نبعد من الخضراوات النية و نسلق اي شي و اي لحوم برضو تنطبخ و نبعد من اللحوم المجمدة زي المارتيديلا، و اللانشون، تاني التعامل مع المرضى، نحاول قدر الامكان نبعد عن المرضى في حال وحود كادر طبي للمساعدة
علاج المريض بيكون غالبا عن طريق تعويض السوائل المفقودة بسبب الاسهال و الاستفراغ الكتير، فقدان السوائل الكتير ممكن يهدد الحياة فلازم المرضى يتعوضوا بي سوائل و السوائل بتكون عبارة عن تعويض فقد املاح و كاربوهايدرات حنزل كيف ممكن تعملوا محلول في البيت للتعويض
ممكن تعمل المحلول الحا يتشرب بي انك تخت نص كباية من دقيق الرز، علي كبايتين موية و ربع معلقة ملح طعام و نديه للعيان، في حالة الجفاف الشديد العيان لازم ياخد المحاليل عن طريق الوريد، و ما ينفع ندي نفس المحلول الحا يتشرب كمحلول وريد محلول الويد لازم يتاخد في المستشفى
حالات كتير بتتعالج من التعويض بالشرب، لكن كيف تعرف انو الشخص دخل حتة الخطر،، اول شي نقصان درجة الحرارة في الجسم و تجعد الجلد للمريض، ديل اهم حاجات حتوريك انو المريض داخل مرحلة خطر، ولازم يتنقل مستشفى، او مستوصف، اي حتة يقدر ياخد فيها معوض بالوريد
انت اتعرضت لي مريض تعمل شنو، الهدوم اللبستها تتغسل في موية مغلية و الكلور بيساعد في قتل الكوليرا، تستحم بي موية دافية و تغسل يدينك كويس شديد، و تنتبه علي الاعراض في اول ساعتين لحد خمسة ايام من التعرض، الاعراض هي حمى استفراغ اسهال و شد عضلي
و تعزل نفسك من الناس لحد مرور الخمسة ايام بدون اعراض، و ربنا يشفي كل مريض و حسبي الله علي كل من كان السبب في اي شكوى مر بيها اي سوداني، حسبي الله فيهم دنيا و اخرة حسبي الله فيهم
جاري تحميل الاقتراحات...