تحسوا إننا من ساعة ما اتعوجنا بقت معوجة، يعني من ساعة مابقينا نقول على طلبات المدرسة supplies والعيال بقت ترجع من المدرسة زي ما راحت أبيض يا ورد. من ساعة مابقينا نقول على المقلمة pencil case العيال بقت ترجع بالمقلمة فاضية وحاجتها ضايعة.👇 #suzyelian
من ساعة مابينا نقول على كيس السندوتشات lunch box الأكل فقد قيمته والعيال ترجع بالأكل متفعص ومش متاكل قال ايه أصله مش عاجبني، رغم اننا بنتفنن ونقعد نخترع، على عكس سندوتش الجبنة والمربى كنت تاكلهم قبل ماتوصل المدرسة أصلا ويسندوك اليوم بطوله. 👇
ومن ساعة مابقينا نقول على الزمزمية flask بقت مابتكملش معانا شهر وتتكسر، دا الزمزمية دي لوحدها كانت بتتوارثها أجيال، حتى أفتح ضلفة النيش عند مامتك هتلاقي زمزميتك واقفة متماسكة في وجه الزمن وفي وجهك أنت واللي يتشددلك كمان. 👇
مش بس لما اتعوجنا في التعليم احنا حياتنا أخدت منحى مِعوج في كل تفاصيل حياتنا اليومية.. يعني من ساعة ما بقينا نسمي اخر الاسبوع ال week end بقى يتقضى في الخناقات والمشاكل بعد ما كان فرصة نتجمع ونقابل قرايبنا وحبايبنا. 👇
واللبس بقى لازم brand وبراند اللبس لازم يبان في التصوير دا اذا ماكنتش الصورة للبراند بس من غير اي حاجة تانية، تلاقي الواحدة مصوره الشنطة وانعكاس الشمس على البراند، ايوه أنا كمتابع أستفدت ايه؟! 👇
والمصيف بعد ما كان هو المايوه وطقمين شورت، واحد منهم أصلا كان بنطلون جينز وقصر عليك فاتقص وتيشرت بردوا صغر بس على اخوك الاكبر منك فأنت اخدته، والاختيارات كانت يا راس البر او لما تتمعظم تبقى إسكندرية، بقى دلوقتي المصيف بيتحضرله قبلها بكام شهر، 👇
وعشان تمر على الشط تتسأل السؤال المتوسخ ايوه المتوسخ زي الهدوم لما تتوسخ وتبقى مش نضيفة متوسخ بالطبقية أنت guest ولا owner، وتحتاج gate pass ولا الكارنية اللي كنت بتبدلوه بينكم وبين بعض عشان تعدوا من بوابة النادي اللي واحد منكم بس هو اللي عضو فيه.👇
والطقم بتاع الخروج اللي كنت بتنتش اي حاجة من الدولاب وتلبسه بقى اسمه outfit وتقف تتصور قدام المرايه ١٥ الف صورة وفي الاخر تختار واحدة تنزلها وأنت أصلا مش نازل بس بتقنع نفسك أنك بتعيش lifestyle معين، بس أنت في الحقيقة مدخل الناس أوضة نومك وبتعيشهم معاك 👇
وبعد كده تيجي تتخانق معاهم عشان هما باصين في حياتك وبيحسدوك رغم أن انت أصلا اللي لغيت مصطلح الخصوصية وفتحت حياتك على البحري.. تفاصيل كتير في حياتنا اليومية بقت معوجة فاحنا كمان اتعوجنا معاها👇
حالنا بقى متشقلب ولا اللي ماشي بضهره ومستني مايتعكبلش او اللي لابس نضارة شمس في نص الليل ومستني الرؤية تبقى واضحة والطريق يبقى سالك. احنا محتاجين نسلك احنا الأول عشان الحياة تبقى سالكة. محتاجين نقف ونتعدل،👇
نبطل نبقى الغراب اللي قلد ماشية الطاووس فبقى لا طايل يبقى طاووس ولا عارف يرجع لأصله ويكون غراب. جايز لما نتعدل الأيام ترضى علينا وتتصلح.
#منقول
#منقول
جاري تحميل الاقتراحات...