لمحت بعض الكلام عن ليه بيتم تصوير مصر على انها فلاحة بجلابية وطرحة وبعض التساؤلات عن ليه بيتم تصويرها على انها ست من اصله وليا هنا بعض الخواطر الممتزجه ببعض الحقائق ومن منظور اكاديمي وتاريخي بحت
نيجي اولا عن النقطة الاشمال الا وهي ليه بيتم تصوير مصر على انها انثى ؟؟
نيجي اولا عن النقطة الاشمال الا وهي ليه بيتم تصوير مصر على انها انثى ؟؟
بشكل عام لانه مصر كأسم لغوياً مؤنث ده اولا ثانياً حتى منذ فجر التاريخ والاسم الاول لمصر وهو كيمي او كيميت او هوقبتاح كانت تعني الارض السوداء الي كان مقصود بيها الطمي الي بيبقى بعد انحسار الفيضان وفي جميع مراحل مصر تاريخيا حملت مصر اسم مؤنث
طيب سبب التصوير على انها انثى فلاحة بجلابية وطرحه ؟؟ قبل مانجاوب على السؤال ده لازم نتطرق لنقطه مهمة الا وهي مسمى "الوعي الجمعي" وده المقصود بيه هو المفهوم العام عن شيء ما لدي جموع من البشر متشاركه في الزمان والمكان والثقافة وبينهم مجموعة كبيرة من الروابط الاجتماعية
وبالتالي لو مجموعة من البشر بينهم اتفاق ما على انه اللون الاسود يعني الحزن والابيض الفرح والاحمر يعني الاهلي حديد فده يندرج تحت بند الوعي الجمعي للمجموعة دي ومن هنا نقدر نقول انه الوعي الجمعي للشعب المصري اتفق في وقت ما على انه مصر يرمز اليها بفلاحة لابسه جلابية وطرحه
طيب سبب الصورة الذهنية دي ايه وترسيخها تم ازاي وامتى وليه ؟ لو عايزين نستوعب ده لازم نرجع لفترة ماقبل الحرب العالمية الاولى وتململ الشعب المصري من التبعية للخلافة العثمانية واضطهاد الاجانب وتميزهم في مصر وبداية حركة الصحوة القومية وبداية الانسلاج من نسيج الخلافة والاستقلال
الي اترجم بدورة الي ايجاد صور ذهنية جديدة للتعلق بيها واستبدالها للصور القديمة ومن هنا اتولدت بوادر تصوير مصر على انها فلاحة ولانه فترة الصحوة اعتمدت بشكل كبير على ابناء الفلاحين والطبقة الوسطى من ابناء البلد مش الاجانب تعززت الصورة دي كصورة ذهنية عن مصر وهي "الأم"
من ناحية اخرى الشعب المصري دائما مقدس للنساء وهتجد في تاريخنا انه اقدس الاشخاص اناث من أول "أسيت" او ايزيس للسيدة العذراء ام المسيح بن مريم للسيدة زينب هتلاقيم دائما الاكثر قدسية وحفاوة عند المصريين فمنطقي جدا انه هذا المصري المقدس للنساء لما يحب يرمز للوطن هيرمزله بست
والطبيعي انه الست دي تبقى فلاحة بطرحه وجلابية باعتبار انه ده الشكل النمطي للام عند كل الشعب في هذا الوقت ومع زياده حركة الصحوة وانتشارها هنلاقي الصورة دي دخلت في كل المجالات بقوة وانتشرت واوضح الامثلة الاعمال الفنية لجيل الرواد في الحركة الفنية المصرية وعلى رأسهم تمثال نهضة مصر
وتم تعزيز وتعذية الصورة دي بقوة سواء من السلطة او الشعب في فترة ما قبل الحرب العالمية التانيه واستمرت كمان بعدها مع ازدياد حركة الصحوة القومية والمناج السياسي وقتها كمان ساهم في ده بشكل كبير يكفي انه احد اشهر الاحزاب السياسية وقتها كان اسمه مصر الفتاة
وفي فترة ما بعد 1952 استمرت نفس الصورة عن مصر لسببين بالرغم من انتهاء حركة الصحوة استلام الرايه من القوميين اليساريين اولا انه كانت الفترة بتشمل صعود او ترقي اجتماعي لطبقى الفلاحين الي الطبقى الوسطى والصعود ده كان بيحمل معاه مفرداته ومعانيه ورموزه وبالتالي ارتاحت الطبقى دي للرمز
ومن ناحية اخرى التيار القومي لم يكن مبدع بما فيه الكفايه لمحاولة ان يغير الرمز ده او يبدع رموز جديده ويخش معركة وعي مع ثوابت للوعي الجمعي بيتم ترسيخها من حوالي 100 سنه وكعاده كل الكسالى ومنعدمي المواهب وظفوا الرموز دي في خطابهم واستمرت الرموز دي مكمله معانا الي الآن
طيب هو احنا بس الي مخترعين الرمز ده لوطننا ؟ لا كل الدول كده امريكا بترمز لنفسها بالصقر او العقاب فرنسا بتصور نفسها على انها ست برضه واحيانا جوان دي ارك بعد دول البلقان بترمز لنفسها بالنسر مزدوج الرأس الصينيين بيرمزوا لنفسهم بالتنين الاحمر وفي دول كتير كده
طيب هل ممكن تغيير الرمز ده؟ علميا ممكن ..عمليا مستحيل انك تستبدل رمز رسخ في وجدان شعب كامل بكل اجياله وخاصة لما يكون الرمز ده هو رمز الوطن نفسه ونابع من اعمق الجذور والعلاقات الثقافية فيه اقوى الروابط الانسانية وهي الارتباط بين الوطن وال"أم" بس ده نقاش تاني اوسع نتناقش فيه بعدين
وشكرا
جاري تحميل الاقتراحات...