في مفارقة مشهورة اسمها Buridan's Paradox ، في المفارقة دي Buridan بيقرر إنه يجوع ويعطش حماره لحد أما رغبته في الأكل والشرب تتساوى ، وبعدها بيقوم واخد الحمار وحاطه بالظبط في النص ما بين تبن وميه ، وكل حاجة فيهم بالنسبة للحمار عشان يروحلها عكس إتجاه التانية...

اللي بيحصل إن الحمار مبيقدرش ياخد أي قرار بسبب تساوي الإحساس عنده بالجوع والعطش وتساوي المسافة ما بينه وما بينهم ، فاللي بيحصل في الأخر إن الحمار بيموت في النص من الجوع والعطش وسط التبن والميه من غير ما يحاول في أي حاجة.

المفارقة دي بتنطبق علينا أوقات كتير في قراراتنا ، بتبقى قاعد محتار ما بين إنك تختار حاجة من كذا حاجة لإنك بتبقى حاسس إن كلهم كويسين ليك ، وده بيخليك قاعد تحرق في نفسك لحد اما بتزهق في الأخر ومبتخترش أي حاجة ، وبالتالي بتضيع كل الاختيارات اللي قدامك.

وعشان كده لما تتعرض للمفارقة دي وتكون محتار ، حاول متقفش في مكانك أكتر من اللازم ، وخد قرار في إتجاه معين لحد اما يظهرلك معطيات أكبر تساعدك تبعد عن القرار ده أو تكمل فيه ، لإنك لو فضلت واقف مكانك عمرك ما هتاخد قرار وهتخسر كل الاختيارات أو هتبقى مجبر بعد كده على اختيار معين.