يقول سيف توفى ابوي وانا في آخر فصل في الجامعه قبّل الأمتحانات بشهر،و اضطريت أتأخر سنه عن موعد تخرجي بسبب وفاة والدي والمشاكل اللي حصلت بعد وفاته ، اخواني اختلفوا وراحوا المحاكم وانا وأمي نتفرج ويوم اتفقوا طلعونا من بيت ابوي وعطونا بيتنا القديم نسكن فيه أنا وأمي وأرض خارج الدوحه
بيتنا القديم في المطر يستوي مشخاله ما يوّد شي من الماي فصرفنا اللي طلع لنا من ورث ابوي على سقف البيت القديم وشريت لي سياره مستعمله اقضي فيها مشاويري ومراجعات امي للمستشفى، تخرجت من الجامعه وزعلت ان محد حضر حفل التخرج من اخواني لكن عذرتهم وترحمت على ابوي، تميت اكثر من سنه ٢
بلا وظيفة وحالتنا الماديه أنا وامي كانت صعبه معتمدين على معاش ابوي التقاعدي ،حتى ان زيارة اخواني وخواتي حق امي كل فتره كنا نحسب حسابها ونعمل لها ميزانية، مرت علي أعياد ومناسبات وانا ما اشتري لبس جديد ولا حتى نعال وآمشي باللي عندي،لين لقيت وظيفة وتوظفت لكن الله بلاني بمدير نحيس ٣
ما يسأل إلا عني والا يحول الشغل إلا علي واذا بغى شي صوت في الأداره وين سيف، كان يكلفني بشغل كثير واقعد ساعه او ساعتين بعد الدوام اخلص الشغل، ومره قلت له يا بومحمد امي مره كبيره وتنتظرني على الغدا إذا تأخرت ما أتغدى معاي العصر إذا رجعت ،فسمح لي اطلع أتغدى مع امي وارجع اكمل الشغل ٤
بعد مدة علاقتي مع بومحمد صارت مثل علاقتي بأبوي الله يرحمه شديد علي لكن يحبني ويبغي مصلحتي ودايم يقول لي اترك عنك فلان وفلان ترا ما وراهم خير، بعد ثلاث سنوات دخلت أوقع ورق من بومحمد في مكتبه فقال لي صك الباب واقعد ابغيك، قعدت قدامه وقلت نعم آمر؟ قالي شوف يا سيف انت احسن واحد عندي٥
في شغلك وانا رشحتك تصير نايب لي في الأداره وان شاء الله القرار بيطلع قريب لكن لا تبلغ حد.
طلعت من عند بومحمد فرحان وانا اشكر واحمد ربي على النعمه وصرت نايب المدير وانا ما كملت ٢٥ سنه، واخذت قرض وعطيت امي لفلوس وقلت لها زوجيني والله يسر وتزوجت بنت حلال قامت بي وبأمي ومرت لسنين ٦
طلعت من عند بومحمد فرحان وانا اشكر واحمد ربي على النعمه وصرت نايب المدير وانا ما كملت ٢٥ سنه، واخذت قرض وعطيت امي لفلوس وقلت لها زوجيني والله يسر وتزوجت بنت حلال قامت بي وبأمي ومرت لسنين ٦
وصرت مدير وترقيت لين وصلت وكيل وزارة وبعد وفاة والدتي هدمت البيت وبنيت بناية وبنيت لي بيت قريب من اهل زوجتي والارض اللي خارج الدوحه سويتها استراحه لي ولعيالي نجتمع فيها كل اسبوع، والحين اتذكر ذيك الايام واللي مر علي من تعب وفقر واقول الحمدلله ، واضحك كنت افكر اني أشقى الناس ٧
ولا عرفت ان ما مر علي كان نعمه وتدريب وتعليم من الله وتهيئة لي ، وادعي كل يوم حق بومحمد في كل صلاة واترحم عليه اللي علمني لين وصلت للي أنا فيه.٨
جاري تحميل الاقتراحات...