كتبت قبل كده اني عايش في أيرلندا بقالي فترة. سبب دعم أيرلندا القوي لفلسطين ( الوحيدة في أوروبا تقريبا ) هو انها حرفيا جاية من هناك. انجلترا حاولت عبر قرون تصفي أيرلندا وقضيتها عرقيا واقتصاديا وثقافيا وفشلوا فشل ذريع. دايماً باحس ايرلندا بتقول للفلسطيني: اجمد كده كله بيعدي.
انجلترا اللي احتلت ايرلندا لقرون اجبرت اهل البلد ياكلوا ويزرعوا بطاطس بس. قوات الإمبراطورية نقلت نوع معدي من الفطريات دمر محصول البطاطس بتاعهم في ١٨٤٥ فحصلت مجاعة رهيبة. الانجليز رفضوا يقدموا مساعدات ليهم بحجة ان مافيش موارد لكن الهدف كان تصفيتهم تماما وفعلا مات وهاجر ربع السكان.
أيرلندا بلد عريقة، وثقافة قديمة وأديان مثيرة جدا شبه أديان مصر القديمة واليونان وكده. انجلترا قامت بحملات منظمة لمحو لغتهم وثقافتهم. التعليم والتشغيل بالانجليزي، ممنوع العبادة بالأيرلندي، لدرجة انهم كانوا بيدفعوا فلوس للناس عشان تبطل تتكلمه. واللغة شبه انقرضت فعلا الا في الخفاء.
حصل ايه في الآخر؟ اللي دايما بيحصل. الناس ما نسيتش وحاربوا، واللي كانوا بيقاوموا لسه لحد دلوقتي متصنفين منظمة ارهابية لكن عندهم حزب وغالبا حايكسبوا الانتخابات الجاية. في محطات راديو ومدارس بتتكلم بس أيرلندي. اليفط في الشوارع بالأيرلندي. الهوية فضلت عايشة رغم موت الناس.
من أول يوم زرت دبلن في ٢٠٠٨ شفت ع الحيطة علم فلسطين وحضرت حفلة لدعم غزة. كل شهر في فعالية حكومية لدعم فلسطين وضد الفصل العنصري بيحضرها رئيس الوزرا أو سياسيين كبار. حاجة ما بتحصلش من السلطة الفلسطينية نفسها. في السبعينيات فصائل من المقاومة الأيرلندية كانت بتحارب في لبنان مع فتح.
أيرلندا دلوقتي من أكبر إقتصادات أوروبا وياللسخرية، كمية الإنجليز اللي بتهاجر ليها بعد بريكسيت و طالبين جنسيتها الأوروبية ضخمة. في شعور عميق عند الأيرلندي انه اتعرض لعملية تصفية عنصرية ومسح هوية وثقافة ولغة فشلت فشل ذريع بسبب الصمود والمقاومة. وفي شعور أعمق ان نفس المستعمر هو هو.
ماحدش هناك مستغرب ان انجلترا بتقبض على أي حد شايل علم فلسطين لأنهم مستعمرين بيدعموا مستعمرين عادي. أيرلندا بتحتفل بالثقافة الفلسطيني وبتعمل حفلات ومعارض وبتنشر كتب كنوع من أنواع منع الهوية من الإنقراض زي ما كان متخططلهم. بس طبعا في جزء كبير نكاية في الانجليز والامريكان وغيرهم.
أيرلندا كمان بتوريك بشكل ما مستقبل فلسطين. بعد ما كل ده يخلص والناس تبتدي تعيش طبيعي شوية ممكن بعد عقد، عقدين، قرن، قرنين، تلاتة حاتيجي مرحلة الهروب والمخدرات وتدمير النفس والفقد و محاولة التعافي، زي ما المغفور لها بتقول في الغنوة دي الحل حايكون ان الناس تفتكر اللي بيحصل دلوقت.
جاري تحميل الاقتراحات...