-محمد احمد كيف..سلام
- و الله تماااام
كيفن تمام؟
وينو التمام؟
سكتْ..ابتسم
وسكتّ أيضاً باحترام
شتانَ بين كاتم الوجع
و القام يورجغ دون كلام
شتانَ بين الشال غبينته
حِمِل تقيل وسط الزحام
وبين ارزقي ..
شايل دقينته و مصحفين..
داسي بيناتهم كضب
و نسى عنده رب
نسى اهله تب

لابس له جلباب كله جيب
جواته مفتاح بُكسي أمن
و جزلان مدَبّغ
بعرق شفع بيعافرو
ليهم سنين
في طوابير الشقاء
وكم رجعو فاضين اليدين
وينها العدالة
و هل في دين؟
وينها المصالحة و المكاتبة
و اتفاقية السجم
حلم المتاريس في المغيرب
و العشم
في وطن كبير شايل الجميع
من غير حروب دانات و دم

يا محمد احمد قولي بس
لمتين نعيش زي البَهَم
مقيودة بحبال دون وِتِدْ
و مصيرها في يد الأُمم
لمتين تَخّوِن في أخوك
أمك و أبوك
شان قالو دايرين السلام
دقّوه فوق الباب علم
لمتين تباري الازرقي
و لميتن يبعيلك في الوهم

و شن فايدة التعب الزمان
لو كل يوم تصحي و تشيل
هم الرغيف
قوليّا بس وينو التمام
و الضيق وصل حد النزيف
يا محمد احمد مافي حل
غير الحرب لازم تقيف!
٢٠ سبتمبر ٢٠٢٣