فى حاجة عملتلها فى بداية اللى بيحصل و انا بترجم و مكنتش عارف هل هتفرق و تجيب نتيجة ولأ..
بس النهاردة اكتشفت انها جابت نتيجة الحمدلله و فرقت نوعا ما و هقولكم عليها علشان الناس اللى بترجم و تنقل اللى بيحصل بلغات مختلفة يمكن يستفادوا منها و بستخدموها..
فى أول يومين كنت حاسس ب إحباط و اني بكلم نفسي و خصوصا لما كنت بدخل على الهاشتاجز التريند فى اليونان و سيناريو الاسرائيلي هى المسيطر و طبعا كله بيدين حماس..
و كنت بحاول اتناقش معاهم و اكتب تغريدات و اشارك
و لما لاقيت معتصم @MoatAwesome_ كاتب ثريد بالانجليزي و استأذنته اترجمه لليوناني
زودت قبل الثريدز بتاعه حاجة ليها علاقة بتاريخ اليونانى و مكافحة جدودنا اليونانين و مقاومتهم للإمبراطورية العثمانية و كنت بتسأل هل لو فى وقتنا ده المقاومة اليونانية ضد العثمانين هتعتبر ارهاب ولا مقاومة شعبية ادت ل استقلال اليونان فعلا..
و كملت ب ثريد معتصم ⬇️

و فى خلال الايام دى لاقيت كذا حد فى اليونان فعلا بيربط المقاومة اليونانية و اللى حصل فيها مع نفس فكرة المقاومة الفلسطينة دلوقتي
⬇️⬇️⬇️

فا لو حد بيترجم عنده على بتاريخ البلد اللى بيستهدف لغتها يحاول يدور على ربط بين التاريخ القديم اللى فى البلد دى مع اللى بيحصل
دى أول حاجة..
ثاني نقطة و دى مهمة جدا جدا
لو هترجم من غير ما تستخدم الهاشتاج التريند اللى مرتبط بالاحداث فا انت نسبة وصول كلامك قليلة جدا جدا
مهم جدا تستخدموا الهاش تاج بنفس اللغة اللى بتكتبوها علشان يوصل و يتقرا
مثال هاش تاج غزة باليوناني # Γάζας
و هكذا

تالت حاجة و دى بجد انا متأكد منها ان كان كل لايك و ريبوست على التغريدات انتم عملتوها كان سبب ان يرفع التغريدات دى و تبقا فى التوب على الهاشتاجز
فا تتشاف اكتر و يتأثروا اكتر..
فا شكرا بجد على كل حد منكم كان بيعمل لايك و ريبوست ❤️

رابع نقطة و دى مهمة جدا برضه.. فى الأول انا كنت بتناقش و ادافع و اتكلم مع اللى بيكتب حاجة ضد القضية باليوناني و ده كان بياخد وقت و مجهود و الحمدلله بمساعدة مامتى و بنت خالتي كانوا بيراجعوا ورايا الكلام اللى باليوناني.. بس كل ده كان ضغط و لما اتكلمت مع ميرنا @Mirna_elhelbawi قالتلى ما تضيعش وقتك فى نقاش دلوقتى و انقل اللى بيحصل و بس و ده اللى عملته و فعلا الموضوع بقا افضل و الناس بتتفاعل.. فا حاليا انقلوا اللى بيحصل و ترجموا و بس و النقاشات سيبوها دلوقتي ده رأيي و لو حد تانى مختلف مع اللى بقوله عادى يكمل ب طريقته..
الحاجة المهمة بقا هو ان احنا محتاجين يبقا فى قصة
القصة مع الصورة او الڤيديو بتشد اكتر و بتلفت الانتباه
بمعنى زي التغريدة دى
⬇️⬇️

@Mirna_elhelbawi فكرة القصة دى شفتها من اول الاحداث اسرائيل استخدمتها صح و عرفت تأثر بشكل كبير
فا لو هنبتدى نعمل ثريد مترجم نمسك موضوع واحد و نشتغل عليه.. زى قتل الصحفيين او المدنيين او الاطفال و هكذا
هنا ركزت على الأطفال ⬇️⬇️

و فى النهاية اه قوة السوشيال ميديا بتفرق و الترجمة ليها تأثير فا اى حد عنده اى لغة تانية او جنسية تانية فا ملم ب تاريخ بلده يقدر يستخدمها مع ترجمته للاحداث هيفرق جدا
انا كنت كل يوم بحس ب إحباط بس دلوقتي بقيت اشوف تعاطف و مشاركة كتيرة من ناس عايشين فى اليونان
و تانى شكرا بجد على كل حد عمل لايك و ريبوست للحاجات اللى كنت بنزلها علشان فعلا كان سبب ان الحاجات دى تتشاف ❤️
هروح أكمل و يا رب ينصر فلسطين و اهلها و يصبر اهالى الشهداء