لو أنت لسا متخرج قريب هتكلم في الثريد ده عن إيه الحاجات اللي ممكن تعملها بحيث تزود من فرصة إنك يجيلك مقابلة شغل...
أول حاجة لازم تعرف إن ال CV بتاعك هو بوابتك لأي شغل ، يعني لو أنت مش مهتم بيه ومش مهتم إنك تظهره بالصورة المناسبة للوظيفة اللي بتقدم عليها ، فتأكد إنك بتظلم نفسك. اهتم بنظامه وجودته وإنه يكون فيه كل المعلومات اللي تعرفها والوظيفة محتجاها منك ، اتعب في إنك تبرز مهاراتك ومتستسهلش.
أوقات كتير ممكن تبقى مهتم بال CV بتاعك وباذل مجهود كبير فيه بس مش عارف إن فيه مشاكل ، وعشان كده مهم إنك تستعين بحد عنده خبرة في إنه يعمل مراجعة سريعة عليه ويقولك رأيه. كتير بيتبعتلي حاجات زي كده وبتبقى فيها غلطات كبيرة ممكن تمنع الشخص ده من إن ال CV بتاعه يتاخد في الإعتبار.
لو مش متاح ليك شخص عنده خبرة تستشيره في موضوع ال CV ، في مواقع كتير ممكن تستخدمها بتقيم ال CV وبتديلها Score بناء على مستوى الخبرة والتخصص زي Resume Worded ، وكمان بيبقى عليها Templates مضمونة ممكن تستخدمها عشان تتجنب أي مشكلة لو حصل إن ال CV بتاعك اتقرت تفاصيله بشكل Automated.
اهتم ب LinkedIn جدًا وبكل جزء فيه ، وضيف عليه كل مهاراتك والحاجات اللي اشتغلت فيها ، لإن LinkedIn مش زي ال CV موجه لوظيفة بعينها ، أنت تقدر تحط عليه كل الحاجات اللي تعرفها ، وده ممكن يفتحلك فرص ويخلي Recruiters يكلموك لمجرد إنهم لقوا مصطلح أو كلمة عندك على البروفايل.
كتر ال Connections بتوعك على LinkedIn اللي ليهم علاقة بالمسمى الوظيفي اللي بتدور عليه ، وشارك إنجازاتك اللي ليها علاقة بالمسمى ده واكتب عنها بشكل مستمر ، وممكن كمان تشارك الناس حاجة اتعلمتها ، ظهورك وتفاعلك ده بيظهر إنك شخص مجتهد وبرضو بيلعب دور كبير في الفرص اللي ممكن تجيلك.
استخدم مواقع التوظيف المختلفة ومتعتمدش على موقع واحد بس ، يعني اعتمد على LinkedIn ومعاه Wuzzuf مثلاً ، وحتى Google نفسه لو عملت عليه بحث بالمسمى الوظيفي وبعده كلمة Jobs هيطلعلك إعلانات عن وظايف ليها علاقة بالمسمى ده من مواقع مختلفة عمرك ما سمعت عنها.
شوف الناس اللي حواليك لو حد منهم بالفعل شغال في شركة واطلب منه إنه يعملك توصية أو Recommendation ، التوصية مش معناها واسطة وهي مش حاجة غلط زي ما ناس كتير بتبقى متخلية ، وفي شركات كتير بتدفع للموظفين فلوس مقابل إنهم يجيبوا حد شاطر ويكمل في الشركة لفترة معينة.
لو الوظايف اللي بتقابلها مثلاً طالبة سنة خبرة وأنت لسا معندكش خبرة قدم برضو مش هتخسر حاجة ، لإن ممكن يكون المهارات اللي هم محتاجينها تكون موجودة عندك بالفعل بس أنت اكتسبتها بطرق تانية حتى لو مش بنفس درجة القوة.
كل أما تكون فاضي اعمل مشاريع وقوي نفسك في الحاجات اللي أنت عارف إنها ناقصة عندك في المسمى الوظيفي ، وزود ده في ال CV بتاعك وعلى LinkedIn بشكل مستمر ، متقفش عند نقطة إن ال CV اتعمل مرة وخلاص ، العملية دي Cycle من الفيدباك والتحسين المستمر لحد أما ربنا يكرمك وتحط رجلك في أول وظيفة.
جاري تحميل الاقتراحات...