١ أكتوبر .. 🌸
نصائح اتمنيت لو يرجع بيا الزمن وأحد يقولي هي قبل لا ابدأ البورد ..
الكلام طويل لأنه هاذي خلاصة أربعة سنوات ماهي فترة قصيرة ..
١- العلاقات الممتازة مفتاح نجاة لك في مواجهة صعوبات التدريب، أبدًا لا تكون أناني مايحب يساعد أو يتعاون مع الناس، كل ماتعاونت أكثر كل ماكسبت ناس أكثر في صفك يعاونوك وقت ماتحتاج
مثلًا ٤ أشخاص كلموك في أوقات مختلفة طلبوا تبديل اونكول معاك وإنت تقدر تبدل ووافقت، كذا كسبت أربعة أشخاص وقت ماتنزنق وتحتاج إنت تبدل اونكولك تقدر ترسلهم وحيوافقولك ردًا لجميلك، غير السمعة الطيبة اللي حتطلع عنك بين الناس والكل حيبدأ يتعاون معاك وحياتك في العمل حتصير أسهل
العلاقات الطيبة مو بس مع الزملاء، مع الاستشاريين والتمريض والمرضى وأهاليهم وكل من هم حولك

٢- الصحبة الطيبة تهوّن الطريق، بالذات لو اتوافقتوا فكريًا وكنتم داعمين لبعضكم وحرضتوا بعضكم عالشي الكويس واتنافستوا منافسة شريفة، تعينوا بعضكم على حضور المحاضرات وإنكم تيجوا الدوام عالوقت ولمن تقسموا الحالات بينكم تتعاونوا إنكم تغلقوا شغلها سوا ..
شخصيًا أنا وصحبتي حتى لو كنا في فريقين مختلفة كنا أول ماوحدة تخلص تسأل الثانية إيش باقيلها وتساعدها وكانت أمورنا دائمًا ميسرة الحمدلله وإحنا سند لبعضنا مو زي لمن تكون لوحدك وشايل الهم لوحدك

٣- عامل المريض كأنه واحد من أهلك حفظ الله أهاليكم
يمكن أكثر من حيحس بكلامي اللي جرب إنه يتنومله أحد عزيز عليه في المستشفى وعاش تجربة مرافق مريض أو عاش تجربة المريض نفسه
بس حتى اللي ماجرب أرجوك رفقًا بالمريض ومرافقه اللي ينتظروا كل يوم الصبح تمر عليهم عشان تطمنهم وتعطيهم الجديد اللي حصل في آخر ٢٤ ساعة
تراهم يعدوا الأيام عشان يخرجوا وبالنسبالك المريض اللي حالته سهلة وجالس عندك بس يكمل مضاد لسبعة أيام ويخرج، هو داخل رأسه أسئلة ومخاوف كثير لأنه مايعرف نفس اللي إنت تعرفه
طولوا بالكم قد ماتقدروا حتى عاللي يسألوا كثير بس حطوا نفسكم مكانهم وطمنوهم قد ماتقدروا لو كنتم تقدروا
أما بالنسبة للأخبار المهمة زي نتيجة التشخيص بمرض خطير أو مرض معدي على سبيل المثال فمو من حقك كطبيب متدرب تنقل الخبر للمريض أو أهله وهذا من حق الاستشاري فقط أو من يوكله عنه من الأخصائيين
وفي هاذي النقطة أبغى انوه على شيء كنت أتمنى لو إني سويته طول الأربع سنين لكن للأسف أغلب الأيام كنت انسى مع مشاغل الحياة، وهو استحضار النية يوميًا وتجديدها، خاصة نية زيارة المريض لأنه إنتم حتمروا على مرضاكم كلهم تشوفوا أخبارهم فاحتسبوها نية زيارة مريض وحتجمعوا منها حسنات كثير

٤- الاجتماع الصباحي كنز مو الكل يعرف قيمته، حضوره عالوقت أول شي بيبين قد إيش إنت إنسان ملتزم بالوقت وهاذي أهم نقطة تحاول تثبتها في أول سنة لك في البورد
الاجتماع حاضرين فيه كل القسم فالكل شايفك وإنت جاي، شكلك حيكون مرة غلط لو جيت متأخر كل مرة أو ماحضرته حتى بالمرة 🤷🏻‍♀️
وبيتقال فيه معلومات قيّمة جدًا لأنه النقاش فيه بيكون على حالة اتنومت اليوم اللي قبله يعني مو بعيد اونكولك الجاي حتواجه إنت حالة مشابهة مرة ثانية
وبحضور استشاريين جميع الأقسام وأحلى نقاشات ممكن تسمعها طول سنين البورد هي نقاشات الاستشاريين مع بعضهم حتتعلم منها الكثير الكثير وحاجات ماتلقاها في الكتب لأنهم بيتكلموا بناءًا على خبرة سنين، خاصة لو كان أحد منهم MCQs oriented ويعطيك في نص النقاش النقاط المهمة اللي حتواجهك في الاختبار على نفس الموضوع، وعادي اسأل قد ماتبغى لين تفهم الحالة مضبوط هذا وقتك اللي مخصصينه لك عشان تتعلم فيه

٥- "كل يوم معلومة جديدة" خلي هاذي قاعدة عندك، معلومة جديدة مو موضوع كامل جديد (هاذي غير عن خطة مذاكرتكم طبعًا)
حرفيًا معلومة وحدة فقط من سطر أو اثنين، تسمعها في المورننق ميتينق أو في الراوند أو تقرأ عنها وإنت بتشوف حالة، خلي هاذي قاعدة أساسية عندك كل يوم في آخر اليوم ذكر نفسك إيش المعلومة الجديدة اللي عرفتها اليوم

٦- المذاكرة أول بأول حتسهل عليك كثير قبل الاختبار وتخليك تذاكر ونفسيتك مرتاحة ومتطمن مو متصربع وحاسس إنك متأخر عن أقرانك في مستوى التقدم
نظم وقتك، قراءة لو نص ساعة في اليوم حتفرق معاك كثير، ممكن تذاكر كل بلوك في وقت ماتكون بتشتغله في الروتيشن أو تسويلك جدول خاص بيك غير عن جدول الروتيشنات مافي مشكلة الخطتين كلها ممتازة

٧- الحالات اللي عندك في التيم ارجع البيت اقرأ عنها من أي مصدر يناسبك وابدأ قارنها بالحالة اللي عندك وشوف إيش في من أعراضها يشبه للي في الكتاب وإيش الاختلافات، وإيش في شي ممكن تضيفه يساعد أكثر في المانجمنت بناءًا عالدراسات اللي حتطلعلك وخذ المعلومات وناقش فيها الاستشاري ثاني يوم، وعمومًا لو في الراوند شاكك واحد بالمية من معلومتك اللي في راسك قبل لا تحط خطة علاج وقف ودور عليها سواء من موقع موثوق أو ارجع للاستشاري أو لزميلك واتأكد معاهم، عادي مايقلل منك أبدًا بالعكس لمن تسأل وتبحث بترسخ المعلومة عندك للمرات الجاية وبتكون أعطيت المريض حقه الكامل وكنت آمن معاه
وترى أوقات الانتيرن ممكن هو اللي ينبهك على شي نسيته، اتعود إنك تتقبل المعلومة من أي أحد العلم مافيه صغير وكبير

٨- الحالات اللي بتشتغل عليها كل يوم حاول ثاني يوم تمسكها نفسها عشان تشوف الفولو اب اللي صار فيها، كنت امسك مرضايا لين آخر يوم في الروتيشن ماحب أحد ياخذهم مني لأن محد يعرفهم قدي، حتى لو زميلي في الفريق خرّج حالاته كلها ودخلت حالات جديدة وحالاتي باقية وصار لازم نتقسم من أول وجديد بالتساوي وحتزيد حالاتي عنه بكثير كان عادي عندي بس المهم أكمل معاهم واتابع التقدم في حالاتهم بنفسي لين يخرجوا البيت بالسلامة إن شاء الله
برضو لمن كنت انوّم حالات في المناوبات كنت اسجل أرقام ملفاتهم وثاني يوم امر عليها أشوف إيش كتب التيم المعالج من بعدي وإيش أضاف وهل اتفق معايا في الـ provisional diagnosis اللي حطيته ولا لا، هاذي الحركة حتضيفلك كثير واتعلمتها من ناس ممتازين أكبر مني كانوا ثاني يوم بعد المناوبة يسووا راوند على مرضاهم اللي نوموهم يتطمنوا عليهم

٩- الأكاديمك داي اللي بيصير كل أسبوع هو فرصة كبيرة للتعلم برضو وأوقات بيجوا اكستيرنال سبيكر من برا المستشفى متعنيين وجايين بس عشان يوصلولكم المعلومة، أفضل لو تعرفوا الموضوع قبلها بيوم وتقرؤوه من ريفرنس عشان لمن تحضروا وتسمعوا المعلومات مرة ثانية تثبت عندكم وبالمرة تسألوا الدكتور في آخر المحاضرة عن الأمور الصعبة عليكم يصير تقفلوا عالموضوع بالكامل

١٠- الاونكولات هي أكبر فرصة للتعلم، دائمًا في استشاري سعيد باستقبال مكالمتك وسماع الحالة اللي عندك والنقاش معاك، بس صدقني ماحيكون سعيد لو أعطيته هستوري ناقص وملخبط، حيعديها أول مرة وإنت لسه في أول سنينك بس ماتوقع فيه أي استشاري يقبل سينيور يكلمه بهستوري ناقص أجل إيش كان بيسوي السينيور في سنين الجونيور لو كل هذيك السنين ماعلمته الهستوري لسه 🤷🏻‍♀️
كنت اجهز الهستوري ومتوقعة إيش الأشياء اللي حيسألني عنها واجهزها في ورقة عشان أقوله هي وكنت انبسط مرة من النقاشات اللي تصير معاه واتعلم منها يصير الحالة اللي بعدها حتى ماحتاج ارجعله ثاني لأنه خلاص علمني من المرة الأولى

١١- عارفة إنه فيه عدد ساعات عمل مالمفروض تتجاوزها ولكن وجهة نظري كانت إنه ماتوقع إنه البورد اللي سنواته معدودة وانوجدت عشان تخليني اتخرج وأكون أخصائية كفؤ مستقلة برأيي الصحيح هو وقت مناسب للنقاش في كل شهر عن عدد ساعاتي التي لا يمكن تجاوزها 🫣
وهاذي النقطة حيختلفوا معايا فيها كثيرين لكن أنا شخصيًا كنت انزل أكبر عدد من الاونكولات وبحكم إني كنت ماسكة جدول الاونكولز كنت انزل نفسي زيي زي الكل بالتساوي أو أكثر مع إنه حسب قوانين الهيئة المفروض الشيف ينزل أقل من الباقيين باونكول عالأقل
وفي سنة من السنوات نزلت اونكولاتي واونكولات صحبتي كمان وهي برضو كانت تنزل معايا اونكولاتي بالإضافة لاونكولاتها يعني خلصت علينا السنة وإحنا ماخذين دبل اونكولات عن الناس اللي معانا كلهم 🤭
وكنا سعيدين جدًا بالتجربة وعلمتنا كثير وخلت مستوانا أعلى من المستوى المطلوب
مو مطلوب منكم طبعًا تسووا كذا أنا في هاذي النقطة تحديدًا فقط بحكي عن تجربتي الشخصية مو أكثر (تجربة افتخر بها حقيقةً لأنها صقلتني وعلمتني كثير وإن كانت لن تعجب الكثيرين)
عشان لحد يقولي إني بحمل الريزدنتس فوق طاقتهم 😜
((انوّه للمرة الثانية إنها تجربة شخصية وليست للتعميم)
بس حط في بالك إنه طبيعي لازم فيه شهر من الشهور حتنزل أكثر من غيرك والشهر اللي بعده حتنزل أقل لأن توزيعة أيام الشهر عمرها ماحتكون متساوية، فمافي داعي لمن تنزل اونكول واحد زيادة عن زملائك تروح تتضارب مع اللي حط الجدول وتقوله عدد ساعاتي وعدد أيامي!!
التصرف الصحيح واللي حتى بنرد بيه كإجابة مثالية في المقابلات الشخصية هو إنك تنتظر للشهر اللي بعده لو برضو نزلت أكثر من الباقيين وقتها روح استفسر منه ولو ما أفادك وقتها كلم الـ PD وإلا ماحتوصل لحل بهدوء وأدب بدون تطاول على أحد

١٢- بعض السينيورز حيرموا عليك شغلهم، من وجهة نظري لو شي مايضر بمصلحة المريض مافي مشكلة لو مشيت الموضوع كم مرة لو ماكان بيضغطك كثير
أنا صراحة كنت من نفسي اشتغل وأنا جونيور كأني سينيور وكنت اطلب منهم يعطوني الفرصة اشتغل شغلهم بالإضافة لشغلي تحت إشرافهم عشان اتعلم منهم وأكون جاهزة لليوم اللي حصير فيه سينيور وكنت أسوي كذا وأنا مبسوطة وهم كمان كانوا ينبسطوا لمن يشوفوا شغفي للتعلم منهم، لمن صرت سينيور نزلت أول اونكول وأنا فاتحة يديني للطوارئ أقولهم أي حالة عندكم أرسلوها أنا لها بإذن الله 😍 وفعلًا أول اونكول لي كسينيور وبدون اتاتشمنت كتبت بروبلم ليست من ١٥ سطر يعني كان فيه 15 Active issues في نفس الوقت عند المريض (حالات الانتيرنال ميديسين) وعرفت اتصرف معاه تمام الحمدلله لأني جهزت نفسي من قبل في سنين الجونيور

١٣- لمن تصير سينيور على خير إن شاء الله تراك المسؤول الأول والأخير عن الاونكول والتيم، الجوينور مالمفروض يتحمل الجزء الأكبر من الخطأ لو اخطأ طالما فيه سينيور مسؤوليته يشرف عليه وعلى شغله ويصححله
كمان في الاونكولات كسينيور إنت مسؤول عن كامل الفريق اللي تحتك، الجونيور ريزدنتس والانتيرنز والطلاب لو موجودين، الاونكول الناجح هو اللي تعطي فيه المرضى حقهم + تعطي الجونيور واللي معاك في الاونكول حقهم عليك في إنك تعلمهم شي جديد وتضيف لهم
إذا الجونيور خرج من الاونكول ماتعلم شي من السينيور اللي معاه فهاذي مشكلة كبيرة والله 🤷🏻‍♀️
أدري المسؤولية كبيرة بس نعم صحيح هاذي مسؤولية السينيور إنه عيونه تكون على الحالات والريزدنتس وكامل الفريق اللي معاه ويعطي كل واحد حقه قد مايقدر وهذا الشي يصير أسهل مع الوقت والتعود

١٤- بالنسبة للجونيورز أكثر ناس يحتكوا مع الانتيرنز، رفقًا بهم أخوانكم وأخواتكم الصغار اللي أمس كنتم مكانهم رفقًا بهم خاصة في وقت اختباراتهم ومقابلاتهم الشخصية
للآن عجزت افهم عقلية اللي يقول لانتيرن روح المقابلة وارجع بعد الظهر بعد ماتخلص كمل شغل معانا 🤦🏻‍♀️ طيب الراوند قيده خلص والشغل اتوزع إيش بتستفيدوا من الانتيرن الغلبان (حصلت معايا شخصيًا وأنا انتيرن جابوني بعد المقابلة عشان اخلص شغل الورق والسستم للحالات كلها ماسووا هما شي انتظروني اخلص واجيهم ومايحتاج أقول إيش كان التخصص 😂)

١٥- ((يا غريب كن أديب))
الاوتسايد روتيشن لا تروحوا سناتر ثانية وتسووا مشاكل معاهم انتبهوا المجتمع الطبي صغير جدًا وحتى لو تحسب إنه هو شهر حتجلسه معاهم وترجع لسنترك ترى ماتدري الأيام فين توديك ممكن ترجع تقدم فيلوشيب عندهم مثلًا 🤷🏻‍♀️
رحت في واحد من الروتيشنات لسنتر ثاني والشيف اللي عندهم نزلتني يومين ويكند كل واحد في أسبوع مختلف وفوقها أسبوع ثالث اجي فيه بس لويكند راوند حتى ماهان عليها تحط واحد من اونكولات الويكند في نفس الويكند راوند يصير مرة وحدة أخذه، وفي الاونكولات مرتين قبل الاونكول بدقيقتين ترسلي تقولي اتغيرتي ترى من الطوارئ للقسم بدون حتى لو سمحتي كانت تعطيني هي كاوردر ومع ذلك سلكتلها وقلت طيب ومشيت الأمور وخرجت من هناك وعلاقتي طيبة مع الكل الحمدلله، حاولت تستفزني أكثر من مرة بهاذي الحركات وكان ممكن اُستفز فعلًا وأسوي مشكلة واكلم الـ PD ويكبر الموضوع بس إيش كنت حستفيد؟ هي مابتخسر شي أنا اللي حخسر سمعتي وبس وبيحسبوني راعية مشاكل وترى طبيعي كل سنتر يتحيز لأبنائه من دحين أقولكم فمبدأ ياغريب كن أديب نفعني كثير في هذاك الروتيشن الحمدلله صحيح انضغطت بس خرجت منه كسبانة وللأمانة اتعلمت في اونكولاتهم من كثير حالات فطالعت للجانب الإيجابي ومشيت الأمور ومشت

١٦- إذا اشتغلت على نفسك كثير عشان تكون أفضل واحد وبدأ يطلع عنك سمعة ممتازة وينضرب فيك المثل فجأة حتلاقي ناس بلا سبب صارت تكرهك وتعاديك عادي لازم حتقابل ناس كذا، ناس ماتعبت على نفسها ولا تفكر حتى تتعب ومضايقها مدح الناس ليك يعني يا إما تكون زيهم ماتشتغل يا إما حيعادوك ويحاولوا يثبطوك قد مايقدروا 🤷🏻‍♀️
وهنا نرجع للنقطة رقم ٢ الصحبة الطيبة اللي حتحوط نفسك بيهم حيصارحوك هل فعلًا فيه شي يستحق يعادوك عشانه ولا هم بس مزعلهم إنك إنسان كويس وخلاص
عمومًا احذر تخلي حقدهم يأثر عليك وعلى نفسيتك، خليهم سلم نجاح تطلع عليه وهم حقدهم ماحينزلهم إلا لتحت أكثر وأكثر

١٧- (هل جزاء الإحسان إلا الإحسان)
حطوها قدامكم واتذكروها دايمًا ربي ماحيضيع تعبكم في خدمة المرضى وزملائكم وتعبكم على نفسكم عشان تكونوا أفضل نسخة منكم وتخدموا المجتمع بأفضل ماعندكم حتى لو ما جا الجزاء في وقت قريب مصيره حيجي في الأخير ..
بالتوفيق يا أحبة .. 🎀
مع تحيات متدربة في المستوى الرابع تنتهي رحلة تدريبها اليوم تحديدًا .. 😁