مساء الخير يا جماعة ..
طول عمري مكنتش بقدر افهم فكرة تعقيد العلاقات والمشاعر الانسانية بمختلف أنواعها ؛ فمن منظوري أنا كنت دايما بشوف إن العلاقات الانسانية المفروض تكون بسيطة !
طول عمري مكنتش بقدر افهم فكرة تعقيد العلاقات والمشاعر الانسانية بمختلف أنواعها ؛ فمن منظوري أنا كنت دايما بشوف إن العلاقات الانسانية المفروض تكون بسيطة !
أنا بحبك إذا فأنا هعبرلك عن حبي ده بكلامي الواضح الصريح وبأفعالي الواضحة الصريحة ، أو أنا بكرهك (أو خلينا نقول مبحبكش) فأنا هتجنب التعامل معاك ما دام مفيش علاقة إلزامية تجبرنا إننا نتعامل مع بعض !
كبرت شوية وأدركت إن العلاقات ما بين الناس في الدنيا مش دايما بيحكمها المنظور الطفولي البريء اللي كنت بفكر بيه ده ؛ فلقيت إنه عادي في الشغل يبقى الناس بتقول كلام جميل جدا لمديرينهم في وشهم وفي ضهرهم يبقوا بيقطعوا فيهم وبيكرهوهم (نفاق) !
لقيت إن ممكن واحد وواحدة يبقى المفروض انهم بيحبوا بعض وكل واحد فيهم بيحاول يخطط للتاني في التعامل معاه وبيتعامل بأسلوب مختلف عن مشاعره اللي هو حاسس بيها افتراضا ان ده هيوصل لنتيجة معينة !
زي مثلا ان التقل بشكل معين بيخلي الطرف اللي قدامك يحبك أكتر أو إن القفش بطريقة معينة بيخليك مسيطر أكتر في العلاقة ، والصادم بالنسبالي الحقيقة اني كنت بلاقي الطرف التاني بيستجيب الاستجابة اللي كان بيفترضها الطرف الأول (كوكتيل أمراض نفسية غير مفهوم) !
وقيس على ده مواقف شبيهة في العلاقة بين الزوج والزوجة ، وبين الصديق وصديقه ، وبين القرايب وبعضهم وحتى في العلاقة العكسية بين المدير والموظف ؛ فتلاقي الناس بتظهر افعال وكلام ممكن ميعبرش عن اللي جواهم بهدف فرض السيطرة على العلاقة بشكل من الأشكال !
فتلاقي ان من المنظور ده مش مفروض تشكر الشخص اللي بيعمل حاجة كويسة علشان ميتغرش ، ومش مفروض توافق للي قدامك على كل طلباته حتى لو كانت مشروعة وفي ايدك عشان ميتمرعش ، ومش مفروض تعبر عن حبك أو طيبتك أو زعلك أو حزنك من شيء معين لأن ده ممكن يتترجم على إنه ضعف !
وعلى الرغم من إني وللأسف كتير كنت بلاقي إن الناس والعلاقات فعلا بتخضع للأفكار دي ولما كنت بحاول أتعامل من منظوري للعلاقات كنت بواجه مواقف قد يصفها البعض بالفشل ..
وكنت بوصل أحيانا لأزمات نفسية حادة وبحس إني مش عارف أتعامل مع الناس إلا إني مقتنع ومتأكد إن حتى وإن كان ده الغالب على علاقات الناس ببعضها فده غلط وانتشار الغلط لا يعني أبدا إنه صح !
مؤمن تماما إن الإنسان لازم يكون واضح وصريح ومباشر في علاقاته بالناس ويطلع اللي جواه أول بأول وهو ده السلوك الإنساني السوي المريح ، وأي حاجة غير كده هي شيء غير سوي وغير مريح ومرهق ويحتاج للإصلاح والتقويم والعلاج !
جاري تحميل الاقتراحات...